يَيَ 19:29-42

²⁹سٍ سَسٍ ندٍ نُ نَ مّننِ، نَشَن نُ رَقٍشِ وّنِ مُلُشُنشِ رَ. عٍ نَشَ سٍ ندٍ رَ سِن نَ وّنِ عِ، عٍ عَ شِرِ هِسٌثِ وُرِ كُيٍ رَ، عٍ عَ مَسٌ عِسَ دّ رَ.

³⁰عَ تٌ ندٍ مِن، عَ نَشَ عَ قَلَ، «عَ بِرِن بَرَ كَمَلِ!» عَ نَشَ عَ شُن سِن، عَ قَ لَاشِرَ.

³¹نَ لْشْي يُوِقِيٍ نُ سٍيٍ رَقَلَمَ سَيَمَلٍكّ دَنفِ سَلِ شَ قٍ رَ. عٍ مُ تِن قُرٍيٍ شَ لُ وُرِ مَفَلَنبُشِ مَ نَ مَلَبُ لْشْي، بَرِ مَ سَلِ شُنفبٍ نَن نُ عَ رَ. نَ كُي، عٍ نَشَ ثِلَتِ مَيَندِ عَ شَ نَ مِشِ بَنبَنشِيٍ سَنيِيٍ فِرَ، عَلَكٌ عٍ شَ قَشَ مَقُرٍن، عٍ شَ بَ نَ.

³²سْورِيٍ نَشَ قَ، عٍ قَ نَ مِشِ قِرِنيِ سَنيِيٍ فِرَ، نَشٍيٍ نُ بَنبَنشِ عِسَ يِرٍقَنيِ مَ، عَ نُن عَ كْولَ مَ.

³³كْنْ عٍ تٌ عِسَ لِ، عٍ نَشَ عَ تٌ عَ حَن بَرَ قَشَ. نَ كُي، عٍ مُ عَ تَن سَنيِيٍ فِرَ،

³⁴كْنْ سْورِ ندٍ نَشَ عَ سّيتِ سْشْ تَنبّ رَ، يٍ نُن وُلِ نَشَ مِنِ كٍرٍن نَ.

³⁵نَشَن نَ قٍ تٌشِ، عَ بَرَ نَ قٍ سٍيدٍ بَ. عَ شَ سٍيدٍحْشْيَ قِندِشِ نْندِ نَن نَ. عَ تَن يّتّ عَ كٌلٌن، عَ عَ نَ نْندِ نَن قَلَقٍ وٌ بّ، عَلَكٌ وٌ قَن شَ دَنشَنِيَ.

³⁶نَ قٍيٍ رَبَ نّ عَلَكٌ كِتَابُي شَ مَسٍنيِ شَ كَمَلِ، نَشَن عَ مَسٍنشِ، «عَ شْرِ كٍرٍن مُ فِرَ مَ.»

³⁷عَ مَن سّبّشِ يِرٍ فبّتّ، «عٍ عٍ يَ تِمَ نّ مِشِ رَ، عٍ بَرَ نَشَن سْشْ.»

³⁸نَ قٍ بِرِن شَنبِ، يُسُقُ عَرِ مَتٍكَ نَشَ سَ عِسَ قُرٍ مَشَندِ ثِلَتِ مَ. عِسَ قْشِرَبِرّ ندٍ نَن نُ عَ رَ، كْنْ عَ مُ نُ عَ مَسٍنمَ كّنّ مَ، عَ تٌ نُ فَاشُشِ يُوِقِ كُنتِفِيٍ يَ رَ. ثِلَتِ تٌ تِن، يُسُقُ نَشَ سَ عِسَ قُرٍ تٌنفٌ.

³⁹نِكٌدٍ مُ، نَشَن نُ بَرَ سِفَ عِسَ يِرٍ فُندٌ كُي كْي رَ تّمُي دَنفِشِ، نَ قَن نَشَ لَبُندّ كِلٌ تٌنفٌ سَشَن مِرِ نُن عَلٌوٍ دَاشِ شَنِن عِسَ قُرٍ يِرٍ.

⁴⁰عٍ نَشَ عِسَ قُرٍ مَقِلِن دُفِيٍ رَ، عٍ لَبُندّ سَ عَ مَ، عَلْ يُوِقِيٍ دَرِشِ عَ رَ كِ نَشّ.

⁴¹بْشِ ندٍ نُ مَكْرّ عِسَ قَشَدٍ رَ، فَبُرِ نّينّ نُ بَرَ يَءِلَن دّننَشّ. قُرٍ يٌ مُ نُ رَفَتَشِ عَ كُي سِندٍن.

⁴²عٍ نَشَ عِسَ رَفَتَ نَ يِرٍ مَكْرّشِ، بَرِ مَ عٍ فبَتَشِ سَيَمَلٍكّ دَنفِ سَلِ شَ قٍ رَ. عَ نُ لَن نّ يُوِقِيٍ شَ فّ قٍ بِرِن يَءِلَندٍ بٍينُن كْي شَ سٌ نَ لْشْي.