3ܐܡܝܼܪܹܗ ܡܵܪܝܵܐ: ”ܩܛܝܼܥ ܠܝܼ ܘܲܥܕܵܐ ܠܓܘܼܒܝܝܼ، ܝܡܹܐ ܠܝܼ ܠܕܵܘܝܼܕ ܪܹܓܝܼ،
4”ܗܲܠܔ ܥܵܠܲܡ ܒܸܬ ܡܲܩܘܹܝܢ ܙܲܪܥܘܼܟ݂، ܘܒܸܬ ܒܵܢܹܝܢ ܠܕܵܪܵܐ ܘܕܵܪܵܐ ܟܘܼܪܣܝܘܼܟ݂.“ ܣܹܠܵܗ
5ܒܸܬ ܫܲܟܪܝܼ ܫܡܲܝܹ̈ܐ ܕܘܼܡܵܪ̈ܘܼܟ݂، ܝܵܐ ܡܵܪܝܵܐ، ܐܘܼܦ ܡܗܘܼܡܢܘܼܬܘܼܟ݂ ܒܟܸܢܫܵܐ ܕܩܲܕܝܼܫܹ̈ܐ.
6ܣܵܒܵܒ ܡܵܢܝܼ ܒܫܡܲܝܵܐ ܦܵܐܹܫ ܡܘܼܕܒܸܩܵܐ ܥܲܡ ܡܵܪܝܵܐ؟ ܡܵܢܝܼ ܕܵܡܹܐ ܠܡܵܪܝܵܐ ܓܵܘ ܒܢܘܿܢܹ̈ܐ ܕܐܲܠܵܗܹ̈ܐ؟
7ܐܲܠܵܗܵܐ ܣܲܗܡܵܢܵܐ ܝܠܹܗ ܪܵܒܵܐ ܓܵܘ ܡܵܘܬܒ݂ܵܐ ܕܩܲܕܝܼܫܹ̈ܐ، ܘܣܲܗܡܵܢܵܐ ܥܲܠܔ ܟܠܵܝܗܝ ܚܵܕܸܪ̈ܘܵܢܘܼܗܝ.
8ܝܵܐ ܡܵܪܝܵܐ ܐܲܠܵܗܵܐ ܚܲܝܠܬܵܢܵܐ، ܡܵܢܝܼ ܝܠܹܗ ܐܲܝܟ݂ ܕܝܼܘܼܟ݂ ܥܲܫܝܼܢܵܐ، ܡܵܪܝܵܐ؟ ܡܗܘܼܡܢܘܼܬܘܼܟ݂ ܒܚܵܕܸܪ̈ܘܵܢܘܼܟ݂.
9ܐܲܢ݇ܬ ܟܹܐ ܥܵܒ݂ܕܹܬ ܫܘܼܠܛܵܢܵܐ ܥܲܠܔ ܪܵܡܘܼܬܵܐ ܕܝܵܡܵܐ، ܟܲܕ ܪܵܝܡܝܼ ܠܲܦܘܼ̈ܗ̇ ܐܲܢ݇ܬ ܟܹܐ ܡܲܫܠܹܝܬ ܠܗܘܿܢ.
10ܐܲܢ݇ܬ ܛܒ݂ܝܼܚ ܠܘܼܟ݂ ܠܪܵܚܵܒ݂ ܐܲܝܟ݂ ܩܛܝܼܠܵܐ، ܒܕܪܲܥܢܵܐ ܕܥܘܼܫܢܘܼܟ݂ ܒܙܝܼܩ ܠܘܼܟ݂ ܕܸܫ̃ܡܸܢܘܼ̈ܟ݂.
11ܕܝܼܘܼܟ݂ ܝܼܠܵܗ̇ ܫܡܲܝܵܐ، ܐܘܼܦ ܕܝܼܘܼܟ݂ ܝܼܠܵܗ̇ ܐܲܪܥܵܐ، ܒܪܝܼܬܵܐ ܘܡܸܠܝܘܼܬܘܼܗ̇ ܐܲܢ݇ܬ ܫܘܼܬܐܸܣܵܝ ܠܘܼܟ݂.
12ܓܲܪܒܝܵܐ ܘܬܲܝܡܢܵܐ ܐܲܢ݇ܬ ܒܸܪܝܵܝ ܠܘܼܟ݂، ܬܵܒ݂ܘܿܪ ܘܚܸܪܡܘܿܢ ܒܫܸܡܘܼܟ݂ ܟܹܐ ܩܲܘܸܚܝܼ.
13ܕܝܼܘܼܟ݂ ܝܼܠܹܗ ܕܪܲܥܢܵܐ ܥܲܡ ܓܲܒܵܪܘܼܬܵܐ، ܚܲܝܠܵܢܬܵܐ ܝܠܵܗ̇ ܐܝܼܕܘܼܟ݂، ܪܵܡܬܵܐ ܝܠܵܗ̇ ܝܲܡܝܼܢܘܼܟ݂.
14ܙܲܕܝܼܩܘܼܬܵܐ ܘܕܝܼܘܵܢ ܫܲܬܐܸܣܬܵܐ ܕܟܘܼܪܣܝܘܼܟ݂، ܛܲܝܒܘܼܬܵܐ ܘܫܪܵܪܵܐ ܟܹܐ ܩܲܕܡܝܼ ܦܵܬܘܼܟ݂.
15ܛܘܼܒ݂ܵܐ ܠܥܲܡܵܐ ܕܝܵܕܥܝܼ ܩܲܘܲܚܬܵܐ ܕܚܲܕܘܼܬܵܐ، ܝܵܐ ܡܵܪܝܵܐ، ܒܒܲܗܪܵܐ ܕܦܵܬܘܼܟ݂ ܟܹܐ ܚܵܕܪܝܼ،
16ܒܫܸܡܘܼܟ݂ ܟܹܐ ܦܵܨܚܝܼ ܟܠܹܗ ܝܵܘܡܵܐ، ܘܒܙܲܕܝܼܩܘܼܬܘܼܟ݂ ܟܹܐ ܪܵܝܡܝܼ.
17ܣܵܒܵܒ ܚܸܩܪܵܐ ܕܥܘܼܫܢܵܝܗܝ ܐܲܢ݇ܬ ܝܼܘܸܬ، ܘܒܨܸܒ݂ܝܵܢܘܼܟ݂ ܟܹܐ ܪܵܐܹܡ ܚܲܝܠܲܢ.
18ܣܵܒܵܒ ܡܵܛܵܠܲܢ ܕܡܵܪܝܵܐ ܝܠܵܗ̇، ܘܡܲܠܟܲܢ ܕܩܲܕܝܼܫܵܐ ܕܐܝܼܣܪܵܐܹܝܠܔ.
19ܗ̇ܝܓܵܗ ܗܘܼܡܙܸܡ ܠܘܼܟ݂ ܒܚܸܙܘܵܐ ܥܲܡ ܙܲܕܝܼܩܘܼ̈ܟ݂، ܘܐܡܝܼܪܘܼܟ݂: ”ܝܘܼܗܒܹܠܔ ܠܝܼ ܗܲܝܲܪܬܵܐ ܠܓܲܒܵܪܵܐ، ܡܘܼܪܸܡ ܠܝܼ ܓܘܼܒܝܵܐ ܡ̣ܢ ܓܵܘ ܥܲܡܵܐ.
20”ܡܘܼܫ݇ܟ̰ܸܚ ܠܝܼ ܠܕܵܘܝܼܕ ܪܹܓܝܼ، ܒܡܸܫܚܵܐ ܕܩܘܼܕܫܝܼ ܩܵܡ ܡܵܫܚܹܢܹܗ.
21”ܐܝܼܕܝܼ ܒܸܬ ܗܵܘܝܵܐ ܡܩܵܘܝܵܢܬܵܐ ܥܲܡܹܗ، ܐܘܼܦ ܕܪܲܥܢܝܼ ܒܸܬ ܚܲܠܸܢ ܐܸܠܹܗ.
22”ܠܹܐ ܥܲܠܕܹܐ ܕܸܫ̃ܡܸܢ ܐܸܠܹܗ، ܘܒܪܘܿܢܵܐ ܕܥܵܘܠܵܐ ܠܹܐ ܡܲܠܝܸܨ ܠܹܗ.
23”ܒܸܬ ܛܵܒ݂ܚܹܢ ܡ̣ܢ ܩܲܕܡܘܼܗܝ ܕܸܫ̃ܡܸܢܘܼ̈ܗܝ، ܘܣܵܢܝܵܢܘܼ̈ܗܝ ܒܸܬ ܡܵܚܹܝܢ.
24”ܡܗܘܼܡܢܘܼܬܝܼ ܘܛܲܝܒܘܼܬܝܼ ܥܲܡܹܗ ܒܸܬ ܗܵܘܝܼ، ܘܒܫܸܡܝܼ ܒܸܬ ܪܵܐܹܡ ܚܲܝܠܹܗ.
25”ܒܸܬ ܡܲܬܒܸܢ ܒܝܵܡܵܐ ܐܝܼܕܹܗ، ܘܒܢܲܗܪ̈ܵܘܵܬܹܐ ܝܲܡܝܼܢܹܗ.
26”ܗ̇ܘ ܒܸܬ ܩܵܪܹܐ ܠܝܼ: ’ܒܵܒܝܼ ܝܘܸܬ ܐܲܢ݇ܬ، ܐܲܠܵܗܝܼ ܘܐܝܼܨܵܪܵܐ ܕܦܘܼܪܩܵܢܝܼ.‘
27”ܐܘܼܦ ܐܵܢܵܐ ܒܘܼܟ݂ܪܵܐ ܒܸܬ ܥܵܒ݂ܕܹܢܹܗ، ܥܸܠܵܝܵܐ ܥܲܠܔ ܡܲܠܟܹ̈ܐ ܕܐܲܪܥܵܐ.
28”ܠܥܵܠܲܡ ܒܸܬ ܢܵܛܪܹܢ ܩܵܐ ܕܝܼܹܗ ܛܲܝܒܘܼܬܝܼ، ܘܘܲܥܕܝܼ ܒܸܬ ܦܵܐܹܫ ܡܘܼܩܘܝܼܵܐ ܐܸܠܹܗ.
29”ܒܸܬ ܡܲܬܒܸܢ ܠܥܵܠܲܡ ܙܲܪܥܹܗ، ܘܟܘܼܪܣܝܹܗ ܐܲܝܟ݂ ܝܵܘܡܵܢܹ̈ܐ ܕܫܡܲܝܵܐ.
30”ܐܸܢ ܫܵܒ݂ܩܝܼ ܒܢܘܿܢܘܼ̈ܗܝ ܢܵܡܘܿܣܝܼ، ܘܒܕܝܼܘܵܢܝܼ̈ ܠܵܐ ܚܵܕܪܝܼ،
31”ܐܸܢ ܩܵܢܘܿܢܝܼ ܟ̰ܲܦܠܸܢܝܼ، ܘܦܘܼܩܕܵܢܝܼ̈ ܠܵܐ ܢܵܛܪܝܼ،
32”ܒܸܬ ܣܲܚܒܸܪܸܢ ܒܩܵܛܝܼܵܐ ܓܢܵܗܵܝܗܝ، ܘܒܡܲܚܘܵܬܹ̈ܐ ܥܵܘܠܵܝܗܝ.
33”ܐܝܼܢܵܐ ܛܲܝܒܘܼܬܝܼ ܠܹܐ ܩܵܛܥܹܢ ܡܸܢܹܗ، ܘܠܹܐ ܕܲܓܠܸܢ ܥܲܠܔ ܡܗܘܼܡܢܘܼܬܝܼ،
34”ܠܹܐ ܟ̰ܲܦܠܸܢܸܢ ܘܲܥܕܝܼ، ܘܡܸܢܕܝܼ ܕܦܠܝܼܛ ܠܹܗ ܡ̣ܢ ܣܸܦܘܵܬܝܼ̈ ܠܹܐ ܫܲܚܠܸܦܸܢ.
35”ܚܕܵܐ ܓܵܗܵܐ ܝܡܹܐ ܠܝܼ ܒܩܘܼܕܫܝܼ، ܠܹܐ ܕܲܓܠܸܢ ܠܕܵܘܝܼܕ.
36”ܙܲܪܥܹܗ ܠܥܵܠܲܡ ܒܸܬ ܗܵܘܹܐ، ܘܟܘܼܪܣܝܹܗ ܐܲܝܟ݂ ܫܸܡܫܵܐ ܠܒܲܠܩܘܼܒ݂ܠܝܼ.
37”ܐܲܝܟ݂ ܣܲܗܪܵܐ ܒܸܬ ܩܵܘܹܐ ܠܥܵܠܲܡ، ܘܣܵܗܕܵܐ ܒܫܡܲܝܵܐ ܡܗܘܼܡܢܵܐ.“ ܣܹܠܵܗ
38ܐܝܼܢܵܐ ܐܲܢ݇ܬ، ܪܘܼܦܹܐ ܠܘܼܟ݂ ܘܡܘܼܣܠܹܐ ܠܘܼܟ݂، ܟܪܝܼܒ ܠܘܼܟ݂ ܥܲܠܔ ܡܫܝܼܚܘܼܟ݂.
39ܣܪܝܼܒ݂ ܠܘܼܟ݂ ܘܲܥܕܵܐ ܕܪܹܓܘܼܟ݂، ܟ̰ܘܼܦܠܸܢܘܼܟ݂ ܥܲܠܔ ܐܲܪܥܵܐ ܒܸܢܦܵܪܹܗ.
40ܬܪܝܼܥ ܠܘܼܟ݂ ܠܟܠܵܝܗܝ ܣܝܵܓ݂ܘܼ̈ܗܝ، ܥܒ݂ܝܼܕ ܠܘܼܟ݂ ܩܲܠܥܵܬܘܼ̈ܗܝ ܚܵܪܵܒܵܐ.
41ܣܠܝܼܒ ܠܗܘܿܢ ܐܸܠܹܗ ܟܠܵܝܗܝ ܥܵܒ݂ܪ̈ܵܢܹܐ ܕܐܘܼܪܚܵܐ، ܗܘܹܐ ܠܹܗ ܠܵܘܡܵܐ ܠܫܒ݂ܵܒ݂ܘܼ̈ܗܝ.
42ܡܘܼܪܸܡ ܠܘܼܟ݂ ܝܲܡܝܼܢܵܐ ܕܡܲܠܝܸܨܵܢܘܼ̈ܗܝ، ܡܘܼܚܕܹܐ ܠܘܼܟ݂ ܟܠܵܝܗܝ ܕܸܫ̃ܡܸܢܘܼ̈ܗܝ.
43ܐܘܼܦ ܡܘܼܚܕܸܪܘܼܟ݂ ܚܸܪܦܵܐ ܕܣܲܝܦܹܗ، ܘܠܵܐ ܡܘܼܩܘܹܐ ܠܘܼܟ݂ ܐܸܠܹܗ ܓܵܘ ܦܠܵܫܵܐ.
44ܡܘܼܟܠܹܐ ܠܘܼܟ݂ ܠܙܲܗܝܘܼܬܹܗ، ܘܟܘܼܪܣܝܹܗ ܠܐܲܪܥܵܐ ܚܘܼܪܙܸܦ ܠܘܼܟ݂.
45ܡܘܼܟܪܹܐ ܠܘܼܟ݂ ܝܵܘܡܵܢܹ̈ܐ ܕܥܠܲܝܡܘܼܬܹܗ، ܡܘܼܟܸܣ ܠܘܼܟ݂ ܥܲܠܘܼܗܝ ܢܟ݂ܝܼܦܬܵܐ. ܣܹܠܵܗ
46ܗܲܠܔ ܐܝܼܡܲܢ، ܝܵܐ ܡܵܪܝܵܐ، ܒܸܬ ܛܲܫܹܝܬ ܓܵܢܘܼܟ݂ ܠܥܵܠܲܡ؟ ܒܸܬ ܠܵܗܝܵܐ ܐܲܝܟ݂ ܢܘܼܪܵܐ ܚܸܡܬܘܼܟ݂؟
47ܕܟ݂ܘܿܪ ܡܘܼܕܝܼ ܝܠܹܗ ܡܸܬܚܵܐ ܕܚܲܝܝܼ̈، ܒܘܼܬ ܡܘܼܕܝܼ ܣܪܝܼܩܘܼܬܵܐ ܒܪܹܐ ܠܘܼܟ݂ ܠܟܠܵܝܗܝ ܒܢܲܝ̈ܢܵܫܵܐ؟
48ܡܵܢܝܼ ܝܠܹܗ ܓܲܒ݂ܪܵܐ ܕܚܵܝܹܐ ܘܠܵܐ ܚܵܙܹܐ ܡܵܘܬܵܐ، ܕܚܲܠܹܨ ܠܵܗ̇ ܓܵܢܹܗ ܡ̣ܢ ܐܝܼܕܵܐ ܕܫܝܘܿܠܔ؟ ܣܹܠܵܗ
ܡܙܡܘܪ̈ܐ 89
ܡܙܡܘܪ̈ܐ 89:3-48