لٍوِ سّرّشّدُبّ 9:8-24

⁸هَرُنَ تٌ عَ مَسٌ سّرّشّبَدٍ رَ، عَ نَشَ تُورَ دِ كْن نَشَبَ عَ يّتّ يُنُبِ شَقَرِ سّرّشّ رَ.

⁹عَ شَ دِيٍ نَشَ تُورَ وُلِ سٌ عَ يِ رَ. عَ نَشَ عَ بّلّشّسٌلٍ رَ سِن وُلِ شْورَ، عَ ندٍ سَ قٍرِيٍ مَ نَشٍيٍ نُ نَ سّرّشّبَدٍ تُنشُنيِ نَانِ رَ. عَ نَشَ وُلِ دْنشْي عِقِلِ سّرّشّبَدٍ لَنبَنيِ مَ.

¹⁰شُرُ سٍ تُرٍ، عَ فُنفُييٍ، نُن لَارٍ نَشَن نَ عَ بْحّ مَ، عَ نَشَ نَ بِرِن فَن سّرّشّبَدٍ قَرِ يُنُبِ شَقَرِ سّرّشّ رَ عَلْ عَلَتَلَ عَننَبِ مُنسَ يَمَرِشِ عَ رَ كِ نَشّ.

¹¹كْنْ عَ نَشَ عَ سُبٍ نُن عَ كِرِ فَن حَمَ يٌنكِندٍ قَرِ مَ.

¹²نَ دَنفِ شَنبِ، هَرُنَ نَشَ سّرّشّ فَن دَاشِ كْن نَشَبَ. عَ شَ دِيٍ نَشَ نَ وُلِ سٌ عَ يِ رَ، عَ قَ عَ كَسَن سّرّشّبَدٍ سّيتِيٍ مَ.

¹³عٍ نَشَ سّرّشّ شُنتُنيِيٍ نُن عَ شُنيِ سٌ عَ يِ رَ، عَ نَ بِرِن فَن سّرّشّبَدٍ قَرِ.

¹⁴عَ تٌ فّ عَ قُرِنفّ نُن عَ سَنيِيٍ رَشَدٍ، عَ نَشَ عٍ فَن عٍ نُن سّرّشّ فَن دَاشِ رَ سّرّشّبَدٍ قَرِ.

¹⁵هَرُنَ فّ شَنبِ نَ رَ، عَ نَشَ حَمَ شَ سِكْتّ كْن نَشَبَ، عَ شَ قِندِ يُنُبِ شَقَرِ سّرّشّ رَ حَمَ بّ. عَ نَ رَبَ نّ عَلْ عَ عَ سِنفٍ رَبَ كِ نَشّ.

¹⁶عَ نَشَ سّرّشّ فَن دَاشِ بَ عَ سّرِيّ كِ مَ.

¹⁷عَ نَشَ سَنسِ شْرِ دِنشِ سُشُ كٍرٍن فَن سّرّشّبَدٍ قَرِ سّرّشّ فَن دَاشِ بَ تّمُي فّيسّفّ.

¹⁸عَ نَشَ تُورَ نُن يّشّي كٌنتٌنيِ كْن نَشَبَ شَنُنتٍيَ سّرّشّ رَ حَمَ بّ. عَ شَ دِيٍ نَشَ نَ وُلِ سٌ عَ يِ، عَ عَ كَسَن سّرّشّبَدٍ سّيتِيٍ مَ.

¹⁹عٍ نَشَ تُورَ نُن يّشّي كٌنتٌنيِ تُرٍ تٌنفٌ، نَشَن نَ عٍ شُلِ نُن عٍ قُرِنفّ مَبِرِ، عَ نُن عٍ فُنفُييٍ، عَ نُن لَارٍ نَشَن نَ عٍ بْحّ مَ،

²⁰عٍ نَشَ نَ بِرِن سَ سُبٍ كَنكٍ مَ سّرّشّبَدٍ قَرِ، عٍ عَ بِرِن فَن.

²¹هَرُنَ نَشَ سّرّشّ سُبٍيٍ كَنكٍ نُن عٍ يِرٍقَنيِ تَبٍ عِتٍ، عَ عٍ لِنتَن عَلَتَلَ يَ عِ عَ مَسٍنقٍ رَ عَ بّ، عَلْ عَننَبِ مُنسَ عَ يَمَرِشِ كِ نَشّ.

²²هَرُنَ نَشَ عَ بّلّشّيٍ عِتَلَ، عَ دُبَ حَمَ بّ. عَ تٌ يُنُبِ شَقَرِ سّرّشّ، سّرّشّ فَن دَاشِ، نُن شَنُنتٍيَ سّرّشّ بَ، عَ نَشَ فٌرٌ كٍلِقٍ سّرّشّبَدٍ سّيتِيٍ مَ.

²³عَننَبِ مُنسَ نُن هَرُنَ نَشَ سٌ هْرْ مْلِنفِرَ كُي. عٍ تٌ مِنِ، عٍ نَشَ دُبَ حَمَ بّ. نَ تّمُي عَلَتَلَ شَ نْرّ نَشَ مِنِ حَمَ مَ.

²⁴عَلَتَلَ نَشَ تّ رَفٌرٌ سّرّشّبَدٍ قَرِ، عَ سّرّشّ فَن دَاشِ نُن تُرٍ فَن. حَمَ تٌ نَ تٌ، عٍ نَشَ عٍ شُي عِتٍ سّيوّ رَ، عٍ عٍ قٍلٍن بْشِ مَ.