ቲቶሳ 3

1

2

3

¹ኣሳይ ዴሬ ኣይሲዛይታስ ሃሬታና ማላኔ ሎዖ ጊዲዳ ሚሽ ዉርሲ ኦꬃናስ ጊጋ ጊዳና ማላ ኣሳ ቆፊሳ።

²ቃሴካ ኦኒካ ኣሳ ቦላ ኢታ ሃሳዮንታ ማላኔ ሎዖ ኣሳ ጊዳና ማላ ኣሳ ኡባስ ኩሜꬃ ዎዝናፔ ባ ኣሽኬቴꬅ ቤሳና ማላ ኡባ ቆፊሳ።

³ኑካ ካሴ ቆፋይ ባይንዳይታ፥ ኣዛዜቶንታይታ፥ ባሌቲዛይታ፥ ዱማ ዱማ ኣሞኒኔ ሎዖ ዱሳስ ኣይሌቴꬃን ሃሬቲዛይታ። ኣሳራኔ ኑርካ ኑ ጋርሳንካ ኦዬቲሼ ኢታቴꬃኒኔ ሚቃይኔቴꬃን ዶስ።

⁴ጊዶ ኣቲን ኑና ኣሺዳ ፆሳ ኪያቴꬂኔ ኢዛ ሲቆይ ቆንጪዳ ዎዴ ኑ ኦꬂዳ ፂሎቴꬃን ጊዶንታ ዲሺን ኢዛ ማሮቴꬃ ዳሮን ኣቲዶስ፥ ኢዚ ኑና ኣሺዳይ ናምዓንꬆ ዬሌቴꬅ ጊዲዳ ሜቻኒኔ ፂሎ ኣያናን ኦራፄቴꬃና።

⁶ሄሳካ ፂሎ ኣያናይ ኑ ቦላ ኑ ጎዳ ፆሲ ኑና ኣሺዳ ዬሱስ ኪርስቶሳ ባጋራ ዳርሲ ጉሲዴስ።

⁷ሄሲካ ኑ ኢዛ ኪያቴꬃን ፂሊዲ ሜርና ዴዖ ሂዶታ ኦይኪዲ ላቲዛይታ ጊዳናሳ።

⁸ሄሲካ ኣማኔቲዳ ቃላ። ፆሳ ኣማኒዛይቲ ሎዖ ኦሶስ ባና ኣꬂ ኢማና ማላ ሃይሳ ዉርሳ ኔ ሎዔꬃ ዮታና ማላ ታ ኮያይስ። ሄሲካ ሎዖኔ ኣይ ኣሲካ ኮዪዛዛ።

⁹ቃሴካ ጮ ሃዳ ፓላማፔኔ ኣሳይ ባ ቆሞ ቆዲዛዛፔ፥ ማርሼፌኔ ዎጋ ጊሽ ዴንዲዛ ኦሻፌ ኔ ሃካ። ሄይታንቲ ጎዖይ ባይንዳ ፓꬆንታ ዮዖ።

¹⁰ኣሳ ጊዶን ሻኮቴꬅ ሜꬊዛ ኣስ ኢሲቶ ናምዑቶ ኔ ዞሪን ኤኮንታ ኢፂኮ ኢዛዴራ ኔስ ኢሲፌቴꬂ ዶፖ።

¹¹ሄሳ ማላ ኣሲ ባሌቲዳ ናጋራንቻ ኣሳ፤ ኢዛዴይ ባርካ ባ ቦላ ፒርዲዳይሳ ኔ ኤራ።

¹²ኣርፂሞኔ ዎይኮ ቲቂቆሳ ታ ኔኮ ኪቲኮ ኔ ታኮ ኒቆጶሊዮኔ ያናስ ኔስ ዳንዳዬቲዛዚ ዉርሳ ኦꬃ። ታኒ ሃላይꬃ ባልጎ ሄን ኣꬃና ጋዳ ቃቻዲስ።

¹³ዎጋ ኤሪዛ ዜማሲኔ ኣጲሎሲ ቢሺን ኢስታስ ኮሺዛዝ ዉርሳ ኩንꬃ ማዳ።

¹⁴ኑ ባጋታስ ሃቺስ ሃቺስ ኢስታ ኮሺዛዝ ኢስቲ ዴማና ማላኔ ኢስታ ዴꬃይ ጎዓይ ባይንዳዚ ጊዶንታ ማላ ኢስቲ ሎዖ ኦሶ ኦꬂ ሚናና ማላ ታማራናስ ኮሼስ።

¹⁵ታናራ ዲዛይቲ ኢንቴና ሳሮ ጌቴስ። ኣማኖ ጌዶን ኑና ሲቂዛይታ ዉርሲ ሳሮ ጊቴ። ፆሳ ኪያቴꬂ ኢንቴናራ ጊዶ።