21जमाहेन्से पत्रुस थेनीगदे मुबा ग्लारी निसी, “च्यागो, एनीगदेसे म्हाइबा म्हि ङानोन हिन्ना। एनीगदे चुरी तिग्दा खबा?” भिसी ङ्योइमा,
22थेनीगदेसे पत्रुसदा “कर्नेलियस भिबा कप्तानसे ङन्दा पुइखबा हिन्ना। थे ज्यबा म्हिदेन परमेश्वरदा तेन्बा म्हि हिन्ना, ओच्छे यहूदीगदे जम्मासेन थेदा मान लमुला। थेला दिमरी ह्राङदा ङ्योइसी ह्राङसे सुङ्बा ताम ङ्यान्गो भिसी परमेश्वरला स्वर्गदूतगदे गिकसे कुल्बा मुला” भिसी भिजी।
23थेतबासेलमा थेनीगदेदा न्हङरी ङ्योइसी पत्रुससे थेनीगदेदा क्योङ्जी। न्हङगरदङ पत्रुस थेनीगदेदेन छ्याम निजी, ओच्छे येशूदा विश्वास लबा योप्पा शहररी मुबा कोइ कोइ म्हिगदेएनोन थेदेन छ्याम निजी।