9परमप्रभु यावे आ अरेशो मटीब मुर आन लां परमप्रभु यावे कली ग्रांग्रा बाक्ब। तन्न सुमी ठीक पाइबा, मेको कली दाक्ब।
10नोले शोंइसीशो मुर हिंचा ङा सजाइ ताइनीम। तन्न हुइश्शो काइ मदाक्ब मुर बेक्चा माल्ब।
11दोदेंशो पा परमप्रभु यावेमी बेक्शो मुर आन बाक्तीके नु जाम्शा लतीके तुइक्बा, मोदेंशो पा मुर आन थुं कली यो तुइक्ब। अय्युब २६:६; भजन संग्रह १३९:८; प्रकाश ९:१,११; येरमीया १७:१०
12मुरुम शुक्शी पाइब आन कली “मोदेंशो मपावो” दे अरेशो काइ मदाक्नीम। मेकोपुकी जोक्ब तुइक्ब मुर आन नेक्था मलाइनीम।
13ग्येरशो थुं पाइश्शो मुर आ कुल हाक्सीशो तांइसीब। तन्न सुर्ता पाइब आन थुं लुक्च लाइब।
14रुप्ब थुं पाइश्शो मुरुमी जोक्तीके माल्ब। तन्न मूर्खमी मूर्खे पचा ला दाक्नीम।
15श्येत जाइब आन नाक्ती मरिम्शो बाक्नीम। तन्न ग्येरसीशो थुं पाइश्शो मुर आन नाक्ती नेल्ल चाड खोदेंशो बाक्नीम। हितोपदेस १७:२२
16शुश शोंप नु मेको आ पर्बम श्येत जचा क्येङा इच्का ला शोंप बाक्शा परमप्रभु यावे कली मान पा हिंचा रिम्शो बाक्ब।
17काइ मदाक्शो मुर नु ब्रोव़शो श्ये खमे जचा क्येङा, दाक्मुशा चूले खमे जशो रिम्शो बाक्ब।
18शुश गाइक्ब मुरुमी जिचा पोक्ब। तन्न रीब पा मगाइक्ब मुरुमी जितीके तेक्ब।
19अल्सी आन लां चूम ब्रीशो बाक्ब। तन्न रिम्शो थुं पाइश्शो मुर आन लां थेल्शो बाक्ब।
20जोक्ब तुइक्ब थुं पाइश्शो तौमी आ आफ कली ग्येरपाइक्ब। तन्न मूर्ख तौमी चहिं आ ममा कली महिक्ब। हितोपदेस १०:१
21निप्स मपाइश्शो मुर मूर्खे गेय पचा ग्येरसीनीम। तन्न रुप्ब मुर गेना हना यो आंम लांम गाक्नीम।
22अर्ती मनेंथु गेय पाइब आन गेय शोर गाक्शो बाक्ब। तन्न अर्ती गेब शुश बाक्तेक्म हना, मेको आन गेय रिम्शो दुम्ब। हितोपदेस ११:१४
23मुरुम ठीक पा लोव़ लेन्ने चाप्तु हना, ग्येरपाइक्ब। माल्ची ना माल्शो लोव़ पचा, गिश रिम्शो बाक्ब।
24जोक्ब तुइक्ब मुर ब्रोंइचा गेब ग्येत्थ लां लाइब बाक्नीम। मोपा बेक्शो मुर आन बाक्तीक लतीक लुक्च लां मलाइनीम।
हितोपदेस 15
हितोपदेस 15:9-24