1नोले गो परमप्रभु यावे आ स्वर्ग ङा गेय पाइब का ताता। मेको सु बाक्त देंशा हना, मेको ङोंइती ङा ७ जना श्येतमी ब्रीशो डप्का कुरबपुकी ङा का बाक्त। मिनु मेकोमी “एके पिवो, गो इ कली ब्वाक्कु तार बाक्ब ठेयब तेल्लेम कली गेशो सजाइ कोंइनन। प्रकाश १५:१
2रागी रागी ङा पिपपुकीमी मेको नु तेल्लेम पाम्तेक्म। मिनु मेको आन तेल्लेम पशो तशा, रागी रागी ङा मुरपुकीमी यो मोदेंशो पाम्तेक्म” दे आं कली देंत।
3मिनु मेकोमी आं कली परमप्रभु यावे आ सोक्तीमी बाक्शा, मुर मबाक्तीकेमी लाइक्ती। मिनु गो मीश मुर का लल जन्तु तारी निश्शो ताता। मेको जन्तु दोदेंशो तांइसाक्व देंशा हना, आ रां नेल्ल परमप्रभु यावे कली मरिम्शो लोव़ ब्रेक्शा वोइश्शो बाक्त। मेको ७ ओटा पिया नु १० ओटा ग्रोव़ पाइश्शो बाक्त।
4मिनु मेको मीश मुर दोदेंशो तांइसाक्व देंशा हना, पिप आन फेक्शो खोदेंशो वा नु लल वा फेक्शो बाक्त। सुन, हीरा नु मोती पांइशो बाक्त। मेकोमी सुन के कचौरा कुरशो बाक्त। मेको कचौरा आ तेल्लेम पतीके, ग्रांग्रा दिचा ङा नु मरिम्शो गेयमी ब्रीशो बाक्त। येरमीया ५१:७
5मिनु मेको आ कुप्फीमी ख्रुइश्शो लोव़मी आ नें ब्रेक्शो बाक्त। मार ब्रेक्शो बाक्त देंशा हना “बेबीलोन ठेयब सहर, तेल्लेमपुकी नु नेल्ल रागी रागी ङा ग्रांग्रा दिचा ङा आन ममा” दे ब्रेक्शो बाक्त।
6मिनु गो मेको मीश मुर कली परमप्रभु यावे आ योव़शो मुर नु येसु आ सांकछी आन हुशेमी दुक्शो ताता। मेको कली तङानु, गो शुश छक लाक्ती। प्रकाश १८:२४
7परमप्रभु यावे आ स्वर्ग ङा गेय पाइबमी चहिं आं कली “गे मारदे छक लाक्ङे? मेको मीश मुर नु मेको आ ङोइश्शो ७ ओटा पिया नु १० ओटा ग्रोव़ पाइश्शो जन्तु आस ख्रुइश्शो लोव़ गो इ कली शेंनुङ।
8इ तशो जन्तु ङोंइती बाक्त, मुल चहिं मबा। तन्न नोले पुं मपाइश्शो ढोडोङगा रे कुशा खतम दुम्ब। रागी सेल्चा रे ङा ब्रोंइतीक किताबमी आन नें मब्रेक्शो मुरपुकी चहिं मेको जन्तु तशा छक लाक्नीम। मारदे हना मेको जन्तु ङोंइती बाक्त, मुल मबा, नोले जाक्ब।
9रुप्ब मुर आन कली एको तुइक्तीके लोव़ बाक्ब। मेको ७ ओटा पिया ७ ओटा डांडा नम। मेको मीश मुर मेको डांडा तार निप्ब। प्रकाश १३:१८
10मिनु मेको ७ ओटा डांडापुकी ७ ओटा पिप यो नम। मेको रे ५ ओटा बेक्शा लाक्तेक्म। मिनु कामी सासन पना पन बाक्ब। अर्को लीशो का चहिं मुल सम्म मजाक्शो बाक्त। मिनु नोले जाक्शा ङा मिन, छिन का ला सासन पाइब।
11मिनु मेको ङोंइती बाक्शो नु मुल मबाक्शो जन्तु चहिं मेको अर्को ७ ओटा पिप आन नोले जाक्शो बाक्ब। मिनु नोले जाक्शो यो, मेको ७ ओटा रे जाक्ब। मिनु मेको नरक लाइब।
12मिनु मेको इ तशो १० ओटा ग्रोव़ चहिं मुल सम्म सासन पचा मतशो १० जना पिप नम। मिनु मेको आन कली नु ठेयब जन्तु कली घन्टा का पिप आन अधिकार गेशो बाक्ब। प्रकाश १३:१
13मेको १० जना पिप थुं का दुम्शा, आन सक्ति नु अधिकार ठेयब जन्तु कली गेनीम।
14मोदेंशो दुम्मेनु, मेकोपुकी पाठा नु लडाइ पाइनीम। मिनु लडाइमी पाठा ग्राब। मारदे पाठा ग्राब देंशा हना, मेको पाठा प्रभु आन प्रभु नु पिप आन पिप बाक्ब। मिनु मेको नु बाक्शोपुकी आ ब्रेश्शो नु योव़शो मुरपुकी बाक्नीमी। मेको नु बाक्बपुकी आ ब्रेश्शो नु योव़शो दीगो पाइब यो बाक्नीमी” दे आं कली देंत। प्रकाश १९:१६; प्रकाश १९:१४
15मिनु मेको परमप्रभु यावे आ स्वर्ग ङा गेय पाइबमी लेंशा “तेल्लेम आ नेक्था ङा शुश ब्वाक्कु, मार बाक्ब देंशा हना, मेको मुरपुकी नम। मिनु मेको शुश मुर आन हुल, रागी रागी ङा मुर नु शुश लोव़ ब्वाक्ब मुर बाक्नीम। यसैया ८:७; येरमीया ४७:२
16मेको इ तशो १० ओटा ग्रोव़ नु मेको ठेयब जन्तु मेको तेल्लेम आ जोरी सत्रु दुम्नीम। मेको कली श्येत गेशा, आ फेक्शो वा प्रुइक्नीम। मिनु आ श्ये ब्वाइनीम। मिनु आ लीशो नेल्ले मीम चोइनीम।
17मारदे मोदेंशो पाइनीम देंशा हना, परमप्रभु यावेमी आ देंशो थमा दुम्पाइक्चा कली मेको आन थुं का दुम्पाइक्तीमी। मिनु मोपा मेको १० जना पिपमी राज्य नु सक्ति ठेयब जन्तु कली गेनीम। परमप्रभु यावे आ लोव़ खाप्चा कली मोदेंशो दुम्ब।
18मिनु इ तशो मीश मुर चहिं ठेयब सहर बाक्ब। मेको रागी रागी ङा पिप आन कली सासन पाइब बाक्ब” दे शेंताक्यी। प्रकाश १८:१०
