San Juan 19:29-42

²⁹Magbaawai soldaaun hãbmua bëewi, putjö hũhũp'ë k'itʌmta hisopo hanʌm piu gaai bʌʌrnaa, haig jarr hee vino hadchuchúhu sĩerr hee t'ʌnaa, hi hi haig hʌa haujim, mag putjö hũhũp'ë k'itʌm hee dorrdʌ sim bereu dömk'ĩir.

³⁰Mag hich hi haig hʌa hat'aawai sĩi hag gaai bereu hoowi, —Hĩsin chad t'umaa haaipa sĩsimgui ha k'itawia, mʌ dak'ĩraa heeg hʌ̃t'ʌbaadëwi warag chaaupabaadëjim.

³¹Mag hed nemk'öju noram hanaa jua hʌ̃ʌijem noram harr haawai judionaanau pakuls gaai hõor sĩumap'a naajim. Hamagan mag hed p'iesta pömaam hajim, sĩi tagam jua hʌ̃i nʌm hedam k'ãaijã. Mag gaaimua maar jöoin judionaan chi t'et'emnaanau Pilatoog jaaujierram haajem, mag pakuls gaai narr k'ʌʌn bʌ̈ bʌbrëutk'api jaaumk'ĩir; mag bʌ̈ bʌbrëutk'abapäaiwai, jöpk'arraa k'ëchbaadee heeg paak'a hauwia p'ë harramk'ĩir.

³²Magbaawai chadcha Pilatoou soldaaunag jaaujim haajem. Mag jaaubaawai bëewi mag Jesús bigaau narr k'ʌʌn bʌ̈ bʌbrëutk'apʌ̈ijim; nacha hãbak'ai dën, maimua mag k'ur hagjö hãbak'ai dën.

³³Pari Jesús dënjã hagjö bʌbrëwaag hawi hoowai, ya chi meemta jiir jöchk'ërajim. Mag hoobaimaawai hi bʌ̈ bʌbrëubajierram.

³⁴Pari mag mee k'ërʌm hãba, soldaaunau chadcha mee sim k'ap haag hawi, hãbmua hi hãi hee t'utk'ërëu su hoojim. Magbaawai bag choorbabaadëm dʌ̈i maach chödamta döjö dau bʌ̃ʌ choorba t'ʌnʌisijim.

³⁵Mʌch chi mag jaau chirʌmuan mʌch daúacha hootarr haawaita chadcha mag jaau chirʌm. Mua k'ap'ʌ chirʌm, mʌchdëu chadchata nem jaau chirʌm. Mag chadcha harr nemta jaau chiraawai pãrag hʌ̈k'amk'ĩirta mʌg p'ã chirʌm.

³⁶Soldaaunau hi dʌ̈i magtarran, hich Jesús higwia hag nawe Hẽwandam hiek gaai hi hi jaaumienau p'ãtarrjö t'um hag heyaa höbërju harr haawai hajim. Chi Hẽwandam hiek p'ã sim gaai, “Hi pa chan hãbjã buyëubaju” ha sim, hich chi Hẽwandamaucha pʌ̈itarr higwi; hajapcharan hich Jesús higwiama.

³⁷Maimua hich hag Hẽwandam hiek gaai, hich Hẽwandamau hagjö mag hichdëu pʌ̈itarr higwia p'ãpitarr gaai, “Chi t'utk'ërëu hi sutarr k'ʌʌnaujã deeu hi dʌ̈i hooju” ha p'ã sim. Magua, soldaaunau hi dʌ̈i magtarr higwia warrgarwe Hẽwandamau p'ãpitarrjö chadcha t'umaa hich hag hee höbërtarr haawai chadcha maadëu hʌ̈k'aju haai nʌm.

³⁸Hamau hi dʌ̈i mamag k'aawai hĩchab sĩejim woun hãb José ha t'ʌ̃r sĩerr. Chi José p'öbördam Arimatea hanʌm heem hajim. Hichdëujã hĩchab nawe Jesuu nem jaaujerr t'ãraucha hʌ̈k'aajerrta, tagam judionaanag hich k'augpim hök'ö haajeejim, hich dʌ̈i k'aigbaju k'ĩirjuwia. Pari maagjerrta mag ya chi Jesús meebaadëm k'aug hat'aawai Pilato haar mawia hirig jëeuwimajim haajem, Jesús chi meemdam heeg pawia harraag. Magbaawai Pilatoou hirig harrju haai sim habaawai heeg paa hauwia hat'aadëjim.

³⁹Mag hat'aadëm hee hĩchab Nicodemojã bëejim. Hich hag Nicodemo hajim biek hãb hedaar hich Jesús dʌ̈i hiyʌ̈ʌ hat'urtarr. Nicodemoou jʌ̃gdee mirra hanʌm dʌ̈i áloe hanʌmta sĩi jʌser hãbam hee waaurëu sim waibëejim, hagua hi k'a p'uraag. Mag jʌ̃gdee peer quintal hãbpaím sĩejim.

⁴⁰Mag, Joseeu Nicodemo dʌ̈imua hamach numiim k'ʌʌnau warre hich hauk'ërju haig mag jʌ̃gdee chi Nicodemoou waibëetarr aceite hee waaurëunaa, hagua k'a p'uurnaa, put hee wajap'a pʌrëu k'ërjierram, maar judionaanaun hõor hauk'eerwai hich magta haajerr haawai hich hagjö.

⁴¹Mag hamau hi pakuls gaai meerp'ë wai narr dak'a nemjĩirdö sĩejim. Maagwai mag nemjĩirdö heeta durrbʌ̈ k'õpag hee jẽbdi hiiur sĩejim, ya chi k'örm. Mag jẽbdi hee hagt'a hõor hãbjã hauk'ërba sĩejim.

⁴²Mag jẽbdiita mag pa gaai hi meerp'ë wai narr haigmua dak'acha sĩerr haawai mag heeta Jesús hauk'ërjierram. Maimua mag nʌm dʌ̈ijã hĩchab ya judionaan jua hʌ̃ʌijem hed dubaag pöm k'aba waaur sĩerr haawai mag heeta hauk'ërjierram, hedau k'ëuju nawe.