1मिनु नोले गो ४ जना परमप्रभु यावे आ स्वर्ग ङा गेय पाइबपुकी रागी ङा ४ कुनामी राप्शो तातामी। मेकोपुकी रवा आ सफा काइ यो महिम्पाइक्चा, रागी नु समुन्द्रमी फश मपपाइक्चा कली राप्शो बाक्तेक्म। दानीएल ७:२
2मिनु अर्को परमप्रभु यावे आ स्वर्ग ङा गेय पाइब का नां दाप्तीके रे कुशो ताता। मिनु गेना हना यो ब्रोंइब परमप्रभु यावे आ छाप मेको नु बाक्शो बाक्त। मेकोमी रागी नु समुन्द्र बिग्रेचा कली अधिकार तशो ४ जना परमप्रभु यावे आ स्वर्ग ङा गेय पाइब आन कली ठेयब सेंदामी
3“गोपुकीमी आंइ परमप्रभु यावे आ वाइलीम वाइल आन कुप्फीमी छाप मथोक्शो सम्म रागी, समुन्द्र नु रवा आन कली मबिग्रेने” देंत। प्रकाश ९:४; इजीकीएल ९:४,६
4मिनु गिश मुरपुकी छाप थोक्चा पुंइसीशो बाक्तेक्म देंशा हना, इस्राएली आन १२ थर ङा लाख का ४४ हजार मुर छाप थोक्चा पुंइसीशो बाक्तेक्म। मिनु इस्राएली आन थर ङा तेको तेको बाक्तेक्म देंशा हना, प्रकाश १४:१,३
5यहूदा आ थर रे १२ हजार, रूबेन आ थर रे १२ हजार, गाद आ थर रे १२ हजार,
6आशेर आ थर रे १२ हजार, नाप्ताली आ थर रे १२ हजार, मनस्से आ थर रे १२ हजार,
7सिमियोन आ थर रे १२ हजार, लेवी आ थर रे १२ हजार, इस्साकार आ थर रे १२ हजार,
8जबूलून आ थर रे १२ हजार, योसेफ आ थर रे १२ हजार नु बेन्यामीन आ थर रे १२ हजार मुरपुकी छाप थोक्चा पुंइसीशो बाक्तेक्म।
9मिनु नोले हिक्ने मचाप्चा ङा पा रागी रागी नेल्ल ङा, जात नेल्ल ङा, थर नेल्ल ङा मुर नेल्ल नु लोव़ नेल्ल ङा मुर ठेयब नित्तीकेमी निप्ब नु पाठा आस ङोंइती राप्शो तातामी। मेकोपुकीम बुश वा फेक्शो बाक्तेक्म। मिनु आन गुइमी खजूर रवा आ राशी शेशो तातामी।
10मिनु मेकोपुकीमी परमप्रभु यावे नु पाठा आस कली “मेको ठेयब नित्तीकेमी निप्ब आंइ परमप्रभु यावे नु पाठामी ला पाप रे प्रोंइने चाप्नीस” दे ठेयब सेंदामी ग्रीतेक्म।
11मिनु परमप्रभु यावे आ स्वर्ग ङा गेय पाइब नेल्ले, ठेयब नित्तीके, शेंब खाल्पा नु मेको ४ ओटा सेस जन्तु आन एर ओंथ बाक्तेक्म। मिनु मेको नेल्लेमी ठेयब नित्तीकेमी निश्शो परमप्रभु यावे आ ङोंइती खुम्की पा बाप्शा, परमप्रभु यावे कली मान पाम्तेक्म।
12मेकोपुकीमी “आमेन। नेल्ल आसीक गेचा नु छेङछेङ, जोक्ब तुइक्ब थुं, रिम्शो पाइब, मान सक्ति नु सासन पतीके नेल्ल गेना हना यो आंइ परमप्रभु यावे केन बाक्ल। आमेन” दे नेल्लेमी देंतेक्म।
13मिनु मेको शेंब खाल्पा कामी आं कली “मेको बुश वा फेक्शो मुरपुकी सु नमी? ते रे जाक्मा?” दे हिल्लो पती।
14मिनु गोमी “हजुर, गो मतुइक्नुङ, गे तुइक्नीनी” देंती। मिनु मेको खाल्पामी “मेकोपुकी ठेयब श्येत रे जाक्तेक्म। मिनु मेको आन मरिम्शो पतीके लुम्सीशो वा पाठा आ हुशेमी मुरतीके बुश दुम्त। मत्ती २४:२१; प्रकाश १२:११
15मो दुम्तीके मेकोपुकी परमप्रभु यावे आ ठेयब नित्तीके आ ङोंइती बाक्नीम। मिनु नाक्दो नाक्त परमप्रभु यावे आ खिंमी परमप्रभु यावे कली गेय पाइनीम। मिनु ठेयब नित्तीकेमी निप्बमी मेकोपुकी नु बाक्शा, मेको आन कली कोव़ब।
16मुल मेकोपुकी लेंशा शोव़लु मबेक्नीम। तूतू मदाक्नीम। नां नु अर्को रापमी मेको आन कली गेनायो मनाप्ब। यसैया ४९:१०
17मारदे हना मेको ठेयब नित्तीके आ दातेमी बाक्शो पाठामी मेको आन कली कोव़शा, गोठला पाइब। मिनु मेकोमी मेको आन कली ब्रोंइचा गेब ब्वाक्कु बुक्तीके कोंइब। मोपा परमप्रभु यावेमी मेको आन प्रेक्कु फिक्ब” देंत। भजन संग्रह २३:२; प्रकाश २१:४; यसैया २५:८
