1मिनु गो समुन्द्र रे ७ ओटा पिया नु १० ओटा ग्रोव़ पाइश्शो जन्तु का ग्रूशो ताता। मेको आ १० ओटा ग्रोव़मी १० ओटा मुकुट गुप्शो बाक्तेक्म। आ पियापुकीमी चहिं परमप्रभु कली शुक्शी पाइब नें ब्रेक्शो बाक्तेक्म। दानीएल ७:३-७
2मिनु आं तशो जन्तु जोइ खोदेंशो बाक्त। आ खोइल चहिं वां के खोदेंशो बाक्त। आ शोव़ गुप्स आ शोव़ खोदेंशो बाक्त। मिनु मेको ठेयब बुस्सुमी आ सक्ति आ नित्तीके नु आ ठेयब अधिकार मेको जन्तु कली गेप्तु।
3मिनु मेको जन्तु आ ७ ओटा पिया ङा का साइक्चा ङा पा क्योरशो खोदेंशो ताता। तन्न आ ठेयब गार साशो बाक्त। मिनु रागी रागी ङा मुर नेल्ल मेको जन्तु तशा, छक लाक्शा, आ नोले खोइक्तेक्म।
4ठेयब बुस्सुमी मेको जन्तु कली आ अधिकार गेतीके मुर नेल्लेमी ठेयब बुस्स कली खुम्की पा सेउ पाम्तेक्म। मिनु मेको जन्तु कली यो खुम्की पा “एको जन्तु खोदेंशो ठेयब सु बाक्मे? सु एको नु जिशा ग्राने चाप्बा?” दे सेउ पाम्तेक्म।
5मिनु मेको जन्तु कली ठेयब लेश्शा, ब्वाक्चा नु परमप्रभु आ पर्बम मरिम्शो लोव़ पचा कली शोव़ गेशो बाक्त। मेको कली ४२ महिना सम्म सासन पचा कली अधिकार गेशो बाक्त। प्रकाश ११:२
6मेकोमी परमप्रभु यावे कली मरिम्शो लोव़ पाप्तु। मिनु मेकोमी आ नें आ पर्बम, आ बाक्तीके आ पर्बम नु आ बाक्तीकेमी बाक्ब आन पर्बम यो मरिम्शो लोव़ पाप्तु।
7मेकोमी परमप्रभु यावे आ योव़शो मुरपुकी नु लडाइ पशा, ग्राचा कली अधिकार तशो बाक्त। मिनु मेको कली जात नेल्ल, मुर नेल्ल, आंम आंम लोव़ पाइब नु रागी रागी ङा मुर नेल्ल आन कली सासन पतीके अधिकार यो गेशो बाक्त। प्रकाश ११:७; दानीएल ७:२१
8मिनु सु सु आन नें क्योरशो पाठा आ ब्रोंइतीक किताबमी मब्रेक्शो बाक्मे, मेकोपुकीमी मेको जन्तु कली खुम्की पा सेउ पाइनीम। मेको किताब रागी सेल्चा क्येङा ङोंइती रे बाक्त।
9सु सुमी परमप्रभु यावे आ लोव़ नेंशा, रुम्ने चाप्नीमी, मेकोमी नेन्मेक्ल।
10सु जेल्खानमी लचा योव़सीशो बाक्मे, मेको जेल्खानमी लचा माल्ब। तन्न सुमी तरवारमी साइक्बा, मेको तरवारमी साइक्चा पुंइसीब। मिनु परमप्रभु यावे आ योव़शो मुरपुकीमी श्येत फाल्शो “परमप्रभु यावेमी तुइक्ब” दे थमा सुइश्शा बाक्चा माल्नीम। उत्पत्ती ९:६; मत्ती २६:५२; प्रकाश १४:१२
11मिनु गो खप रे अर्को जन्तु का ग्रूशो ताता। मेको के पाठा के खोदेंशो ग्रोव़ निक्शी बाक्त। मिनु मेकोमी ठेयब बुस्स खोदेंशो पा लोव़ पाइबाक्त।
12ङोंइती ङा जन्तु नु बाक्शा, मेको ङोंइती ङा जन्तु आ अधिकार यो पाइक्बाक्त। मिनु मेकोमी रागी ङा मुर नेल्ल आन कली ङोंइती ङा जन्तु कली सेउ पपाइक्बाक्त। मेको ङोंइती ङा जन्तु चहिं तेको बाक्त देंशा हना, आ बेक्चा ङा गार साशो जन्तु बाक्त।
13मिनु मेको नोले ङा जन्तुमी ठेयब छक लाक्चा ङा गेय पाप्तु। मार छक लाक्चा ङा गेय पाप्तु देंशा हना, मेकोमी मुर आन ङोंइती सरीङ रे मी यिपाइक्तु। मत्ती २४:२४; २थिस्सलोनिकी २:९
14मेकोमी ङोंइती ङा जन्तु नु बाक्शा, आ पशो छक लाक्चा ङा गेयमी मुर आन कली “परमप्रभु आ सक्ति पाइश्शो नङ” दे जोल पा छक लाक्चा ङा गेय पशा, मुर आन कली पाप पपाइक्तु। मार पाप पपाइक्तु देंशा हना, मेकोमी रागी ङा मुर आन कली “गार पाइश्शो जन्तु आ मूर्ति सेल्चा” दे शेंताक्मी।
15मिनु मेकोमी जन्तु आ मूर्ति कली ब्रोंइचा सोक्त गेचा अधिकार यो तशो बाक्त। मिनु मेकोमी सोक्त गेवानु, मेको ब्रोंइतीक सोक्त पाइश्शो मूर्ति लोव़ पचा गोप्तु। मिनु मेको जन्तुमी मूर्ति आ ङोंइती खुम्की पा सेउ मपाइब मुर आन कली साइक्पाइक्तु।
16मिनु मेको जन्तुम मार अर्को गेय पाप्तु देंशा हना, मेकोमी ठेयब नु आइक्च, शोंप पाइश्शो नु प्रुङग, वाइलीम वाइल नु मुर नेल्ल आन कली कि ग्युरा गुइमी कि कुप्फीमी चिन्ड वोइक्पाइक्तु। प्रकाश १९:२०
17मिनु सु सु चिन्ड मपाइश्शो बाक्मा, मेकोपुकीमी मारेइ ग्याप्ने नु लेयने मचबेम। मिनु मेको चिन्ड कि जन्तु आ नें कि आ हिक्तीक चिन्ड बाक्त।
18मेको जन्तु आ नें आ हिक्तीक चिन्ड आ अर्थ मार बाक्मे, दे तुइक्चा कली जोक्ब तुइक्ब थुं माल्ब। जोक्ब मुरुमी जन्तु आ हिक्तीक चिन्ड तुइक्ब, मारदे हना मेको मुर आ हिक्तीक नु गारब। मेको हिक्तीक चहिं ६ सहे ६६ बाक्ब। प्रकाश १५:२
