ቆላሲያሳ 2

1

2

3

4

¹ታኒ ሂንቴንቶኔ ሎዶቂያ ጊያ ካታማን ዴዒያ ኣሳቶኔ ቃሲ ታና ቤዒቤና ኣማኒያዋንቶ ኡባቶ ኣይ ኬና ባፄታዲታንቶ ሂንቴንቱ ኤራና ማላ ኮያይ።

²ኡንቱንቱ ዎዛናይ ሚናና ማላ፥ ሲቁዋን ኢቲፔ ጊዲዴ፥ ቱሙ ኣኬካን ቤቲያ ዱሬቴꬃ ኡባ ኡንቱንቱ ኣካና ማላኔ ቃሲ ኡንቱንቱ ፆሳይ ኣሳው ቆንጪሲቤናዋ፥ ኪሪስቶሳ ኣ ሁጴው ኤራና ማላ፥ ታኒ ዳቡራይ።

³ጌማን ፆሳይ ሚንጄዳ ኤራይኔ ኣꬌዳ ኤራቴꬃይ ኡባይ ኣኒ ዴዔ።

⁴ኦኒኔ ሂንቴንታ ጪሚያ ቃላን ባሌꬄና ማላ፥ ታኒ ሂንቴንታ ሃሳዪሳይ።

⁵ኣዪሲ ጎፔ፥ ታኒ ሂንቴንቱ ማታፔ ሃካዴ ዴዖፔካ፥ ኣያናን ሂንቴንቱና ዴዓይ፤ ሂንቴንቱ ዴዒያ ማራኔ ኪሪስቶሳ ሂንቴንቱ ሚኒዴ ኣማኒያዋ ቤዓዴ ናሼታይ።

⁶ሲሚ ሂንቴንቱ ጎዳ ኪሪስቶሲ ዬሱሳ ኣኬዳዋዳን፥ ኣኒ ዴዒቴ።

⁷ኣኒ ፃጱዋ ዬዲዴ ዲጪቴ፤ ሂንቴንቱ ታማሬዳዋዳን ኣማኑዋን ሚኒቴ፤ ፆሳ ኡባ ዎዴ ጋላቲቴ።

⁸ኪሪስቶሳፔ ጊዴና ቲሚርቲያን፥ ሃ ሳዓ ሞዲያ ኣያናቱዋ ቲሚርቲያኒኔ፥ ኣሳፔ ዬዳ ኤራቴꬃን፥ ቃሲ ሜላ ጪሙዋን ሂንቴንታ ኦኒኔ ኦሞዴና ማላ ናጌቲቴ።

⁹ኣዪሲ ጎፔ፥ ኪሪስቶሳ ኣሳቴꬃ ቦላን ፆሳቴꬃ ሜꬌታ ኩሜንꬃይ ዴዔ።

¹⁰ቃሲ ኡባ ኣያናቱዋ ካፖቴꬃዉኔ ጎዳቴꬃው ኡባው ሁጴ ጊዲያ ኪሪስቶሳፔ ኩሜንꬃ ዴዑዋ ዴሜዲታ።

¹¹ሂንቴንቱ ኪሪስቶሳና ኢቲ ኣሳ ማላ ጊዲዴ፥ ኣሳ ቃፃራ ማላ ጊዴናን፥ ሂንቴንቱ ናጋራንቻ ሜꬌታ ዲጊያ ቃፃራ፥ ሃዌካ ኣሹዋ ቃፃራ ጊዴናን ኪሪስቶሲ ኦꬄዳዋ።

¹²ሂንቴንቱ ፃማቄቴዳ ዎዴ፥ ኪሪስቶሳና ሞጌቲዴ፥ ኪሪስቶሳ ሃዪቁዋፔ ዴንꬄዳ ፆሳ ዎልቃ ኣማኔዳ ዲራው፥ ኦራꬃ ዴዑዋሲ ፂንቃታን ኪሪስቶሳና ኢቲፔ ዴንዴዲታ።

¹³ሂንቴንቱ ሂንቴንቱ ናቁዋኒኔ ሂንቴንቱ ኤጫ ኣሳቴꬃ ቃፃሬቴናን ኣጌዳዋን ሃዪቂዴ ዴዒያ ዎዴ፥ ፆሳይ ሂንቴንቱ ናቁዋ ኣቶ ጊዴ፥ ኪሪስቶሳና ሂንቴንታ ፓፃ ዎꬄዳ።

¹⁴ኑና ኢፂያ፥ ኣጩዋ ፓራማ ኣ ጫቁዋና ኢቲፔ ፆሳይ ዳኬዳ፤ ማስቃሊያ ቦላን ꬊሺዴ፥ ኦጊያፔ ዲጌዳ።

¹⁵ኪሪስቶሲ ሄ ማስቃሊያን ካፓቱዋፔኔ ጎዳቱዋፔ ዎልቃ ዎꬂ ኣኪዴ፥ ባሬ ፆኑዋኔ ኦሞዴቴዳዋንታ ቆንጪያን ቤሴዳ።

¹⁶ሄዋ ዲራው፥ ሙሳን ዎይ ኡሻን፥ ባላ ጋላሳ ዎይ ኣጌናይ ፄሪያ ዎዲያ ቦንቺያዋን፥ ዎይ ሳምባታ ቦንቺያዋን፥ ኦኒኔ ሂንቴንቱ ቦላ ፒርዶፖ።

¹⁷ሃዋንቱ ሲንꬃፔ ያና ዬዋቱዋሲ ኤሹዋ፤ ሺን ቱማቴꬃይ ኪሪስቶሳዋ።

¹⁸ዎርዱዋ ኣሺኬ ማላታናዉኔ ኪታንቻው ጎዪናናው ኮዪያዌ፥ ቤዒቤናዋ ሳፃን ቤዓዲ ጊዴ ኦቶሬቲያዌ፥ ኣሳቴꬃ ቆፋን ጮ ኣዪያዌ፥ ኦኒኔ ሂንቴንቱ ቦላ ፒርዶፖ።

¹⁹ሄዋ ማላ ኣሳይ ሁጴ ጊዲያ ኪሪስቶሳ ሚኒሲ ኦይቄዳዋ ሌፒሴ። ቦላ ኡባይ ሄ ሁጲያፔ ዎልቃ ዴሚዴ፥ ቦላን ዴዒያ ኩሪያናኔ ፃጱዋና ኢቲፔ ኦይቄቲዴ፥ ፆሳይ ዲቺያ ዲሹዋዳን ዲጬ።

²⁰ሂንቴንቱ ሃ ሳዓ ሞዲያ ኣያናቱዋፔ ሃኪዴ፥ ኪሪስቶሳና ሃዪቄዲታ፤ ያቲና፥ ኣዪሲ ሃ ሳዓ ዎጋን ዴዒያ ኣሳዳን ዴዒቴ? «ኦይቆፓ፤ ባራ ቤዖፓ፤ ቦቾፓ» ያጊያ ሂጌቶ ኣዪሲ ኣዛዜቲቴ?

²²ሃ ኡባባይካ ኣሳይ ሜꬌዳ ሂጌኔ ቲሚርቴ ጊዲያ ዲራው፥ ዎዲያፔ ጉዪያን ꬋያና።

²³ኡንቱንቱ ኪታንቻው ጎዪኒያዋኒኔ ዎርዱዋ ኣሺኬ ማላቲያዋን ቃሲ ባሬንቱ ኣሳቴꬃ ጊልቂሲያዋን ኣꬌዳ ኤራንቻ ማላቲኖ፤ ሺን ኣሹዋ ኣሙዋ ዲጋናው ጎዔና።