3मिनु गे लने। भेडा पाठा आन कली फर आन दातेमी सोइश्शो खोदेंशो पा सोइक्तान्नी।
4लनीनु, क्येट, झोला, जुत्ता मकुरथु लने। लांमी मुर आन कली ग्रुम्तीनी हना, लोव़ मपने। लूका ९:३-५; २राजा ४:२९
5मुर आन खिंमी जाक्दीश्शा ओव़नीनु, मेको खिं ङा मुर आन कली ‘थुं नाइश्शा बाक्कीन’ दे आसीक गेने। यूहन्ना २०:१९
6मेको खिंमी थुं नाइक्चा ताइब का बाक्त हना, इन थुं नाइक्तीक आसीक मेकोम राइब। तन्न मबाक्ब हना, मेको थुं नाइक्तीक आसीक गे राइनीनी।
7मुरपुकीम बास गेम्तेक्म हना, गाक्ची मजाक्म सम्म मेकेरन बाक्कीन। खिं खिं याक्शा मबाक्कीन। इन कली मार जचा तूचा गेमे, मेको जने तूङीन। मारदे हना गेय पाइबपुकीमी आन गाल्च तचा माल्नीम।
8सहरम जाक्दीन्नीनु, मुरपुकीम इन कली ब्रशा, बास गेशा थुल्तेक्म हना, मार जचा गेमे, मेको जने।
9रोइ पाइब आन कली सापतीन। मिनु मुर आन कली ‘परमप्रभु यावे आ राज्य इन नेक्था जाक्शो बाक्ब’ दे नेंपतीन।
10तन्न मुरपुकीमी इन कली मब्राम्तेक्म हना, सहर ङा लांमी गाक्नीनु,
11‘आंइ खोइलीम क्येप्शो इन सहर ङा फुरक यो फिक्नीकी। मो हना यो परमप्रभु यावे आ राज्य इन नेक्था जाक्शो बाक्ब, दे तुइक्तीन।
12परमप्रभु यावे आ ठेयब निसाफ पची ना गे इन क्येङा सोदोम सहरम शिशी ताइब, देनीन।’ उत्पत्ती १९:१-२९
13ए खोराजीन, ए बेथसैदा, इन तशो चिन्ड नु छक लाक्चा ङा गेय टायर नु सीदोन ङा मुरपुकीमी तशो नम हना, भाङरा फेक्शा, पुलुम निश्शा आन थुं परमप्रभु यावे गे लेत्तेम वा।
14ठेयब निसाफ पची नाक्ती टायर नु सीदोन ङा मुर आन क्येङा गे शुश सजाइ ताइनीनी।
15ए कापेरनाउम, मार गे स्वर्ग सम्म क्युक्सीनेवे ङा? ममाइ, बेक्शो आन बाक्तीक तोक्चा पुंइसीनेवे।
16सुमी इन शेंशो नेंना, मेकोमी आं शेंशो नेंब। सुमी इन कली मब्राइबा, मेकोमी आं कली मब्राइब। आं कली मब्राइबमी आं कली सोइक्ब कली यो मब्राइब” दे माइश्शा सोइक्तीमी बाक्त। मत्ती १०:४०; यूहन्ना ५:२३
17मिनु मेको ७० जना लशा शेंने थुम्शा, येसु आ बाक्तीके लेश्शा जाक्मा बाक्त। मिनु जाक्शा, येसु कली “प्रभु, इन नें थिशा, हुइश्शोनु वोलम यो टिशा प्रोक्बाक्तेक्म” दे थाम्पा ग्येरसीशा मदमे बाक्त। ७२ जना शेंसीब यो देंनीम।
18मिनु येसुमी “सरीङ रे चिला आप्शो खोदेंशो पा गो सैतान कली दोक्शो ताता। यूहन्ना १२:३१; प्रकाश १२:८-९
19गे बुस्स नु बिच्छी दिम्ताक्नी हना यो, इन कली मकोक्नीम। मारेइ पने मचाप्नीम। मोदेंशो पा सैतानमी इन कली मारेइ पने मचाप्ब। सुइमी यो इन कली मारेइ पने मचाप्ब। भजन संग्रह ९१:१३; मर्कूस १६:१८
20वोलम इन देंशो टीनीम, दे तुइक्नीनी। मेको आ पर्बम मग्येरसीन। तन्न ‘परमप्रभु यावे आ मुर दुम्शा, इं नें परमप्रभु यावे नु ब्रोंइचा ताइब आन किताबम ब्रेक्साक्व’ दे तुइश्शा थाम्पा ग्येरसीने” दे माइक्मी बाक्त। प्रस्थान ३२:३२; यसैया ४:३; फिलिप्पी ४:३; प्रकाश ३:५
21मिनु येसु परमप्रभु यावे आ सोक्तीम पतीके ग्येरशा “आं आफ, सरीङ नु रागी ङा परमप्रभु, गे नेल्ल क्येङा ठेयब ननी। गे शुश रिम्शो पाइतीनी। जोक्ब तुइक्ब नङ, दे मिम्ब आन कली इन लोव़ रुप्तीक थुं मगेनी। मजोक्ब मतुइक्ब आन कली रुप्तीक थुं गेतीनी। गे मोदेंशो पचा दाक्ताक्नी। १कोरिन्थी २:७
22आं आफोमी आं कली नेल्ल कली अधिकार पतीक सक्ति गेती। तन्न सुइमी आ तौ सु बाक्बा, मतुइक्नीम, आं आफोमी ला तुइक्ब। सुइमी आं आफ कली मतुइक्नीम। आ तौमी ला तुइक्ब। मिनु तौमी सु सु आन थुंम तुइक्तीक वोइक्बा, मेकोपुकीमी यो तुइक्नीम” देंमाक्त।
23मिनु आ शेंसीब गे हिरशा, मेको आन कली “सुम इन खोदेंशो पा ताइनीमी, मेकोपुकी ग्येरसीमल। मत्ती १३:१६-१७
24मारदे हना इन तशो नेंशो साइ नेसी रे परमप्रभु यावे आ लोव़ पाइब नु पिपीपुकीमी तचा नेंचा दाक्ताक्मे। तन्न तचा नेंचा मतामे” दे माइक्मी बाक्त। १पत्रुस १:१०
25मिनु येसुमी मुर आन कली शेंदानु, सास्त्री का बोक्शा, येसु आ थुं थाम्शा “हे शेंब, गो गेना हना यो ब्रोंइशा बाक्चा कली मार पचा माल्नुङा?” दे हिल्लो पवा बाक्त। मत्ती २२:३५-४०; मर्कूस १२:२८-३४; लूका १८:१८-२०
26मिनु येसुमी “परमप्रभु यावे आ अरेशो लोव़मी मार ब्रेक्शो बाक्मे? मेको मपढेनी?” देंमेनु,
27मेकोमी “इ थुं नेल्लेमी, इ रां नेल्लेमी नु इ सक्ति नेल्लेमी परमप्रभु, इ परमप्रभु यावे कली दाक्तो। मिनु आंम कली दाक्शो खोदेंशो पा इ नेक्था बाक्ब आन कली यो दाक्तो, दे ब्रेक्शो बाक्ब” देंमाक्त। ब्यवस्था ६:५; लेवी १९:१८
28मिनु येसुमी “ठीक देंते। मेको इ देंशो खोदेंशो पाप्तीवी हना, गेना हना यो ब्रोंइशा बाक्चा ताइनेवे” देंमाक्त। लेवी १८:५; मत्ती १९:१७
29मिनु आंम कली ठीक सेल्शा, मेकोमी “आं नेक्था ङा मुर सु बाक्नीमी, गो मतुइक्नुङ” देंमाक्त।
30मिनु येसुमी “मुर का यरूसलेम रे यिशा, यरीको सहर ङा लां खोदा बाक्त। मिनु लमेनु, खुइपुकीमी लांम बाप्शा, मेको कली तुप्शा, थपाइश्शा, आ बाक्शो मारेइ मारेइ नेल्ल रोइश्शा, प्रोक्मा बाक्त।
31इच्का नोले मेको लां पा चढ़ेब का पिशा, मेको तुप्शा बेक्चशो मुर कली तशा, हेरशा लाक्गा बाक्त।
32मिनु इच्का नोले लेवी आ थर ङा मुर का यो मेको लां रे पिमाक्त। मेकोमी यो मेको बेक्चशो मुर कली तशा, हेरशा लाक्गा बाक्त।
33मिनु नोले सामरीया रागी ङा मुर का पिमाक्त। मेकोमी बेक्चशो मुर कली तशा शिशी पवा बाक्त।
34तुप्शो मुर आ गारमी तेल नु ओख्ती ख्रेक्शा वाम फ्रेंशा, आ गधा तारी ङोइक्पाइश्शा, होटेल सम्म लाइश्शा, बास पुंइशा, जचा बाक्चा गेवा बाक्त।
35आ दीसा नाक्ती गाक्चा क्येङा ङोंइती निम्फा आस जशो नु बास ङा नेल्ल थाप्शा, होटेल दाइक्ब कली क्येट गेशा वोइश्शा ‘मेको तुप्चा पुंइसीशो मुर कली रिम्शो पा कोव़ङीने। मसाम सम्म वारच पने। गो लेङङानु, मजाक्दीश्शो क्येट नेल्ल थाप्नन्नी’ दे लोव़ गार पा लमाक्त।
36मेको लां गाक्ब सांमी सु चहिं तुप्शा रोइक्चा पुंइसीशो मुर आ नेक्था ङा मुर दुम्मे?” दे हिल्लो पवा बाक्त।
37मिनु सास्त्रीमी “शिशी पाइब मुर थमा पा आ नेक्था ङा मुर बाक्त” देंमाक्त। मिनु येसुमी “मेको आ खोदेंशो पावो” दे माइश्शा सोइक्ता बाक्त। यूहन्ना १३:१७
38मिनु येसु नु आ शेंसीबपुकी यरूसलेम ङा लां रे गाक्मानु, गाउं कामी जाक्दीम्मा बाक्त। मेकेर मारथा नें पाइश्शो मीश मुर कामी येसु कली मान पा बास गेवा बाक्त। यूहन्ना ११:१
39मारथा आ लोक्ब मरीयम येसु आ खोइल आ नेक्था बाक्शा आ शेंशो नेंना बाक्त।
40मारथामी शुश गेय पा श्येत पशा “प्रभु, आं लोक्बमी आं कली काइ वारच मपाइब। गे मोदेंशो तशा यो मारेइ मदेंनी? मेको कली ‘बोक्शा, इ लोक्ब कली वारच पतो’ दे मतीन” देंमाक्त।
41मिनु येसुमी मारथा कली “मारथा, आं लोव़ नेनो। इ थुंमी ग्येत्थ लुक्च मिम्शा, पीर पाइबाक्ते।
लूका 10
लूका 10:3-41