Roma 8:2-14

²Talo ia! Hambu dalak dua: kaesan, mete ma ita takaesa to Yesus Karistus, Manetualain Dula-dalen fee koasa neu ita fo bisa leo-laꞌo no ndoos. Kaduan, hambu manggarauk nai ita dalen dale fo mana kokoe ita fo tao sala-singgok. Mete ma ita tao sala-singgok, Manetualain nunute ita, boe ma nasadea ita. Mete ma ita hambu tala Manetualain Dula-dalen, Ana nakamboꞌik ita numa sala-singgok koasan mai.

³Leo mae ita tao tungga Musa Hohoro-lalanen, naa ta bisa tao nasoi-nasoda ita numa sala-singgok koasan mai, huu ita kada hatahori dae-bafok biasa a mesan fo mana tao sala-singgok nakandoo. Tehuu Manetualain ndia nasosoi dala sasaik. Ana nadenu Ana heli-helin fo dadi neu hatahori dae-bafok biasa sama leo ita. Leo mae hatahori dae-bafok biasa laen tao sala-singgok mata-matak kara, tehuu Yesus ta tao nita sala-singgok hata esa boe na. Lenak bali, Ana dadi neu tunu-hotuk fo koka heni hatahori sala-singgon.

⁴Manetualain nadenu Karistus ena, fo Ana mate, mita fo ita tao tungga basa hata fo ndoos, tungga Manetualain Hohoro-lalanen nara. Dadi hatematak ia, ita tao hata fo ndoos sara, tungga Manetualain Dula-dalen hihii-nanaun, ma ta tao tungga ita mesa ngga hihii-nanaun bali.

⁵Hatahori fo mana leo-laꞌo tungga kada sira mesa kasa hihii-nanaun naa, ara leo-laꞌo talo naa nahuu ara duduꞌa kada hata fo manggarauk kara a mesan rakandoo. Tehuu hatahori fo mana leo-laꞌo tungga kada Manetualain Dula-dalen hihii-nanaun, ara duduꞌa kada hata fo mana tao namahoko Manetualain Dula-dalen.

⁶Hatahori fo mana fee lelak neu hata fo manggarauk kara fo koladu ndia duduꞌan, sama leo hatahori fo ta mana namanene Manetualain Dula-dalen, de ndia dale kuru-eron soa-neu Manetualain maten ena. Tehuu hatahori fo mana fee lelak fo Manetualain Dula-dalen koladu ndia duduꞌan naa, ana leo-laꞌo no ndoos, ma dalen lino-lendek.

⁷Ita hatahori dae-bafok hihii-nanau heli-helin laban tebe-tebe Manetualain hihii-nanaun. De ita mesa ngga ta takaluku fo nenene neu Manetualain, nahuu ita mesa ngga ta bisa.

⁸Hatahori fo mana fee lelak neu ndia mesa kana hihii-nanaun fo koladun, nau ta nau, ta bisa tao namahoko Manetualain dalen.

⁹Tehuu eir ia, hatahori fo ta mana leo-laꞌo manggarauk tungga ei mesa ngga hihii-nanaum bali. Mete ma Manetualain Dula-dalen leo nai ei dalem dale, ei tao basa hata fo tao namahoko Ndia. (Tehuu mete ma hambu hatahori fo Karistus Dula-dalen ta leo nai dalen dale, ana oo ta dadi neu Manetualain enan boe.)

¹⁰Ei ao-mbaam neu ko mate, nahuu ei tao sala-singgok ndia fai bakahulun. Tehuu hatematak ia no Karistus leo nai ei dalem dale, ei samanem neu ko nasoda nakandoo, nahuu Manetualain henggenee nala ei dadi miu hatahori dale ndoos, boe ma ei malole fali mia Ndia ena.

¹¹Manetualain ndia tao nasoda falik Yesus numa mamaten mai. Dadi leo mae ita mate, mete ma Manetualain Dula-dalen leo nai ita dalen dale, neu ko Ana oo tao nasoda falik ita numa mamates mai boe. Naa sosoa-ndandaan nae, Ana tao nasoda ita, sama leo Ana tao nasoda falik Karistus numa mamaten mai ena.

¹²Dadi talo ia, toranoo nggara ein! Ita kahutak kara. Naa, ita ta tahuta fo leo-laꞌo tungga hatahori dae-bafok hihii-nanaun, tehuu ita tahuta fo leo-laꞌo tungga Manetualain hihii-nanaun.

¹³Mete ma ita leo-laꞌo tungga kada manggarauk manai ita dalen dale, na, Manetualain nau nasadea ela ita, ma hukun nakamate ita! Tehuu mete ma ita fee lelak Manetualain Dula-dalen nakalulutu sala-singgok koasan manai ita dalen dale, na, dei fo ita bisa leo-laꞌo no ndoos ta mana ketuk.

¹⁴Hatahori fo mana namanene neu Manetualain Dula-dalen fo koladu sara, na, sira iar Manetualain anan nara.