لٍوِ سّرّشّدُبّ 25:16-30

¹⁶شَ حّ وُيَشِ لُشِ، عَ سَرٍ شَ مَتٍ نَ كِ. شَ حّ وُيَشِ مُ لُشِ، عَ سَرٍ شَ مَفٌرٌ. وٌ شَ عَ مَتٌ شّ شَبَمَ سَنمَيَ يٍرِ بٍينُ شْرّيَ حّ شَ عَ لِ.

¹⁷وٌ نَشَ وٌ بٌورٍ تْورْ نَ كُي. وٌ شَ فَاشُ وٌ مَرِفِ عَلَ يَ رَ. عَلَتَلَ نَن ﭑ نَ، وٌ مَرِفِ عَلَ.»

¹⁸«وٌ شَ ﭑ مَ سّرِيّ سُشُ، وٌ شَ ﭑ مَ يَامَرِيٍ رَبَتُ، عَلَكٌ وٌ شَ لُ يِ بْشِ مَ بْحّسَ كُي.

¹⁹بْشِ دَشَمُي قَمَ وٌ وَ سَدٍ، وٌ مَن سَبَتِمَ بْحّسَ كُي.

²⁰شَ وٌ سَ مَشْرِنيِ تِ يِ كِ، ‹شَ وٌن مُ سٍسٍ سِمَ حّ سٌلٌقٍرٍ ندٍ كُي، شَ وٌن مُ سَنسِ شَبَمَ نَ تّمُي، وٌن بَلٌمَ مُنسٍ رَ قَ؟›

²¹ﭑ تَن نَن بَرَكَ رَفٌرٌ مَ وٌ مَ حّ سٍننِ ندٍ كُي، نَشَن قِندِ مَ بَلٌي رَ وٌ بّ حّ سَشَن بُن مَ.

²²وٌ شَ سَنسِ شْرِ سِ حّ سٌلٌمَسَشَن ندٍ كُي، كْنْ وٌ دٌنسٍ رَفَتَشِ نَن دٌنمَ هَن حّ سٌلٌمَنَانِ ندٍ. دٌنسٍ نَشَن نَفَتَشِ، نَ وٌ رَلِمَ نّ هَن بَلٌي نّينّ سَ مِنِمَ تّمُي نَشّ.»

²³«وٌ نَشَ بْشِ مَتِ عَ شَ لُ وٌ بٌورٍ يِ رَ عَبَدَن، بَرِ مَ ﭑ تَن نَن فبٍ بْشِ رَ. وٌ لُشِ نّ عَلْ شْحّيٍ نَشٍيٍ يِفِيَشِ ﭑ شْنيِ.

²⁴سّرِيّ كِ مَ، وٌ شَ تِن يِ بْشِ بِرِن شُن شَ سَرَ.

²⁵شَ وٌ نفَشَكٍرٍنيِ ندٍ عَ شَ بْشِ مَتِ عَ شَ سٍتَرٍحَ مَ، عَ بَرِبٌورٍ ندٍ شَ نَ بْشِ مَتِشِ شُن سَرَ.

²⁶شَ عَ بَرِبٌورٍ مُ نَ نَشَن نْمَ نَ بْشِ شُن سَرَدٍ، كْنْ عَ تَن نَشَ سَ نَ شُنسَرٍ قّيرّ سْتْ عَ يّتّ رَ،

²⁷عَ شَ بْشِ سَرٍ كْنتِ سّرِيّ كِ مَ، كٍلِقٍ عَ سَرَ تّمُي، عَ قَ نَ حْشْي رَفبِلٍن عَ سَرَ مِشِ مَ، عَلَكٌ عَ شَ فبِلٍن عَ شَ بْشِ مَسْتْ رَ.

²⁸كْنْ شَ عَ مُ نَ شُنسَرٍ قّيرّ سْتْ، نَ بْشِ شَ لُ عَ سَرَ مِشِ يِ رَ هَن شْرّيَ حّ رَ. نَ تّمُي بْشِ كَنيِ مَن شَ فبِلٍن عَ شَ بْشِ مَسْتْ رَ.»

²⁹«شَ مِشِ ندٍ سَ عَ شَ بَنشِ مَتِ نَشَن نَ تَا كُي تّتّ رَبِلِنشِ نَشَن نَ، عَ نْمَ نَ بَنشِ شُن سَرَدٍ حّ كٍرٍن بُن مَ.

³⁰شَ نَ بَنشِ شُن مُ سَرَ نَ حّ كُي، عَ لُمَ نّ عَ سَرَ مِشِ نُن عَ بْنسْي يِ رَ عَبَدَن. هَلِ شْرّيَ حّ كُي عَ سَرَ مِشِ مُ كٍلِمَ نَا.