ܡܙܡܘܪ̈ܐ 119:37-129

³⁷ܡܲܥܒܸܪ ܥܲܝܢܝܼ̈ ܡ̣ܢ ܠܸܚܙܵܝܵܐ ܣܪܝܼܩܘܼܬܵ‌ܐ، ܒܐܘܼܪܚܘܼܟ݂ ܡܲܚܝܼ ܠܝܼ.

³⁸ܡܲܩܘܝܼ ܗܹܡܸܙܡܵܢܘܼܟ݂ ܠܪܹܓܘܼܟ݂، ܗ̇ܝ ܕܝܼܠܵܗ̇ ܕܙܵܕܹܥ ܡܸܢܘܼܟ݂.

³⁹ܡܲܥܒܸܪ ܡܸܢܝܼ ܠܵܘܡܝܼ ܕܟܹܐ ܙܵܕܥܹܢ ܡܸܢܹܗ، ܒܗ̇ܝ ܕܕܝܼܘܵܢܘܼ̈ܟ݂ ܛܵܒܹ̈ܐ ܝܢܵܐ.

⁴⁰ܗܵܐ، ܪܘܼܚܪܸܚ ܠܝܼ ܠܦܘܼܩܵܕܘܼ̈ܟ݂، ܒܙܲܕܝܼܩܘܼܬܘܼܟ݂ ܡܲܚܝܼ ܠܝܼ.

⁴¹ܘܐܵܬܝܵܐ ܥܲܠܝܼ ܛܲܝܒܘܼܬܘܼܟ݂، ܝܵܐ ܡܵܪܝܵܐ، ܘܦܘܼܪܩܵܢܘܼܟ݂، ܐܲܝܟ݂ ܩܵܘܠܘܼܟ݂،

⁴²ܗܵܕܟ݂ܵܐ ܕܝܵܗܒܹܢ ܓ̰ܘܼܘܵܒ ܠܠܵܝܡܵܢܝܼ، ܒܗ̇ܝ ܕܣܒܝܼܪܝܼ ܒܚܲܒܪܘܼܟ݂.

⁴³ܘܠܵܐ ܫܵܩܠܹܬ ܡ̣ܢ ܦܘܼܡܝܼ ܗܹܡܸܙܡܵܢ ܕܫܪܵܪܵܐ، ܣܵܒܵܒ ܠܕܝܼܘܵܢܘܼ̈ܟ݂ ܣܦܝܼܪܝܼ،

⁴⁴ܘܒܸܬ ܢܵܛܪܹܢ ܢܵܡܘܿܣܘܼܟ݂ ܐܲܡܝܼܢܵܐܝܼܬ، ܠܥܵܠܲܡ ܥܵܠܡܝܼܢ،

⁴⁵ܘܒܸܬ ܚܵܕܪܹܢ ܒܪܘܵܚܵܢܝܼ، ܒܗ̇ܝ ܕܠܦܘܼܩܵܕܘܼ̈ܟ݂ ܛܥܹܐ ܠܝܼ،

⁴⁶ܘܒܸܬ ܗܲܡܙܸܡܸܢ ܒܘܼܬ ܣܵܗܕܘܵܬܘܼ̈ܟ݂ ܩܲܕܡ ܡܲܠܟܹ̈ܐ، ܘܠܹܐ ܢܵܟ݂ܦܹܢ.

⁴⁷ܘܒܸܬ ܩܲܒܠܸܢ ܒܘܼܣܵܡܵܐ ܒܦܘܼܩܕܵܢܘܼ̈ܟ݂ ܕܡܘܼܚܸܒܵܝ ܠܝܼ،

⁴⁸ܘܒܸܬ ܡܲܪܡܸܢ ܐܝܼܕܵܬ‌ܝܼ̈ ܠܦܘܼܩܕܵܢܘܼ̈ܟ݂ ܕܡܘܼܚܸܒܵܝ ܠܝܼ، ܘܒܸܬ ܗܲܓܹܝܢ ܩܵܢܘܿܢܘܼ̈ܟ݂.

⁴⁹ܕܟ݂ܘܿܪܹܗ ܚܲܒܪܘܼܟ݂ ܠܪܹܓܘܼܟ݂، ܗ̇ܘ ܕܒܝܼܹܗ ܩܵܡ ܥܵܒ݂ܕܹܬ ܕܣܵܒܪܹܢ.

⁵⁰ܐܵܗܵܐ ܝܠܵܗ̇ ܝܵܗܒ݂ܵܠܬܵ‌ܐ ܕܠܸܒܵܐ ܐܸܠܝܼ ܓܵܘ ܐܘܼܠܨܵܢܝܼ، ܣܵܒܵܒ ܗܹܡܸܙܡܵܢܘܼܟ݂ ܩܵܡ ܡܲܚܝܼܵܐ ܠܝܼ.

⁵¹ܚܵܬܪ̈ܵܢܹܐ ܡܘܼܣܚܸܪܗܘܿܢ ܟ̰ܸܡ ܪܵܒܵܐ ܒܝܼܝܼ، ܘܡ̣ܢ ܢܵܡܘܿܣܘܼܟ݂ ܠܵܐ ܩܠܝܼܒ ܠܝܼ.

⁵²ܕܟ݂ܝܼܪܝܼ ܕܝܼܘܵܢܘܼ̈ܟ݂ ܡ̣ܢ ܥܵܠܲܡ، ܝܵܐ ܡܵܪܝܵܐ، ܘܦܝܼܫ ܠܝܼ ܝܘܼܗܒ݂ܵܐ ܠܸܒܵܐ.

⁵³ܚܸܡܬܵ‌ܐ ܩܵܡ ܕܵܒ݂ܩܵܐ ܠܝܼ ܡ̣ܢ ܥܸܠܬܵ‌ܐ ܕܪ̈ܲܫܝܼܥܹܐ ܫܵܒ݂ܩܵܢܹ̈ܐ ܕܢܵܡܘܿܣܘܼܟ݂.

⁵⁴ܩܵܢܘܿܢܘܼ̈ܟ݂ ܗܘܹܐ ܠܗܘܿܢ ܙܡܝܼܪ̈ܵܬܹ‌ܐ ܐܸܠܝܼ، ܓܵܘ ܒܲܝܬܵ‌ܐ ܕܬܵܘܬܵܒ݂ܘܼܬ‌ܝܼ.

⁵⁵ܕܟ݂ܝܼܪܝܼ ܒܠܲܝܠܹܐ ܫܸܡܘܼܟ݂، ܝܵܐ ܡܵܪܝܵܐ، ܘܢܛܝܼܪܝܼ ܢܵܡܘܿܣܘܼܟ݂.

⁵⁶ܐܵܗܵܐ ܗܘܹܐ ܠܵܗ̇ ܥܝܵܕܵܐ ܐܸܠܝܼ، ܒܗ̇ܝ ܕܢܛܝܼܪܝܼ ܦܘܼܩܵܕܘܼ̈ܟ݂.

⁵⁷ܡܵܪܝܵܐ ܝܼܠܹܗ ܣܵܗܡܵܐ ܐܸܠܝܼ، ܐܡܝܼܪܝܼ ܕܒܸܬ ܢܵܛܪܹܢ ܗܹܡܸܙܡܵܢܘܼ̈ܟ݂.

⁵⁸ܦܘܼܪܦܸܠܔ ܠܝܼ ܒܝܼܘܼܟ݂ ܒܟܠܹܗ ܠܸܒܝܼ، ܗܘܝܼ ܚܲܢܵܢܵܐ ܐܸܠܝܼ ܐܲܝܟ݂ ܩܵܘܠܘܼܟ݂.

⁵⁹ܬܘܼܚܡܸܢܝܼ ܒܘܼܬ ܐܘܼܪ̈ܚܵܬ‌ܝܼ، ܘܡܘܼܕܸܪܵܝ ܠܝܼ ܐܲܩܠܝܼ̈ ܠܣܵܗܕܘܵܬܘܼ̈ܟ݂.

⁶⁰ܡܘܼܠܝܸܙ ܠܝܼ ܘܠܵܐ ܥܘܼܪܩܸܠܔ ܠܝܼ، ܠܸܢܛܵܪܵܐ ܦܘܼܩܕܵܢܘܼ̈ܟ݂.

⁶¹ܚܲܒ݂ܠܹ̈ܐ ܕܪ̈ܲܫܝܼܥܹܐ ܩܵܡ ܚܲܪܕܝܼ ܠܝܼ، ܐܝܼܢܵܐ ܢܵܡܘܿܣܘܼܟ݂ ܠܵܐ ܡܘܼܢܫܹܐ ܠܝܼ.

⁶²ܒܦܲܠܓܵܐ ܕܠܲܝܠܹܐ ܒܸܬ ܩܵܝܡܹܢ ܠܫܲܟܘܼܪܘܼܟ݂ ܒܘܼܬ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.

⁶³ܚܲܒ݂ܪܵܐ ܝܘܸܢ ܐܵܢܵܐ ܠܟܠܵܝܗ‌ܝ ܙܕܝܼܥܘܼ̈ܟ݂، ܘܠܢܵܛܪ̈ܵܢܹܐ ܕܦܘܼܩܵܕܘܼ̈ܟ݂.

⁶⁴ܛܲܝܒܘܼܬܘܼܟ݂، ܝܵܐ ܡܵܪܝܵܐ، ܡܠܹܐ ܠܵܗ̇ ܠܐܲܪܥܵܐ، ܡܲܠܸܦ ܠܝܼ ܩܵܢܘܿܢܘܼ̈ܟ݂.

⁶⁵ܛܵܒ݂ܬܵ‌ܐ ܥܒ݂ܝܼܕܵܐ ܝܘܸܬ ܥܲܡ ܪܹܓܘܼܟ݂، ܝܵܐ ܡܵܪܝܵܐ، ܐܲܝܟ݂ ܚܲܒܪܘܼܟ݂.

⁶⁶ܦܲܪܡܲܝܬܵ‌ܐ ܨܦܵܝܝܼ ܘܝܕܵܥܬܵ‌ܐ ܡܲܠܸܦ ܠܝܼ، ܒܗ̇ܝ ܕܒܦܘܼܩܕܵܢܘܼ̈ܟ݂ ܗܘܼܡܸܢܝܼ.

⁶⁷ܡ̣ܢ ܩܲܕܡ ܕܦܵܝܫܹܢ ܗܘܵܐ ܡܘܼܠܝܸܨܵܐ ܒܸܚܠܵܛܵܐ ܝܘܸܢ ܗܘܵܐ، ܐܝܼܢܵܐ ܐܵܕܝܼܵܐ ܗܹܡܸܙܡܵܢܘܼ̈ܟ݂ ܒܸܢܛܵܪܵܝ ܝܘܸܢ.

⁶⁸ܛܵܒ݂ܵܐ ܝܘܸܬ ܐܲܢ݇ܬ ܘܥܵܒ݂ܕܵܢܵܐ ܕܛܵܒ݂ܬܵ‌ܐ، ܡܲܠܸܦ ܠܝܼ ܩܵܢܘܿܢܘܼ̈ܟ݂.

⁶⁹ܗܘܼܡܙܸܡ ܠܗܘܿܢ ܒܘܼܚܬܵܢ ܥܲܠܝܼ ܚܵܬܪ̈ܵܢܹܐ، ܐܝܼܢܵܐ ܐܵܢܵܐ ܒܟܠܹܗ ܠܸܒܝܼ ܒܸܬ ܢܵܛܪܹܢ ܦܘܼܩܵܕܘܼ̈ܟ݂.

⁷⁰ܛܪܝܼܨ ܠܹܗ ܐܲܝܟ݂ ܬܲܪܒܵܐ ܠܸܒܵܝܗ‌ܝ، ܐܝܼܢܵܐ ܐܵܢܵܐ ܒܢܵܡܘܿܣܘܼܟ݂ ܒܣܝܼܡ ܠܵܗ̇ ܠܝܼ.

⁷¹ܨܦܵܝܝܼ ܝܠܵܗ̇ ܩܵܬ‌ܝܼ ܕܦܝܼܫ ܠܝܼ ܡܘܼܠܝܸܨܵܐ، ܩܵܐ ܕܝܵܠܦܹܢ ܩܵܢܘܿܢܘܼ̈ܟ݂.

⁷²ܒܘܼܫ ܨܦܵܝܝܼ ܝܠܹܗ ܩܵܬ‌ܝܼ ܢܵܡܘܿܣܵܐ ܕܦܘܼܡܘܼܟ݂، ܡ̣ܢ ܐܲܠܦܹ̈ܐ ܕܕܲܗܒ݂ܵܐ ܘܕܣܹܐܡܵܐ.

⁷³ܐܝܼܕܵܬܘܼ̈ܟ݂ ܥܒ݂ܝܼܕ ܠܗܘܿܢ ܘܬܘܼܪܸܨ ܠܗܘܿܢ ܐܸܠܝܼ، ܡܲܦܪܸܡ ܠܝܼ ܘܒܸܬ ܝܵܠܦܹܢ ܦܘܼܩܕܵܢܘܼ̈ܟ݂.

⁷⁴ܙܕܝܼܥܘܼ̈ܟ݂ ܒܸܬ ܚܵܙܝܼ ܠܝܼ ܘܒܸܬ ܚܵܕܝܼ، ܒܗ̇ܝ ܕܒܚܲܒܪܘܼܟ݂ ܣܒܝܼܪܝܼ.

⁷⁵ܟܹܐ ܝܵܕܥܹܢ، ܝܵܐ ܡܵܪܝܵܐ، ܕܙܲܕܝܼܩܘܼܬܵ‌ܐ ܝܢܵܐ ܕܝܼܘܵܢܘܼ̈ܟ݂، ܘܒܡܗܘܼܡܢܘܼܬܘܼܟ݂ ܩܵܡ ܡܲܡܟܸܟܸܬ ܠܝܼ.

⁷⁶ܦܲܪܦܘܼܠܹܐ ܝܘܸܢ، ܗܵܘܝܵܐ ܛܲܝܒܘܼܬܘܼܟ݂ ܠܝܼܵܗܒ݂ܝܼ ܠܸܒܵܐ، ܐܲܝܟ݂ ܗܹܡܸܙܡܵܢܘܼܟ݂ ܠܪܹܓܘܼܟ݂.

⁷⁷ܐܵܬ‌ܝܼ ܥܲܠܝܼ ܪ̈ܲܚܡܘܼܟ݂ ܕܚܵܝܹܝܢ، ܒܗ̇ܝ ܕܢܵܡܘܿܣܘܼܟ݂ ܒܲܣܝܼܡܘܼܬܵ‌ܐ ܝܠܹܗ ܐܸܠܝܼ.

⁷⁸ܢܵܟ݂ܦܝܼ ܚܵܬܪ̈ܵܢܹܐ ܣܵܒܵܒ ܒܒܘܼܚܬܵܢ ܩܵܡ ܙܵܠܡܝܼ ܐܸܠܝܼ، ܐܵܢܵܐ ܒܸܬ ܗܲܓܹܝܢ ܦܘܼܩܵܕܘܼ̈ܟ݂.

⁷⁹ܦܵܬܠܝܼ ܠܟܸܣܠܝܼ ܙܕܝܼܥܘܼ̈ܟ݂، ܘܝܵܕܥܵܢܹ̈ܐ ܕܣܵܗܕܘܵܬܘܼ̈ܟ݂.

⁸⁰ܗܵܘܹܐ ܠܸܒܝܼ ܬܲܡܝܼܡܵܐ ܒܩܵܢܘܿܢܘܼ̈ܟ݂، ܩܵܐ ܕܠܵܐ ܢܵܟ݂ܦܹܢ.

⁸¹ܢܘܝܼܠܔ ܠܵܗ̇ ܓܵܢܝܼ ܩܵܐ ܦܘܼܪܩܵܢܘܼܟ݂، ܠܚܲܒܪܘܼܟ݂ ܣܦܝܼܪܝܼ.

⁸²ܚܒܹܐ ܠܗܘܿܢ ܥܲܝܢܝܼ̈ ܒܸܣܦܵܪܵܐ ܠܗܹܡܸܙܡܵܢܘܼܟ݂، ܟܲܕ ܒܹܐܡܵܪܵܐ ܝܘܸܢ: ”ܐܝܼܡܲܢ ܒܸܬ ܝܵܗܒܹܬ ܠܝܼ ܠܸܒܵܐ؟“

⁸³ܣܵܒܵܒ ܗܘܹܐ ܠܝܼ ܐܲܝܟ݂ ܡܙܝܼܕܵܐ ܓܵܘ ܬܸܢܵܐ، ܐܝܼܢܵܐ ܩܵܢܘܿܢܘܼ̈ܟ݂ ܠܵܐ ܡܘܼܢܫܹܐ ܠܝܼ.

⁸⁴ܟܡܵܐ ܝܼܢܵܐ ܝܵܘܡܵܢܹ̈ܐ ܕܪܹܓܘܼܟ݂؟ ܐܝܼܡܲܢ ܒܸܬ ܥܵܒ݂ܕܹܬ ܕܝܼܘܵܢ ܥܲܠܔ ܢܵܦܠܵܢܹ̈ܐ ܒܵܬܪܝܼ؟

⁸⁵ܚܦܝܼܪܗܘܿܢ ܚܵܬܪ̈ܵܢܹܐ ܓܘܼܒܹ̈ܐ ܩܵܬ‌ܝܼ، ܕܠܹܐ ܝܠܵܗ̇ ܡ̣ܢ ܢܵܡܘܿܣܘܼܟ݂.

⁸⁶ܟܠܵܝܗ‌ܝ ܦܘܼܩܕܵܢܘܼ̈ܟ݂ ܡܗܘܼܡܢܹ̈ܐ ܝܢܵܐ، ܒܠܵܐ ܥܸܠܬܵ‌ܐ ܢܦܝܼܠܔ ܠܗܘܿܢ ܒܵܬܪܝܼ؛ ܗܲܝܸܪܝܼ!

⁸⁷ܚܲܕܟ̰ܵܐ ܦܝܼܫ ܠܵܗ̇ ܕܬܵܝܡܝܼ ܗܘܵܘ ܠܝܼ ܒܐܲܪܥܵܐ، ܐܝܼܢܵܐ ܐܵܢܵܐ ܠܵܐ ܫܒ݂ܝܼܩ ܠܝܼ ܦܘܼܩܵܕܘܼ̈ܟ݂.

⁸⁸ܐܲܝܟ݂ ܛܲܝܒܘܼܬܘܼܟ݂ ܡܲܚܝܼ ܠܝܼ، ܕܢܵܛܪܹܢ ܣܵܗܕܘܵܬܹ̈‌ܐ ܕܦܘܼܡܘܼܟ݂.

⁸⁹ܠܥܵܠܲܡ، ܝܵܐ ܡܵܪܝܵܐ، ܚܲܒܪܘܼܟ݂ ܡܩܵܘܝܵܢܵܐ ܝܠܹܗ ܒܫܡܲܝܵܐ.

⁹⁰ܠܕܵܪܵܐ ܘܕܵܪܵܐ ܡܗܘܼܡܢܘܼܬܘܼܟ݂، ܫܘܼܬܐܸܣܵܐ ܠܘܼܟ݂ ܐܲܪܥܵܐ ܘܒܸܟܠܵܝܵܐ ܝܠܵܗ̇.

⁹¹ܒܕܝܼܘܵܢܘܼ̈ܟ݂ ܒܸܟܠܵܝܵܐ ܝܢܵܐ ܐܸܕܝܘܿܡ، ܣܵܒܵܒ ܟܠܵܝܗ‌ܝ ܪܹ̈ܓܵܘܵܬܘܼܟ݂ ܝܼܢܵܐ.

⁹²ܐܸܢ ܠܵܐ ܗܵܘܹܐ ܗܘܵܐ ܢܵܡܘܿܣܘܼܟ݂ ܒܲܣܝܼܡܘܼܬ‌ܝܼ، ܒܸܬ ܛܵܠܩܹܢ ܗܘܵܐ ܒܥܵܘܩܵܢܝܼ.

⁹³ܠܥܵܠܲܡ ܠܹܐ ܡܲܢܫܹܝܢ ܦܘܼܩܵܕܘܼ̈ܟ݂، ܣܵܒܵܒ ܒܝܼܵܝܗ‌ܝ ܩܵܡ ܡܲܚܹܝܬ ܠܝܼ.

⁹⁴ܕܝܼܘܼܟ݂ ܝܼܘܸܢ ܐܵܢܵܐ، ܦܲܪܸܩ ܠܝܼ، ܣܵܒܵܒ ܠܦܘܼܩܵܕܘܼ̈ܟ݂ ܛܥܹܐ ܠܝܼ.

⁹⁵ܣܦܝܼܪܗܘܿܢ ܐܸܠܝܼ ܪ̈ܲܫܝܼܥܹܐ ܠܛܲܠܘܼܩܝܼ، ܐܝܼܢܵܐ ܣܵܗܕܘܵܬܘܼ̈ܟ݂ ܒܸܬ ܦܲܪܡܹܝܢ.

⁹⁶ܠܟܠܔ ܟܡܝܼܠܘܼܬܵ‌ܐ ܚܙܹܐ ܠܝܼ ܚܘܼܬܵܡܵܐ، ܐܝܼܢܵܐ ܦܘܼܩܕܵܢܘܼܟ݂ ܪܘܝܼܚܵܐ ܝܠܹܗ ܪܵܒܵܐ.

⁹⁷ܟܡܵܐ ܟܹܐ ܡܲܚܸܒܸܢ ܠܢܵܡܘܿܣܘܼܟ݂، ܟܠܹܗ ܝܵܘܡܵܐ ܗ̇ܘ ܝܼܠܹܗ ܗܲܓܲܝܬ‌ܝܼ.

⁹⁸ܦܘܼܩܕܵܢܘܼ̈ܟ݂ ܩܵܡ ܥܵܒ݂ܕܝܼ ܠܝܼ ܒܘܼܫ ܚܲܟܝܼܡܵܐ ܡ̣ܢ ܕܸܫ̃ܡܸܢܝܼ̈، ܣܵܒܵܒ ܠܟܸܣܠܝܼ ܝܢܵܐ ܗܲܠܔ ܥܵܠܲܡ.

⁹⁹ܗܘܹܐ ܠܝܼ ܒܘܼܫ ܚܲܟܝܼܡܵܐ ܡ̣ܢ ܟܠܵܝܗ‌ܝ ܡܲܠܦܵܢܝܼ̈، ܣܵܒܵܒ ܣܵܗܕܘܵܬܘܼ̈ܟ݂ ܗܲܓܲܝܬܵ‌ܐ ܝܢܵܐ ܐܸܠܝܼ.

¹⁰⁰ܒܘܼܫ ܙܵܘܕܵܐ ܡ̣ܢ ܚܘܵܪ̈ܕܸܩܢܹܐ ܟܹܐ ܦܲܪܡܹܝܢ، ܣܵܒܵܒ ܦܘܼܩܵܕܘܼ̈ܟ݂ ܢܛܝܼܪܵܝ ܠܝܼ.

¹⁰¹ܡ̣ܢ ܟܠܔ ܐܘܼܪܚܵܐ ܒܝܼܫܬܵ‌ܐ ܡܘܼܟܠܹܐ ܠܝܼ ܐܲܩܠܝܼ̈، ܩܵܐ ܕܢܵܛܪܹܢ ܚܲܒܪܘܼܟ݂.

¹⁰²ܡ̣ܢ ܕܝܼܘܵܢܘܼܟ݂ ܠܵܐ ܩܠܝܼܒ ܠܝܼ، ܣܵܒܵܒ ܐܲܢ݇ܬ ܩܵܡ ܡܲܠܦܸܬ ܠܝܼ.

¹⁰³ܟܡܵܐ ܚܸܠܝܹ̈ܐ ܝܢܵܐ ܠܫܵܡܵܟܝܼ̈ ܗܹܡܸܙܡܵܢܘܼ̈ܟ݂، ܒܘܼܫ ܚܸܠܝܹ̈ܐ ܡ̣ܢ ܕܸܒ݂ܫܵܐ ܠܦܘܼܡܝܼ.

¹⁰⁴ܡ̣ܢ ܦܘܼܩܵܕܘܼ̈ܟ݂ ܟܹܐ ܫܵܩܠܹܢ ܦܲܪܡܲܝܬܵ‌ܐ، ܒܘܼܬ ܐܵܗܵܐ، ܣܢܹܐ ܠܝܼ ܟܠܔ ܐܘܼܪܚܵܐ ܕܕܘܼܓܠܵܐ.

¹⁰⁵ܫܪܵܓ݂ܵܐ ܝܠܹܗ ܠܐܲܩܠܝܼ ܚܲܒܪܘܼܟ݂، ܘܒܲܗܪܵܐ ܠܫܒ݂ܝܼܠܝܼ.

¹⁰⁶ܝܡܹܐ ܠܝܼ ܘܒܸܬ ܡܲܩܘܹܝܢ ܡܵܘܡܝܼܬ‌ܝܼ، ܠܸܢܛܵܪܵܐ ܕܝܼܘܵܢܹ̈ܐ ܕܙܲܕܝܼܩܘܼܬܘܼܟ݂.

¹⁰⁷ܦܝܼܫ ܠܝܼ ܡܘܼܠܝܸܨܵܐ ܟ̰ܸܡ ܪܵܒܵܐ، ܝܵܐ ܡܵܪܝܵܐ، ܡܲܚܝܼ ܠܝܼ ܐܲܝܟ݂ ܚܲܒܪܘܼܟ݂.

¹⁰⁸ܩܲܒܸܠܔ ܠܗܘܿܢ ܩܘܼܪ̈ܒܵܢܹܐ ܕܨܸܒ݂ܝܵܢܵܐ ܡ̣ܢ ܦܘܼܡܝܼ، ܝܵܐ ܡܵܪܝܵܐ، ܘܕܝܼܘܵܢܘܼ̈ܟ݂ ܡܲܠܸܦ ܠܝܼ.

¹⁰⁹ܓܵܢܝܼ ܒܩܹܘܲܢܕܹܢܘܿܣ ܝܠܵܗ̇ ܐܲܡܝܼܢܵܐܝܼܬ، ܐܝܼܢܵܐ ܢܵܡܘܿܣܘܼܟ݂ ܠܵܐ ܡܘܼܢܫܹܐ ܠܝܼ.

¹¹⁰ܡܘܼܬܸܒ݂ ܠܗܘܿܢ ܪ̈ܲܫܝܼܥܹܐ ܦܲܚܵܐ ܐܸܠܝܼ، ܐܝܼܢܵܐ ܡ̣ܢ ܦܘܼܩܵܕܘܼ̈ܟ݂ ܠܵܐ ܚܠܝܼܛ ܠܝܼ.

¹¹¹ܗܘܹܐ ܠܗܘܿܢ ܝܵܪܬܘܼܬܵ‌ܐ ܐܸܠܝܼ ܣܵܗܕܘܵܬܘܼ̈ܟ݂ ܠܥܵܠܲܡ، ܣܵܒܵܒ ܦܨܝܼܚܘܼܬܵ‌ܐ ܕܠܸܒܝܼ ܝܢܵܐ.

¹¹²ܡܘܼܬܸܒ݂ ܠܝܼ ܠܸܒܝܼ ܠܸܥܒ݂ܵܕܵܐ ܩܵܢܘܿܢܘܼ̈ܟ݂، ܠܥܵܠܲܡ، ܗܲܠܔ ܚܲܪܬܵ‌ܐ.

¹¹³ܠܦܠܝܼܥܵܐ ܒܪܸܥܝܵܢܵܐ ܟܹܐ ܣܵܢܹܝܢ، ܐܝܼܢܵܐ ܠܢܵܡܘܿܣܘܼܟ݂ ܟܹܐ ܡܲܚܸܒܸܢ.

¹¹⁴ܣܸܬܵܪܝܼ ܘܡܵܛܵܠܝܼ ܐܲܢ݇ܬ ܝܼܘܸܬ، ܠܚܲܒܪܘܼܟ݂ ܟܹܐ ܣܵܦܪܹܢ.

¹¹⁵ܪܚܘܿܩܘܼܢ ܡܸܢܝܼ، ܝܵܐ ܒܝܼܫܹ̈ܐ، ܕܢܵܛܪܹܢ ܦܘܼܩܕܵܢܹ̈ܐ ܕܐܲܠܵܗ‌ܝܼ.

¹¹⁶ܣܢܘܿܕ ܠܝܼ ܐܲܝܟ݂ ܗܹܡܸܙܡܵܢܘܼܟ݂ ܩܵܐ ܕܚܵܝܹܝܢ، ܘܠܵܐ ܫܵܒ݂ܩܹܬ ܢܵܟ݂ܦܹܢ ܡ̣ܢ ܣܲܒ݂ܪܵܐ ܕܐܝܼܬ ܠܝܼ.

¹¹⁷ܣܢܘܿܕ ܠܝܼ ܩܵܐ ܕܦܵܝܫܹܢ ܦܘܼܪܩܵܐ، ܘܒܸܬ ܚܵܝܪܹܢ ܒܩܵܢܘܿܢܘܼ̈ܟ݂ ܐܲܡܝܼܢܵܐܝܼܬ.

¹¹⁸ܡܘܼܣܠܹܐ ܠܘܼܟ݂ ܠܟܠܵܝܗ‌ܝ ܚܵܠܛܵܢܹ̈ܐ ܡ̣ܢ ܩܵܢܘܿܢܘܼ̈ܟ݂، ܣܵܒܵܒ ܣܪܝܼܩܵܐ ܝܠܹܗ ܦܸܠܡܵܝܗ‌ܝ.

¹¹⁹ܐܲܝܟ݂ ܚܸܠܬ ܕܣܹܐܡܵܐ ܪܘܼܦܝܵܝ ܠܘܼܟ݂ ܟܠܵܝܗ‌ܝ ܪ̈ܲܫܝܼܥܹܐ ܕܐܲܪܥܵܐ، ܒܘܼܬ ܐܵܗܵܐ، ܟܹܐ ܡܲܚܸܒܸܢ ܠܟܠܵܝܗ‌ܝ ܣܵܗܕܘܵܬܘܼ̈ܟ݂.

¹²⁰ܪܘܼܬܪܸܬ ܠܹܗ ܒܸܣܪܝܼ ܒܥܸܠܬܵ‌ܐ ܕܣܘܼܪܵܕܘܼܟ݂، ܘܡ̣ܢ ܕܝܼܘܵܢܘܼ̈ܟ݂ ܟܹܐ ܙܵܕܥܹܢ.

¹²¹ܥܒ݂ܝܼܕ ܠܝܼ ܕܝܼܘܵܢ ܘܙܲܕܝܼܩܘܼܬܵ‌ܐ، ܠܵܐ ܫܵܒ݂ܩܹܬ ܠܝܼ ܒܐܝܼܕܵܐ ܕܙܵܠܡܵܢܝܼ̈.

¹²²ܗܘܝܼ ܥܲܪܵܒ݂ܵܐ ܕܪܹܓܘܼܟ݂ ܠܛܵܒ݂ܬܵ‌ܐ، ܠܵܐ ܫܵܒ݂ܩܹܬ ܙܵܠܡܝܼ ܐܸܠܝܼ ܚܵܬܪ̈ܵܢܹܐ.

¹²³ܥܲܝܢܝܼ̈ ܚܒܹܐ ܠܗܘܿܢ ܒܸܣܦܵܪܵܐ ܠܦܘܼܪܩܵܢܘܼܟ݂، ܘܠܗܹܡܸܙܡܵܢ ܕܙܲܕܝܼܩܘܼܬܘܼܟ݂.

¹²⁴ܥܒ݂ܘܿܕ ܥܲܡ ܪܹܓܘܼܟ݂ ܐܲܝܟ݂ ܛܲܝܒܘܼܬܘܼܟ݂، ܘܩܵܢܘܿܢܘܼ̈ܟ݂ ܡܲܠܸܦ ܐܸܠܝܼ.

¹²⁵ܥܲܒ݂ܕܘܼܟ݂ ܝܼܘܸܢ ܐܵܢܵܐ، ܡܲܦܪܸܡ ܠܝܼ ܕܝܵܕܥܹܢ ܣܵܗܕܘܵܬܘܼ̈ܟ݂.

¹²⁶ܥܕܵܢܵܐ ܝܠܵܗ̇ ܕܥܵܒܹܕ ܚܲܕ ܡܸܢܕܝܼ ܡܵܪܝܵܐ، ܒܗ̇ܝ ܕܒܘܼܛܸܠܔ ܠܗܘܿܢ ܢܵܡܘܿܣܘܼܟ݂.

¹²⁷ܒܘܼܬ ܐܵܗܵܐ، ܟܹܐ ܡܲܚܸܒܸܢ ܦܘܼܩܕܵܢܘܼ̈ܟ݂، ܒܘܼܫ ܡ̣ܢ ܕܲܗܒ݂ܵܐ، ܘܡ̣ܢ ܕܲܗܒ݂ܵܐ ܨܸܦܝܵܐ.

¹²⁸ܒܘܼܬ ܐܵܗܵܐ، ܟܠܵܝܗ‌ܝ ܦܘܼܩܵܕܹ̈ܐ ܟܹܐ ܢܵܛܪܹܢ ܬܪܘܼܨܵܐܝܼܬ، ܟܠܵܗ̇ ܐܘܼܪܚܵܐ ܕܕܘܼܓܠܵܐ ܣܢܹܐ ܠܝܼ.

¹²⁹ܥܓ̰ܝܼܒܹ̈ܐ ܝܢܵܐ ܣܵܗܕܘܵܬܘܼ̈ܟ݂، ܒܘܼܬ ܐܵܗܵܐ ܢܛܝܼܪܵܝ ܠܵܗ̇ ܓܵܢܝܼ.