ܡܙܡܘܪ̈ܐ 37:23-37

²³ܡ̣ܢ ܡܵܪܝܵܐ ܟܹܐ ܦܵܝܫܝܼ ܡܘܼܩܘܝܼܹܐ ܦܵܣܘܿܥܝܵܬܹ̈‌ܐ ܕܐܢܵܫܵܐ، ܘܒܐܘܼܪܚܹܗ ܟܹܐ ܒܵܣܡܵܐ ܠܹܗ.

²⁴ܐܵܦܸܢ ܢܵܦܹܠܔ، ܠܹܐ ܦܵܐܹܫ ܟ̰ܘܼܡܟ̰ܸܡܵܐ، ܣܵܒܵܒ ܡܵܪܝܵܐ ܟܹܐ ܣܵܢܹܕ ܐܝܼܕܹܗ.

²⁵ܝܵܠܵܕ݇ܐ ܗܘܹܐ ܠܝܼ ܐܘܼܦ ܣܝܼܒ݂ ܠܝܼ، ܐܝܼܢܵܐ ܠܵܐ ܚܙܹܐ ܠܝܼ ܙܲܕܝܼܩܵܐ ܫܒ݂ܝܼܩܵܐ، ܝܲܢ ܙܲܪܥܹܗ ܛܵܥܹܐ ܠܲܚܡܵܐ.

²⁶ܟܠܹܗ ܝܵܘܡܵܐ ܡܪܲܚܡܵܢܵܐ ܝܠܹܗ ܘܟܹܐ ܝܵܗܒܹܠܔ ܕܲܝܢܵܐ، ܘܠܒܘܼܪܟܬܵ‌ܐ ܝܢܵܐ ܙܲܪ̈ܥܘܼܗ‌ܝ.

²⁷ܩܠܘܿܒ ܡ̣ܢ ܒܝܼܫܬܵ‌ܐ ܘܥܒ݂ܘܿܕ ܛܵܒ݂ܬܵ‌ܐ، ܘܥܡܘܿܪ ܠܥܵܠܲܡ.

²⁸ܣܵܒܵܒ ܡܵܪܝܵܐ ܟܹܐ ܡܲܚܸܒ ܕܝܼܘܵܢ، ܘܠܹܐ ܫܵܒܹܩ ܠܛܵܒ݂ܘܼ̈ܗ‌ܝ، ܠܥܵܠܲܡ ܟܹܐ ܦܵܝܫܝܼ ܢܛܝܼܪܹܐ، ܐܝܼܢܵܐ ܙܲܪܥܵܐ ܕܪ̈ܲܫܝܼܥܹܐ ܒܸܬ ܦܵܐܹܫ ܩܛܝܼܥܵܐ.

²⁹ܙܲܕܝܼܩܹ̈ܐ ܒܸܬ ܝܵܪܬ‌ܝܼ ܐܲܪܥܵܐ، ܘܒܸܬ ܫܵܪܝܼ ܠܥܵܠܲܡ ܥܲܠܘܼܗ̇.

³⁰ܦܘܼܡܵܐ ܕܙܲܕܝܼܩܵܐ ܟܹܐ ܗܲܓܹܐ ܚܸܟ݂ܡܬܵ‌ܐ، ܘܠܸܫܵܢܹܗ ܟܹܐ ܗܲܡܙܸܡ ܕܝܼܘܵܢ.

³¹ܢܵܡܘܿܣܵܐ ܕܐܲܠܵܗܹܗ ܒܠܸܒܹܗ ܝܠܹܗ، ܠܹܐ ܫܵܥܫܝܼ ܦܵܣܘܿܥܝܵܬܘܼ̈ܗ‌ܝ.

³²ܟܹܐ ܩܲܙܸܕ ܒܝܼܫܵܐ ܠܙܲܕܝܼܩܵܐ، ܘܟܹܐ ܛܵܥܹܐ ܠܡܲܡܝܘܼܬܹܗ.

³³ܐܝܼܢܵܐ ܡܵܪܝܵܐ ܠܹܐ ܫܵܒܹܩ ܠܹܗ ܒܐܝܼܕܹܗ، ܘܠܹܐ ܥܵܒܹܕ ܠܹܗ ܚܲܝܵܒ݂ܵܐ ܐܝܼܡܲܢ ܕܦܵܐܹܫ ܕܝܼܢܵܐ.

³⁴ܣܦܘܿܪ ܠܡܵܪܝܵܐ ܘܢܛܘܿܪ ܐܘܼܪܚܹܗ، ܘܒܸܬ ܡܲܪܸܡ ܠܘܼܟ݂ ܕܝܵܪܬܹܬ ܐܲܪܥܵܐ، ܐܝܼܡܲܢ ܕܦܵܝܫܝܼ ܩܛܝܼܥܹܐ ܪ̈ܲܫܝܼܥܹܐ ܒܸܬ ܚܵܙܹܝܬ.

³⁵ܚܙܹܐ ܠܝܼ ܪܲܫܝܼܥܵܐ ܙܵܠܝܼܡ ܓܲܪܘܘܼܣܘܼܗ̇ ܓܵܢܹܗ ܐܲܝܟ݂ ܐܝܼܠܵܢܵܐ ܩܝܼܢܵܐ ܒܐܲܪܥܹܗ ܟܝܵܢܵܝܬܵ‌ܐ.

³⁶ܘܫܘܼܢܹܐ ܠܹܗ، ܘܗܵܐ ܠܲܝܬ، ܘܛܥܹܐ ܠܝܼ ܒܵܬܪܹܗ، ܐܝܼܢܵܐ ܠܵܐ ܡܫ݇ܟ̰ܝܼܚ ܠܹܗ.

³⁷ܓܲܫܸܩ ܠܬܲܡܝܼܡܵܐ ܘܚܙܝܼ ܠܬܪܘܼܨܵܐ، ܣܵܒܵܒ ܐܝܼܬ ܕܲܥܬܝܼܕ ܩܵܐ ܐܢܵܫܵܐ ܕܫܠܵܡܵܐ.