ܡܙܡܘܪ̈ܐ 68:1-27

¹ܟܹܐ ܩܵܐܹܡ ܐܲܠܵܗܵܐ، ܟܹܐ ܒܲܪܒܸܙܝܼ ܕܸܫ̃ܡܸܢܘܼ̈ܗ‌ܝ، ܘܥܵܪܩܝܼ ܣܵܢܝܵܢܘܼ̈ܗ‌ܝ ܡ̣ܢ ܩܲܕܡܘܼܗ‌ܝ.

²ܐܲܝܟ݂ ܕܦܵܐܹܫ ܒܘܼܪܒܸܙܵܐ ܬܸܢܵܐ ܒܲܪܒܸܙܸܬ ܠܗܘܿܢ، ܐܲܝܟ݂ ܕܦܵܫܪܵܐ ܫܲܡܲܥ ܡ̣ܢ ܩܲܕܡ ܢܘܼܪܵܐ، ܛܵܠܩܝܼ ܪ̈ܲܫܝܼܥܹܐ ܡ̣ܢ ܩܲܕܡ ܐܲܠܵܗܵܐ.

³ܐܝܼܢܵܐ ܙܲܕܝܼܩܹ̈ܐ ܚܵܕܝܼ ܘܦܵܨܚܝܼ ܩܲܕܡ ܐܲܠܵܗܵܐ، ܘܗܵܘܝܼ ܦܨܝܼܚܹܐ ܒܚܲܕܘܼܬܵ‌ܐ.

⁴ܫܲܒܚܘܼܢ ܠܐܲܠܵܗܵܐ، ܙܡܘܿܪܘܼܢ ܫܸܡܹܗ، ܡܲܪܡܘܼܢ ܠܪܲܟܵܒ݂ܵܐ ܒܕܸܫܝܵܬܹ̈‌ܐ، ܡܵܪܝܵܐ ܝܠܹܗ ܫܸܡܹܗ، ܘܦܨܘܿܚܘܼܢ ܩܲܕܡܘܼܗ‌ܝ.

⁵ܒܵܒܵܐ ܕܝܲܬܘܼܡܹ̈ܐ ܘܥܵܒ݂ܕܵܢܵܐ ܕܕܝܼܘܵܢ ܕܐܲܪ̈ܡܸܠܝܵܬܹ‌ܐ، ܐܲܠܵܗܵܐ ܒܡܲܥܡܪܵܐ ܕܩܘܼܕܫܹܗ.

⁶ܐܲܠܵܗܵܐ ܟܹܐ ܡܲܬܸܒ݂ ܒܒܲܝܬܵ‌ܐ ܠܐܵܢܝܼ ܕܝܼܢܵܐ ܒܢܲܦ̮ܫܵܝܗ‌ܝ، ܟܹܐ ܦܲܠܸܛ ܐܲܣܝܼܪܹ̈ܐ ܠܟܲܫܝܼܪܘܼܬܵ‌ܐ، ܐܝܼܢܵܐ ܡܵܪ̈ܘܿܕܹܐ ܟܹܐ ܥܵܡܪܝܼ ܒܐܲܪܥܵܐ ܨܗܝܼܬܵ‌ܐ.

⁷ܝܵܐ ܐܲܠܵܗܵܐ، ܟܲܕ ܦܠܝܼܛ ܠܘܼܟ݂ ܩܲܕܡ ܥܲܡܘܼܟ݂، ܒܦܣܵܥܬܘܼܟ݂ ܓܵܘ ܒܲܪܝܼܵܐ، ܣܹܠܵܗ

⁸ܐܲܪܥܵܐ ܫܥܝܼܫ ܠܵܗ̇، ܐܘܼܦ ܫܡܲܝܹ̈ܐ ܡܘܼܢܛܸܦ ܠܗܘܿܢ ܡܸܛܪܵܐ ܩܲܕܡ ܐܲܠܵܗܵܐ، ܐܲܠܵܗܵܐ ܕܐܵܗܵܐ ܣܝܼܢܲܝ؛ ܡ̣ܢ ܩܲܕܡ ܐܲܠܵܗܵܐ، ܐܲܠܵܗܵܐ ܕܐܝܼܣܪܵܐܹܝܠܔ.

⁹ܡܸܛܪܵܐ ܕܨܸܒ݂ܝܵܢܵܐ ܡܘܼܫܦܸܟ݂ ܠܘܼܟ݂، ܝܵܐ ܐܲܠܵܗܵܐ، ܠܝܵܪܬܘܼܬܘܼܟ݂ ܟܲܕ ܢܘܝܼܠܔ ܠܵܗ̇ ܐܲܢ݇ܬ ܬܘܼܪܣܝܼܵܐ ܠܘܼܟ݂.

¹⁰ܦܸܣܩܘܼܟ݂ ܝܬܝܼܒ݂ ܠܗܘܿܢ ܓܵܘܘܼܗ̇، ܬܘܼܪܣܹܐ ܠܘܼܟ݂ ܒܛܲܝܒܘܼܬܘܼܟ݂ ܠܡܸܣܟܹܢܹ̈ܐ، ܝܵܐ ܐܲܠܵܗܵܐ.

¹¹ܡܵܪܝܵܐ ܟܹܐ ܝܵܗܒܹܠܔ ܦܘܼܩܕܵܢܵܐ، ܘܒܲܟ݂ܬܵܬܹ̈‌ܐ ܕܡܲܫܚܸܕܝܼ ܠܹܗ ܚܲܝܠܵܐ ܓܘܼܪܵܐ ܝܢܵܐ.

¹²ܡܲܠܟܹ̈ܐ ܕܚܲܝܠܵܘܵܬܹ̈‌ܐ ܟܹܐ ܥܵܪܩܝܼ، ܟܹܐ ܥܵܪܩܝܼ، ܘܥܵܡܪܵܢܬܵ‌ܐ ܕܒܲܝܬܵ‌ܐ ܟܹܐ ܦܲܠܥܵܐ ܣܠܵܒܬܵ‌ܐ.

¹³ܐܵܦܸܢ ܕܕܵܡܟ݂ܝܼܬܘܿܢ ܒܓܵܘܵܐ ܕܓܘܼܡܵܢܹ̈ܐ، ܓܘܼܠܦܵܢܹ̈ܐ ܕܝܵܘܢܵܐ ܩܪܝܼܡܹܐ ܝܢܵܐ ܒܣܹܐܡܵܐ، ܘܦܲܪ̈ܘܼܗ̇ ܒܕܲܗܒ݂ܵܐ ܡܲܙܪܘܼܟ̰ܹܐ ܩܝܼܢܵܐ.

¹⁴ܟܲܕ ܒܘܼܪܒܸܙ ܠܹܗ ܐܹܝܠܔ ܫܲܕܲܝ ܡܲܠܟܹ̈ܐ ܓܵܘܘܼܗ̇، ܒܸܥܪܵܝܵܐ ܝܗܘܵܐ ܬܲܠܓܵܐ ܓܵܘ ܨܲܠܡܘܿܢ.

¹⁵ܛܘܼܪܵܐ ܕܐܲܠܵܗܵܐ ܛܘܼܪܵܐ ܕܒܲܝܫܵܢ ܝܼܠܹܗ، ܛܘܼܪܵܐ ܡܵܪܹܐ ܩܲܪ̈ܩܲܦܝܵܬܹ‌ܐ ܝܠܹܗ ܛܘܼܪܵܐ ܕܒܲܝܫܵܢ.

¹⁶ܝܵܐ ܛܘܼܪ̈ܵܢܹܐ ܡܵܪܹܐ ܩܲܪ̈ܩܲܦܝܵܬܹ‌ܐ، ܩܵܡܘܿܕܝܼ ܚܵܝܪܝܼܬܘܿܢ ܒܥܲܝܢܵܐ ܕܒܲܚܲܠܬܵ‌ܐ ܠܛܘܼܪܵܐ ܕܒܣܝܼܡ ܠܵܗ̇ ܠܹܗ ܐܲܠܵܗܵܐ ܠܸܬܝܵܒ݂ܵܐ ܓܵܘܹܗ، ܐܘܼܦ ܠܥܵܠܲܡ ܡܵܪܝܵܐ ܒܸܬ ܫܵܪܹܐ ܓܵܘܹܗ.

¹⁷ܡܲܪ̈ܟܒ݂ܵܬܹ‌ܐ ܕܐܲܠܵܗܵܐ ܬܲܪܬܹܝ ܪܸ̈ܒܘܵܬܹ‌ܐ ܝܢܵܐ، ܐܲܠܦܹ̈ܐ ܥܲܠܔ ܐܲܠܦܹ̈ܐ، ܡܵܪܝܵܐ ܕܣܝܼܢܲܝ ܒܓܵܘܵܝܗ‌ܝ ܝܠܹܗ ܒܩܲܕܝܼܫܘܼܬܵ‌ܐ.

¹⁸ܐܣܝܼܩ ܠܘܼܟ݂ ܠܡܪܵܘܡܵܐ، ܠܘܼܒܸܠܔ ܠܘܼܟ݂ ܐܲܣܝܼܪܹ̈ܐ ܠܐܲܣܝܼܪܘܼܬܵ‌ܐ، ܫܩܝܼܠܔ ܠܘܼܟ݂ ܡܵܘܗܒ݂ܵܬܹ̈‌ܐ ܡ̣ܢ ܒܢܲܝ̈ܢܵܫܵܐ، ܘܐܘܼܦ ܡ̣ܢ ܡܵܪ̈ܘܿܕܹܐ، ܕܫܵܪܹܐ ܡܵܪܝܵܐ ܐܲܠܵܗܵܐ ܬܵܡܵܐ.

¹⁹ܒܪܝܼܟ݂ܵܐ ܝܠܹܗ ܡܵܪܝܵܐ، ܝܵܘܡܵܐ ܒܝܵܘܡܵܐ ܟܹܐ ܛܵܥܹܢ ܝܘܼܩܪܲܢ، ܐܲܠܵܗܵܐ ܕܦܘܼܪܩܵܢܲܢ. ܣܹܠܵܗ

²⁰ܐܲܠܵܗܵܐ ܐܸܠܲܢ ܐܲܠܵܗܵܐ ܕܦܘܼܪ̈ܩܵܢܹܐ ܝܠܹܗ، ܘܕܐܲܠܵܗܵܐ ܡܵܪܝܵܐ ܝܢܵܐ ܦܠܵܛܹ̈ܐ ܡ̣ܢ ܡܵܘܬܵ‌ܐ.

²¹ܒܫܪܵܪܵܐ ܐܲܠܵܗܵܐ ܒܸܬ ܒܵܠܹܣ ܪܹܝܫܵܐ ܕܕܸܫ̃ܡܸܢܘܼ̈ܗ‌ܝ، ܩܲܪܩܲܦܬܵ‌ܐ ܡܸܙܬܵܢܬܵ‌ܐ ܕܚܵܕܪܵܢܵܐ ܒܓܢܵܗܘܼ̈ܗ‌ܝ.

²²ܐܡܝܼܪܹܗ ܡܵܪܝܵܐ: ”ܡ̣ܢ ܒܲܝܫܵܢ ܒܸܬ ܡܲܕܸܪܸܢܗܘܿܢ، ܒܸܬ ܡܲܕܸܪܸܢܗܘܿܢ ܡ̣ܢ ܥܘܼܡܩܹ̈ܐ ܕܝܵܡܵܐ،

²³”ܩܵܐ ܕܒܵܠܣܵܐ ܠܗܘܿܢ ܐܲܩܠܘܼܟ݂ ܒܕܸܡܵܐ، ܘܠܸܫܵܢܹ̈ܐ ܕܟܲܠܒܘܼ̈ܟ݂ ܩܲܒܠܝܼ ܣܵܗܡܵܝܗ‌ܝ ܡ̣ܢ ܕܸܫ̃ܡܸܢܹ̈ܐ.“

²⁴ܚܙܹܐ ܠܗܘܿܢ ܙܘܼܝܵܚܘܼ̈ܟ݂، ܝܵܐ ܐܲܠܵܗܵܐ، ܙܘܼܝܵܚܹ̈ܐ ܕܐܲܠܵܗ‌ܝܼ ܡܲܠܟܝܼ ܒܒܹܝܬ ܩܘܼܕܫܵܐ.

²⁵ܩܘܼܕܸܡ ܠܗܘܿܢ ܙܲܡܵܪܹ̈ܐ، ܒܵܬܪܵܝܗ‌ܝ ܡܵܚܝܵܢܹ̈ܐ ܕܩܝܼܬܵܪܹ̈ܐ، ܒܓܵܘܵܐ ܕܥܠܲܝܡܵܬܹ̈‌ܐ ܡܵܚܝܵܢܹ̈ܐ ܕܦܠܲܓܹ̈ܐ.

²⁶ܓܵܘ ܟܢܘܼܫܝܹ̈ܐ ܒܲܪܟ݂ܘܼܢ ܠܐܲܠܵܗܵܐ، ܒܲܪܟ݂ܘܼܢ ܠܡܵܪܝܵܐ، ܐܲܚܬܘܿܢ ܕܡ̣ܢ ܡܲܒܘܼܥܵܐ ܕܐܝܼܣܪܵܐܹܝܠܔ.

²⁷ܬܵܡܵܐ ܝܠܹܗ ܒܸܢܝܵܡܹܝܢ ܙܥܘܿܪܵܐ، ܫܲܠܝܼܛܵܝܗ‌ܝ، ܓܘܼܪ̈ܵܢܹܐ ܕܝܼܗܘܼܕܵܐ ܒܟܸܢܫܵܝ̈ܗ‌ܝ، ܓܘܼܪ̈ܵܢܹܐ ܕܙܒ݂ܘܿܠܘܿܢ ܘܓܘܼܪ̈ܵܢܹܐ ܕܢܲܦ̮ܬܵܠܝܼ.