8मेको कली ठेयब सेल्तीवी हना, इ कली ठेयब सेल्ब। गे मेको कली मुप्तीवी हना, इ कली मान ततीक गेब।
9मेकोमी इ पिया दारशो पा ग्योम्पाइक्ब। इ पिया तारी रिम्शो सिरपेच गुक्ब” दे शेंताक्यी।
10आं तौ, इ नोफा दाइश्शा, आं लोव़ नेंशा, ब्रावो। मो पाप्तीवी हना, गे शुश ब्रोंइनेवे। हितोपदेस ३:२
11गो इ कली तुइक्तीक लां शेंताक्न। गो इ कली रिम्शो थुं ङा मुर आन लांम गाक्पाइक्तन।
12गे गाक्ङेनु, इ कली सुइम मतेक्नीम। मिनु दोरते हना, दाइल मपांइसीनेवे।
13अर्ती कली मिम्शा, मेको कली मप्रेंदो। मेको कली टिवो। मारदे हना मेको इ ब्रोंइतीक बाक्ब।
14परमप्रभु यावे आ अरेशो मटीब नु मगाक्को। मरिम्शो पाइब आन लां मगाक्को भजन संग्रह १:१
15मेकोपुकी नु मगाक्को। आन लां मलावो। आन लां हेरशा लावो।
16मारदे हना मेकोपुकी मरिम्शो मपामे सम्म इप्ने मचाप्नीम। मुर कली मथिपदमे सम्म निन्द्रा मपाइनीम। भजन संग्रह ३६:५; मीका २:१
17परमप्रभु यावे आ अरेशो मटितीके मेको आन जचा थोव़क खोदेंशो बाक्ब। हुश ख्राक्श पोक्तीके आन तूचा थोव़क खोदेंशो बाक्ब।
18तन्न ठीक पाइब आन लां सुनी ङा छेङछेङ खोदेंशो बाक्ब। मेको नाक्ती उइक्थ दुम सम्म बारना बारन शुश छेङछेङ दुम्ब। हितोपदेस २४:२०
19परमप्रभु यावे आ अरेशो मटीब आन लां क्येर नाक्दो ङा छिङछिङ खोदेंशो बाक्ब। मेकोपुकीम मारेइमी दाइल पाइक्नीम, दे मतुइक्नीम।
20आं तौ, आं लोव़ नेनो। इ नोफा दाइश्शा, आं देंशो नेनो।
21आं लोव़ कली गेना हना यो मिम्तो। मिनु मेको कली इ थुंमी वोतो।
हितोपदेस 4
हितोपदेस 4:8-21