Lukas 17:7-37

⁷“Are eman leimi mi wor eman nöün chon angang mi tuw pwül are tümwünü sip, ifa usun, lupwen epwe liwinto seni lemäl, epwe üreni pwe epwe kaito pwe epwe mongö?

⁸Apwi! Nge epwe üreni, ‘Kopwe amolätä anei mongö, anükü üfom o angang ngeniei tori üpwe wes le mongö o ün. Mürin en kopwapw mongö o ün.’

⁹Ifa usun, ewe samol epwe kilisou ngeni nöün chon angang pokiten a aleasochisi mine a akünö ngeni?

¹⁰Ina usun pwal ämi. Lupwen oua wes le föri wisemi meinisin, oupwe apasa, ‘Äm aia chon angang mi lomotongau, aia chök föri mine wisem.’”

¹¹Iwe, lupwen Jesus a fetal ngeni Jerusalem, a pwerela le kiänin Samaria me Kalilea.

¹²Nge lupwen Jesus a tori eu sopw, a churi engol mwän mi üriir rupun pwötür. Ra ütä me toau

¹³o kökkö fän leüömong, “Jesus äm samol, kopwe tongeekem!”

¹⁴Iwe, lupwen Jesus a küneer a üreniir, “Oupwe feila ren ekewe souasor, pwe repwe nenengenikemi.” Iwe, lupwen ra feila, ra limöchüla seni rupur kewe.

¹⁵Iwe, lupwen eman me leir a küna pwe a pöchökülsefäl, a liwinsefäl o mwareiti Kot fän mwelian mi leüömong.

¹⁶A chapela won pwül arun pechen Jesus o kilisou ngeni. Ätei eman re Samaria.

¹⁷Mürin Jesus a apasa, “A wor engol mwän mi pöchökülsefäl. Ikafa ir ekewe tiweman?

¹⁸Pwota ei chök eman re ekis a liwinsefälito o pwärätä an kilisou ngeni Kot?”

¹⁹Iwe, Jesus a üreni, “Kopwe ütä o feila, om lükülük a apöchökülokotä.”

²⁰Iwe, ekoch ekewe Farisi ra aisini Jesus ika inet ewe Mwün Kot epwe war. Jesus a pölüeniir, “Ewe Mwün Kot esap feito lon och sokun lapalap ach sipwe tongeni küna.

²¹Esap wor eman epwe tongeni apasa, ‘Nengeni a nom ikei,’ are ‘Nengeni, a nom ikenan,’ pun ewe Mwün Kot a nom lon lelukemi.”

²²Mürin Jesus a üreni nöün kewe chon kaiö, “Epwe war ewe fansoun, lupwen oupwe fokun mochen küna eu ekewe ränin Nöün Aramas, nge ousap fokun küna.

²³Iwe, repwe ürenikemi, ‘Nengeni, a nom ikenan!’ are ‘Nengeni, a nom ikei!’ Ousap feila rer, ousap pwal tapwela mürir.

²⁴Pun usun fifi a fila seni läng o asarama fanüfan seni epek tori epek, iei usun Nöün Aramas lon ränin.

²⁵Nge akomwan epwe tolong lon riaföü watte o küna koput me ren ei täppin aramasen ikenai.

²⁶Usun mine a fis lon fansoun Noa, iei usun epwe pwal fis lon ränin Nöün Aramas.

²⁷Ra momongö o ükün, ra pwüpwülü o akapwüpwülüür tori ewe rän lupwen Noa a tolong lon ewe waimw o ewe noter a war o niirela meinisin.

²⁸Pwal inachök usun ewe fansoun Lot. Aramas ra momongö o ükün, ra kakamö o akamömö, ra fofot o aköüetä imw.

²⁹Nge lon ewe rän lupwen Lot a towu seni Sotom, ekkei me primston a püngütiu seni läng o niirela meinisin.

³⁰Epwe chök pwal ina usun lon ewe rän Nöün Aramas epwe wareto lon.

³¹“Lon ewe rän, eman aramas mi nom won imwan, esap wor an fansoun an epwe tolong lon imwan pwe epwe angei pisekin. Pwal ina chök usun ewe mi nom lemäl, esap wor an fansoun an epwe liwinsefäliti imwan.

³²Oupwe chechemeni pwülüen Lot!

³³Iö a mochen amanaua püsin manauan, epwe pöüt seni, nge iö a pölükü manauan, epwe amanaua manauan.

³⁴Üpwe ürenikemi, lon ewe pwinin ruoman aramas repwe möür lon echö chök kieki. Repwe angeala eman, nge ewe eman repwe likitätiu.

³⁵Ruoman fefin repwe üsüsfengen, repwe angeala eman, nge ewe eman repwe likitätiu.

³⁶Ruoman mwän repwe nonomfengen lemäl, repwe angeala eman, nge ewe eman repwe likitätiu.”

³⁷Iwe, ekewe chon kaiö ra aisini Jesus, “Äm Samol, ia epwe fis ie ei?” Jesus a pölüeniir, “Ia a wor ie eman somä, ikenan ekewe machang iter wolcher ra mwichfengen ie.”