ቲቶሳ 2

1

2

3

¹ኔ ጊዲኮ ኣሳ ቱሙ ጊዲዳዝ ታማርሳ።

²ጪማ ኣሳይ ዎዝናማ፥ ቦንቼቲዳይታ፥ ባና ባርካ ሃሪዛይታ፤ ኣማኖኒኔ ሲቆን ዳንዳያንካ ሎዖ ጊዳና ማላ ኢስታ ዞራ።

³ሄሳꬆካ ጪማ ማጫሳቲ ባ ዲዛ ዱሳን ቦንቾራ ዲዛይታኔ ሎዖ ሃኖቴꬅ ኣሳ ታማርሲዛይታ ጊዴቶ ኣቲን ኣሳ ሱንꬅ ኢሲዛይታ ዎይኮ ዎይኔ ጫጄ ኡሻ ሱኬን ዋፄቲዳይታ ጊዶንታ ማላ ኢስታ ታማርሳ።

⁴ሄሳꬆ ኦꬂኮ ናቴꬃ ማጫሳቲ ባ ኣዚናታኔ ባ ናይታ ዶሳና ማላ ታማርሳናስ ዳንዳዬቴስ።

⁵ፆሳ ቃላይ ኦና ኣቻንካ ጫዬቶንታ ማላ ኢስቲ ባርካ ባና ሃሪዛይታኔ ጌሻታ፥ ኬꬃ ጊዶን ኢስታ ኦሶይ ኦይኪዳይታኔ ኣሳስ ኪያታ፥ ባ ኣዚናታስ ኣዛዜቲዛይታ ጊዳና ማላ ጪማ ማጫሳቲ ኢስታ ታማርሴቶ።

⁶ሄሳꬆካ ያላጋ ኣቱማሳይ ባርካ ባና ሃራና ማላ ኔ ኢስታ ዞራ።

⁷ኣይ ሃኖንካ ኔ ኣሳስ ሎዖ ሌሚሶ ጊዳ። ኔ ኣሳ ታማርሲዛ ቲሚርቴዛ ኔካ ዎዝናፔ ታማርሲዛዴኔ ናጊዛዴ ጊዳ።

⁸ኑ ጊሽ ኢታ ሃሳዪዛ ኣሳይ ሃሳያናስ ኢታ ዴሞንታ ኣጊዲ ዬላታና ማላ ኔ ሃሳዪዛ ሃሳያ ጊዶን ቦርሶ ዮዖይ ዶፖ።

⁹ኣይሌቲ ኣዛንካ ባ ጎዳታስ ሃሬታና ማላኔ ኡፋይሳና ማላ፤ ቃሴካ ኣዉቴ ዛሮንታ ማላ ታማርሳ።

¹⁰ሃኒዛዛን ኡባን ኑና ኣሺዳ ፆሳ ቲሚርቴይ ዶሴታና ማላ ኢስቲ ሎዖ ማርካቴꬅ ቤሳና ማላ ባ ጎዳታ ሚሽ ካይሶቶፔቶ።

¹¹ኣሳስ ኢዛፔ ማሮይ ቤቲዛ ፆሳ ኪያቴꬂ ኣሳ ኡባስ ቆንጪዴስ።

¹²ሄ ኪያቴꬃይካ ኑኒ ናጋራን ዱሲኔ ሃ ኣላሜ ኣሞቴꬃ ካዲዲ ሃይሳ ሃ ዎዴዛን ኑርካ ኑና ሃሪዲኔ ፂሎቴꬃን ቱሙ ኣያና ዱስ ዳናይሳ ኑና ታማርሴስ።

¹³ሄሲካ ኑስ ኣንጄቲዳ ሂዶታ ጊዲዳ ዎጋ ፆሳኔ ኑና ኣሺዳ ዬሱስ ኪርስቶሳ ቦንቾይ ቆንጫናይሳ ናጋናሳ።

¹⁴ኢዚካ ኑና ኢታቴꬃፌ ዎዛናሲኔ ሎዖ ኦꬃናስ ሚኒዛ ባ ዴሬ ኤራይስ ዶራናስ ባና ኑስ ኣꬂ ኢሚዴስ።

¹⁵ሄሳ ጊሽ ኔ ታማርሳናይቲ ሄይታንታ። ሄሳካ ኔ ኩሜꬃ ጎዳቴꬃራ ዞራኔ ሃንቃ፤ ኔና ኦኒካ ሌቆፎ።