16रिम्शो थुं पाइश्शो मीश मुर कली मान पाइनीम। तन्न मरिम्शो पाइब मीश मुनेमी सुम्सीशो बाक्ब। गेय मपाइब मुर प्रुङग दुम्ब। तन्न आंट पा गेय पाइबमी क्येट चेम्ब।
17रिम्शो पाइब मुरपुकीमी आंम कली रिम्शो पाइनीम। तन्न मरिम्शो पाइबपुकी श्येत गेंसीनीम।
18परमप्रभु यावे आ अरेशो मटीब मुरुमी क्येट चेम्ब, तन्न मलीब। तन्न ठीक पाइब मुरुमी इनाम ताइनीम।
19सु गेना हना यो ठीक पाइब बाक्बा, मेको ब्रोंइब। तन्न सु मरिम्शो पचा कली चुइक्बा, मेको बेक्ब। हितोपदेस १९:२३
20मरिम्शो थुं परमप्रभु यावे कली ग्रांग्रा बाक्ब। तन्न दोस मताइब रिम्शो थुं पाइश्शो मुर आन लां गाक्शो तशा ग्येरसीब।
21मरिम्शो पाइब मुर सजाइ मतथु मब्रोंइनीम। मेको थमा बाक्ब। तन्न ठीक पाइब आन चच युइ ब्रोंइचा ताइनीम।
22निप्स मपाइश्शो दारशो मीश मुर सुन के मुन्द्री पांइशो पोव़ खोदेंशो बाक्ब। हितोपदेस ३१:३०
23ठीक पाइब मुर आन दाक्शो थमा पा ताइनीम। परमप्रभु यावे आ अरेशो मटीबम गाइक्पाइक्नीम।
24का निक्शी मुरुम शुश गेनीम हना यो, आन शोंप मेको क्येङा बारब। का निक्शी चहिं आन गेचा माल्शो मगेथु, प्रुङग दुम्नीम। मत्ती २५:२९; २कोरिन्थी ९:६
25हाइश्शो मुरुमी शुश ताइब। सुम अरु आन कली वारच पाइक्बा, मेकोमी आंमा यो वारच पाइक्चा पुंइसीब।
26अरु आन कली अन्न मगेथु खेक्शा वोइक्ब मुर सराप पाइक्चा पुंइसीब। तन्न अन्न लेयब मुर आसीक ताइब।
27सुम रिम्शो पतीके माल्शा पाइबा, मेकोमी शिशी माल्ब। सुम मरिम्शो पतीके माल्बा, मेको मरिम्शो पाइक्चा पुंइसीब।
28सुमी आ शोंप कली थमा सुइक्बा, मेको रीब पा बेक्ब। ठीक मुर चहिं गिग घांस खोदेंशो पा बारशा लाइब। भजन संग्रह ५२:९-१०
29आंम खिं ङा मुर आन कली श्येत चाक्बमी मारेइ मथेरब। मिनु मूर्खपुकी जोक्ब तुइक्ब आन वाइल दुम्नीम।
30ठीक पाइब मुर आन पतीके ब्रोंइचा गेब रवा खोदेंशो बाक्ब। तन्न हुश ख्राक्श पोक्बमी मुर आन कली साइक्ब। हितोपदेस ३:१८
31ठीक पाइब मुरपुकीम रागीम बाक्मानु, आन ठीक पशो ङा इनाम ताइनीम। परमप्रभु यावे आ अरेशो मटीब नु मरिम्शो पाइबपुकीमी यो आन मरिम्शो पशो ङा इनाम ताइनीम। १ पत्रुस ४:१७-१८
हितोपदेस 11
हितोपदेस 11:16-31