لٍوِ سّرّشّدُبّ 6:1-14

¹عَلَتَلَ نَشَ عَ مَسٍن عَننَبِ مُنسَ بّ،

²«يِ يَامَرِ سٌ هَرُنَ نُن عَ شَ دِيٍ يِ رَ؛ سّرِيّ نَن يَ سّرّشّ فَن دَاشِ شَ قٍ رَ. سّرّشّ فَن دَاشِ شَ لُ سّرّشّبَدٍ قَرِ كْي رَ، عَ شَ فَن هَن فّيسّفّ.

³سّرّشّدُبّ شَ دٌنمَ رَفٌرٌ عَ مَ، عَ شَ وَنتَنيِ قِيشّ قَنيِ سٌ عَ رَ، عَ شَ تّ شُبٍ بَ سّرّشّ فَن دَاشِ بُن مَ، عَ عَ سَ سّرّشّبَدٍ سّيتِ مَ.

⁴عَ نَ فّ نَ وَلِ رَ، عَ شَ عَ شَ دُفِ قَنيِ بَ عَ مَ، عَ شَ دُفِ فبّتّ رَفٌرٌ عَ مَ، عَلَكٌ عَ شَ نَ تّ شُبٍ شَنِن حَمَ يٌنكِندٍ قَرِ مَ، يِرٍ سّنِيّنشِ.

⁵تّ نَشَن دّشّشِ سّرّشّبَدٍ بُن مَ، نَ نَشَ شُبٍن. فّيسّفّ بِرِن سّرّشّدُبّ شَ يٍفٍ رَدْشْ، عَ شَ تّ شُرُ، عَ سّرّشّ فَن دَاشِ سَ نَ قَرِ. عَ شَنُنتٍيَ سّرّشّيٍ تُرٍ قَن فَنمَ نَا نّ.

⁶نَ تّ دّشّمَ تّمُي بِرِن سّرّشّبَدٍ بُن مَ، عَ مُ شُبٍنمَ.»

⁷«سّرِيّ نَن يَ سَنسِ شْرِ دِنشِ سّرّشّ شَ قٍ رَ. هَرُنَ شَ دِيٍ شَ قَ نَ سّرّشّ رَ سّرّشّبَدٍ ﭑ تَن عَلَتَلَ يَ عِ.

⁸سّرّشّدُبّ شَ سُشُ كٍرٍن كْ سَنسِ شْرِ دِنشِ رَ، عَ نُن تُرٍ، عَ نُن سُرَيِ نَشَن بِرِن سَمَ عَ قَرِ، عَ شَ نَ بِرِن فَن سّرّشّ تْنشُمَ رَ سّرّشّبَدٍ قَرِ. نَ شِرِ رَقَن ﭑ تَن عَلَتَلَ مَ.

⁹نَشَن لُشِ، هَرُنَ نُن عَ شَ دِيٍ شَ نَ دٌن عَ لّبِنِتَرٍ رَ، هْرْ مْلِنفِرَ تّتّ سّنِيّنشِ كُي.

¹⁰عَ مُ لَنمَ عَ شَ حِن لّبِنِ رَ، بَرِ مَ عَ قَتَنشِ ﭑ مَ سّرّشّ فَن دَاشِيٍ نَن نَ نَشٍيٍ سّنِيّنشِ هَن عَلْ يُنُبِ شَقَرِ سّرّشّ نُن يّتّ رَفبِلٍن سّرّشّ.

¹¹هَرُنَ شَ دِ شّمّيٍ نْمَ نَ دٌندٍ. يَامَرِ نَ عَ رَ وٌ بْنسْي بّ نَشَن مُ كَنَمَ عَبَدَن. مِشِ نَشَن بِرِن عَ مَكْرّ مَ نَ سّرّشّ فَن دَاشِيٍ رَ نَشٍيٍ بَمَ ﭑ تَن عَلَتَلَ بّ، نَ كَنيِيٍ سّنِيّنمَ نّ.»

¹²عَلَتَلَ نَشَ عَ مَسٍن عَننَبِ مُنسَ بّ،

¹³«هَرُنَ تِمَ سّرّشّدُبّ كُنتِفِ رَ لْشْي نَشّ، عَ لَنمَ عَ تَن هَرُنَ نُن عَ شَ دِيٍ شَ سَنسِ شْرِ قَنيِ دِنشِ كٌنبٌ يَ كٍرٍن بَ سّرّشّ رَ. نَ سّرّشّ تَفِ بَمَ فّيسّفّ، بٌورٍ تَفِ بَمَ نُنمَرٍ. نَ مْولِ شَ رَبَ مِشِ تِمَ سّرّشّدُبّ كُنتِفِ رَ تّمُي نَشّ.

¹⁴يِ سَنسِ شْرِ دِنشِ شَ فِلِن تُندٍ كُي، تُرٍ شَ سَ عَ مَ. عَ نَ حْن، عَ شُنتُنيِيٍ شَ فَن تّ شْورَ، عَ شَ قِندِ شِرِ حْشُنمّ رَ عَلَتَلَ بّ.