8”ܒܘܼܬ ܕܸܒ݂ܚܘܼ̈ܟ݂ ܠܹܐ ܡܲܢܟܸܣܸܢܘܼܟ݂، ܝܲܢ ܒܘܼܬ ܕܸܒ݂ܚܘܼ̈ܟ݂ ܡܘܼܩܕܹ̈ܐ ܕܝܼܢܵܐ ܠܒܲܠܩܘܼܒ݂ܠܝܼ ܐܲܡܝܼܢܵܐܝܼܬ.
9”ܠܹܐ ܫܵܩܠܹܢ ܡ̣ܢ ܒܲܝܬܘܼܟ݂ ܬܵܘܪܵܐ، ܠܵܐ ܡ̣ܢ ܓܘܼܡܵܢܘܼ̈ܟ݂ ܢܹܐܪ̈ܝܼܹܐ.
10”ܣܵܒܵܒ ܕܝܼܝܼ ܝܢܵܐ ܟܠܵܝܗܝ ܚܲܝܘܵܬܹ̈ܐ ܕܥܵܒ݂ܵܐ، ܘܒܥܝܼܪܹ̈ܐ ܕܒܐܲܠܦܵܐ ܛܘܼܪ̈ܵܢܹܐ.
11”ܟܹܐ ܝܵܕܥܹܢ ܠܟܠܵܗ̇ ܦܵܪܲܚܬܵܐ ܕܛܘܼܪ̈ܵܢܹܐ، ܘܓ̰ܵܘܓ̰ܵܢܹ̈ܐ ܕܕܸܫܬܵܐ ܥܲܡܝܼ ܝܢܵܐ.
12”ܐܸܢ ܟܵܦܢܹܢ ܗܘܵܐ ܠܹܐ ܐܵܡܪܹܢ ܗܘܵܐ ܐܸܠܘܼܟ݂، ܣܵܒܵܒ ܕܝܼܝܼ ܝܠܵܗ̇ ܒܪܝܼܬܵܐ ܘܡܸܠܝܘܼܬܘܼܗ̇.
13”ܗܵܐ، ܒܸܬ ܐܵܟ݂ܠܹܢ ܒܸܣܪܵܐ ܕܡܘܼܓ̰ܹ̈ܐ، ܘܫܵܬܹܝܢ ܕܸܡܵܐ ܕܢܹܐܪ̈ܝܼܹܐ؟
14”ܕܒ݂ܘܿܚ ܠܐܲܠܵܗܵܐ ܫܲܟܲܪܬܵܐ، ܘܬܲܡܸܡ ܠܥܸܠܵܝܵܐ ܢܸܕܪ̈ܘܼܟ݂.
15”ܘܩܪܝܼ ܐܸܠܝܼ ܒܝܵܘܡܵܐ ܕܐܘܼܠܨܵܢܵܐ، ܒܸܬ ܦܲܨܸܢܘܼܟ݂ ܘܒܸܬ ܡܝܲܩܪܸܬ ܠܝܼ.“
16ܐܝܼܢܵܐ ܠܪܲܫܝܼܥܵܐ ܒܹܐܡܵܪܵܐ ܝܠܹܗ ܐܲܠܵܗܵܐ: ”ܡܵܐ ܠܘܼܟ݂ ܠܗܲܩܘܼܝܹܐ ܩܵܢܘܿܢܝܼ̈، ܘܠܸܫܩܵܠܵܐ ܘܲܥܕܝܼ ܒܦܘܼܡܘܼܟ݂؟
17”ܣܵܒܵܒ ܐܲܢ݇ܬ ܣܢܹܐ ܠܘܼܟ݂ ܬܲܥܠܲܡܬܵܐ، ܘܪܘܼܦܹܐ ܠܘܼܟ݂ ܗܹܡܸܙܡܵܢܝܼ̈ ܒܵܬܪܘܼܟ݂.
18”ܐܸܢ ܚܙܹܐ ܠܘܼܟ݂ ܓܹܢܵܒ݂ܵܐ، ܟܹܐ ܒܵܣܡܵܐ ܠܘܼܟ݂ ܒܝܼܹܗ، ܘܥܲܡ ܓܲܝܵܪܹ̈ܐ ܝܠܹܗ ܣܵܗܡܘܼܟ݂.