ሉቃሳ 17:7-37

⁷ቃሲካ ዬሱሲ፥ «ሂንቴፔ ጎሺያዌ ዎይ ሚያ ሄሚያ ቆማይ ዴዒያ ኣሳይ ሃቄት ዴዖፔ፥ ጎሻ ጋዴፔ ዎይ ሚያ ጋዴፔ ሲሞ ዎዴ ኤሌካ፥ ‹ሃያ ሼምፓ ኣካ፥ ቁማ ማናው ኡታ› ያጊያዌ ኦኔ?

⁸ዬዉዋን ቃሲ፥ ‹ታ ማና ካዉዋ ጊጊሳ፤ ታ ማናኔ ኡሻና ጋካናው ሚናዴ ታና ኤቃዴ ሚዛ። ሄዋፔ ጉዬ ኔው ማ፥ ኡሻ› ያጊያዋ ጊዴኔ?

⁹ሄ ቆማይ ኪቴቴዳባ ኦꬄዳ ዲራው፥ ሄ ቢታኒ ጋላታናው ቤሴኔ?

¹⁰ሄዋዳንካ ሂንቴ ቃሲ ኣሳይ ሂንቴና ኪቶ ኦሱዋ ኦꬄዳ ዎዴ፥ ‹ኑኒ ማዴና ቆማቱዋ፤ ኑ ኦሶ ፃላላ ኦꬄዶ› ያጊቴ» ያጌዳ።

¹¹ዬሱሲ ዬሩሳላሜ ቢዴ፥ ጋሊላፔኔ ሳማሪያ ጊያ ጋዳቱዋፔ ጊዱዋና ኣꬌዳ።

¹²ኢ ኢቲ ጉꬃ ካታማቶ ጌሊያ ዎዲያን፥ ሃኩዋን ኤቄዳ ታሙ ኦሉዋን ኦይቄቴዳዋንቱ ኣ ቤዔዲኖ። ኡንቱንቱካ ሃኩዋን ኤቂዴ፥

¹³ባሬንቱ ኮሻ ꬎቁ ኡዲዴ፥ «ዬሱሳ፥ ጎዳው፥ ሃያ ጎዶ ኑና ፓꬃሪኪ!» ያጌዲኖ።

¹⁴ዬሱሲ ኡንቱንታ ቤዒዴ፥ «ቢዴ፥ ሂንቴንቱ ቦላ ቄሳቱዋ ቤሲቴ» ያጌዳ። ኡንቱንቱካ ቄሳቱዋኮ ቢዴዒዴ ኦሉዋፔ ፓፄዲኖ።

¹⁵ኡንቱንቱፔ ኢቱ ባሬ ሃርጊያፔ ፓፄዳዋ ቤዒዴ፥ ባሬ ኮሻ ꬎቁ ኡዲዴ፥ ፆሳ ቦንቺዴ ሲሜዳ።

¹⁶ጋላቲዴካ ዬሱሳ ጌዲያ ማታን ጉልባቴዳ። ሄ ቢታኒ ሳማሪያ ኣሳ።

¹⁷ዬሱሲ ዛሪዴ፥ «ታሙ ፓፂቤይኪኖ? ያቲና ኡዱፑናቱ ሃቃን ዴዒኖ?

¹⁸ኣዪሁዳ ኣሳ ጊዴና ሳማሪያ ቢታኒያፔ ኣቲን፥ ፆሳ ቦንቻናው ሲሜዳዋንቱ ባዋ ጉሴ?» ያጌዳ።

¹⁹ዬሱሲ ኣ፥ «ዴንዳ ባ፤ ኔ ኣማኑ ኔና ፓꬄዳ» ያጌዳ።

²⁰ፓሪሳዋቱ ኢቲ ጋላሲ፥ «ፆሳ ካዉቴꬃይ ኣዉዴ ያኔ?» ጊዴ ኦቺና ዬሱሲ፥ «ፆሳ ካዉቴꬃይ ሂንቴንቱ ናጊያ ኦጊያን ዬና» ያጊ ዛሬዳ።

²¹ቃሲካ፥ «ኦኒኔ፥ ‹ፆሳ ካዉቴꬃይ ሃዋን ዴዔ›፥ ዎይ ‹ሄዋን ዴዔ› ጋናው ዳንዳዬና፤ ፆሳ ካዉቴꬃይ ሂንቴንቱ ዎዛና ጊዶን ዴዔ» ያጌዳ።

²²ዬሱሲ ባሬና ካሊያዋንቶ ኦዲዴ፥ «ኣሳ ናዓይ ቆንጪያ ጋላሳቱዋፔ ኢቱዋ ቤዓናው ሂንቴንቱ ኣሞቲያ ዎዲ ያና፤ ሺን ቤዒኪታ።

²³ቃሲ ኡንቱንቱ ሂንቴና፥ ‹ሃዌኩ ሃዋና› ዎይ ‹ሄዋና› ያጋናዋንታ። ሺን ኡንቱንታ ካሊዴ፥ ኡንቱንቱና ቦፒቴ።

²⁴ዋልቃንꬃይ ሳሉዋን ዎልቃሚያ ዎዴ፥ ሃ ጋፃፔ ሂኒ ጋፃ ፖዑ ፖዒያዋዳን፥ ኣሳ ናዓ ዩሳይካ ሄዋዳን ሃናናዋ።

²⁵ሺን ኮይሮቲዴ ኣሳ ናዓይ ዳሮ ሜቱዋ ሜቶታናዉኔ ሄ ዎዲያን ዴዒያ ዬሌታን ኢፄታናው ቤሴ።

²⁶«ኖሄ ዎዲያን ሃኖዋዳንካ፥ ኣሳ ናዓይ ቆንጪያ ጋላሳንካ ሄዋዳን ሃናናዋ።

²⁷ኖሄ ማርካቢያ ጌሎ ጋላሳይ ጋካናው ኡንቱንቱ፥ ሚዲኔ ኡሺዴ፥ ኣኪዲኔ ኣኬቲዴ ዴዒሺን፥ ባሻ ሃꬃይ ዪዴ ኡባ ኣሳካ ባዪዜዳ።

²⁸«ሄዋዳንካ፥ ሎፄ ዎዲያን፥ ኣሳይ ሚዲኔ ኡሺዴ፥ ዛሊዒዴ፥ ቶኪዲኔ ጎሊያ ኬፂዴ ዴዔዲኖ።

²⁹ሺን ሎፄ፥ ሶዶማፔ ኬሶ ጋላሳን ቃሲ ሳሉዋፔ ታማይኔ ኤፂያ ቦንቆ ሹቻይ ቡኬዳ፤ ኡባባካ ሚዴ ዉርሴዳ።

³⁰«ኣሳ ናዓይ ቆንጪያ ጋላሳንካ ሃዋዳን ሃናናዋ።

³¹ሄ ጋላሳን፥ ጎሊያ ሁጲያን ዴዒያዌ፥ ጎሌ ጋርሳን ዴዒያ ሚሻ ኣካናው ዎꬎፖ፤ ሃዋዳንካ ጎሻ ጋዴን ዴዒያዌ፥ ጉዬ ሲሞፖ።

³²ኣኔ ሎፄ ማቻቲባ ቆፒቴ!

³³ባሬ ሼምፑዋ ኣሻናው ኮዪያ ኡባይ፥ ባዪዜ፤ ባሬ ሼምፑዋ ባዪዚያ ኡባይ፥ ዴዑዋን ናጌ።

³⁴ታ ሂንቴው ኦዲያዌ ኣዬ ጎፔ፥ ሄ ቃማን ላዑ ኣሳቱ ኢቲ ጊሱዋን ጊሳናዋንታ፤ ኡንቱንቱፔ ኢቱ ኣኬቲና ላዔꬂያዌ ኣታናዋ።

³⁵ላዑ ማጫ ኣሳቱ ኢቲ ዎፃን ጋጫናዋንታ፤ ኢቲና ኣኬቲና፥ ኢቲና ኣታናዉኑ።

³⁶ላዑ ኣሳቱ ጎሻ ጋርሳን ዴዒኖ፤ ኢቱ ኣኬታናዋ፥ ላዔꬂያዌ ኣታናዋ» ያጌዳ።

³⁷ኣ ካሊያዋንቱ ዬሱሳ፥ «ጎዳው፥ ሄዌ ሃቃን ሃናናዌ?» ያጌዲኖ። ኢካ ዛሪዴ፥ «ባኩታይ ዴዒያሳ ሾርቲ ሺቃናዋ» ያጌዳ።