كْنتِ تِقٍ 18:5-19

⁵وٌ تَن فبَنسَن شَ سّنِيّن لِنفِرَ نُن سّرّشّبَدٍ وَلِ رَبَ، عَلَكٌ عَلَتَلَ نَشَ قَ عَ شَ شْنّ رَ مِنِ عِسِرَيِلَكَيٍ مَ سْنْن.

⁶ﭑ تَن نَن وٌ نفَشَكٍرٍنيِ لٍوِ بْنسْي تٌنفٌشِ عِسِرَيِلَكَيٍ يَ مَ ﭑ يّتّ بّ. ﭑ بَرَ عٍ سَ وٌ سَفٌي، عٍ شَ وٌ مَلِ هْرْ مْلِنفِرَ وَلِ رَبَ رَ.

⁷عِ تَن نُن عِ شَ دِيٍ، وٌ حْشْ سَمَ نّ وٌ شَ سّرّشّدُبّ وَلِ شْن مَ سّرّشّبَدٍ نُن يِرٍ سّنِيّنشِ قِسَمَنتٍ، نَشَن نَ دُفِ فبَكُشِ شَنبِ رَ. ﭑ تَن نَن نَ وَلِ قِشِ وٌ مَ. مِشِ فبّتّ نَ عَ مَسٌ نَ رَ، عَ قَشَمَ نّ.»

⁸عَلَتَلَ نَشَ عَ قَلَ هَرُنَ بّ، «ﭑ بَرَ عِسِرَيِلَكَيٍ شَ هَدِيَ سّنِيّنشِ بِرِن قِ عِ تَن نُن عِ شَ دِيٍ مَ، بَرِ مَ وٌ تَن نَن سُفَندِشِ سّرّشّدُبّيٍ رَ عَبَدَن.

⁹سٍيٍ نَن يِ كِ نَشٍيٍ قِندِ مَ عِ فبٍ رَ سٍ سّنِيّنشِيٍ تَفِ، تّ مُ نَشٍيٍ فَنشِ؛ عِسِرَيِلَكَيٍ شَ سّرّشّ، عٍ شَ سَنسِ شْرِ دِنشِ سّرّشّيٍ، عٍ شَ يُنُبِ شَقَرِ سّرّشّيٍ، نُن عٍ شَ يّتّ رَفبِلٍن سّرّشّيٍ. نَ سّرّشّ سّنِيّنشِيٍ قِندِ مَ عِ تَن نُن عِ شَ دِيٍ نَن فبٍ رَ.

¹⁰وٌ نٍيٍ دٌنمَ نّ عَلْ سٍ سّنِيّنشِيٍ. شّمّ بِرِن نْمَ عٍ دٌندٍ وٌ شَ دٍنبَيَ كُي. سٍ سّنِيّنشِيٍ نَن عٍ رَ وٌ بّ.»

¹¹«سٍ نَشٍيٍ بَشِ عِسِرَيِلَكَيٍ شَ هَدِيَ سّنِيّنشِيٍ رَ، ﭑ نٍيٍ قَن قِمَ نّ عِ مَ، نَشٍيٍ لِنتَنمَ ﭑ يَ عِ عَ مَسٍنقٍ رَ ﭑ فبٍ نَ عَ رَ. ﭑ نَ قِمَ عِ تَن، عِ شَ دِ شّمّيٍ، نُن عِ شَ دِ فِنّيٍ مَ. عِ شَ مِشِ بِرِن نَشٍيٍ سّنِيّنشِ عٍ نْمَ نَ دٌندٍ.

¹²ﭑ مَن بَرَ دَشَمُي سِنفٍيٍ قِ عِ مَ، عِسِرَيِلَكَيٍ نَشٍيٍ بَمَ ﭑ نَ هَدِيَ رَ عَلْ تُرٍ، وّنِ، نُن سَنسِ شْرِيٍ دِنشِ.

¹³دَشَمُي سِنفٍيٍ عٍ قَمَ نَشَن بِرِن نَ ﭑ بّ، نَ بِرِن قِندِ مَ عِ فبٍ نَن نَ. عِ شَ مِشِ بِرِن نَشٍيٍ سّنِيّنشِ عٍ نْمَ نَ دٌندٍ.»

¹⁴«سٍ نَشَن بِرِن هَرَ مُشِ مِشِيٍ بّ عِسِرَيِلَ بْشِ مَ، عَ قَ قِندِ ﭑ فبٍ رَ، ﭑ بَرَ نَ قِ عِ مَ.

¹⁵دِ سِنفٍ بِرِن نَشٍيٍ قِمَ عَلَتَلَ مَ، عَ قِندِ مِشِ رَ، عَ قِندِ شُرُ سٍ رَ، نَ بِرِن عِ تَن نَن فبٍ عَ رَ. كْنْ عِبُنَدَ مَ شَ دِ شّمّ سِنفٍ نُن سُبٍ هَرَ مُشِ شَ دِ شّمّ سِنفٍ، عٍ تَن شُن سَرَ مَ نّ.

¹⁶عٍ نَ كِكٍ كٍرٍن سْتْ، عٍ شُن شَ سَرَ فبٍتِ كٌلٍ سُولِ، نَشَن كٌلٍ كٍرٍن لَنمَ فِرَ مُ قُ مَ.»

¹⁷«كْنْ عِ نَشَ نِنفٍيٍ، يّشّييٍ، نُن سِيٍ شَ دِ سِنفٍيٍ شُن سَرَ، بَرِ مَ عٍ تَن سّنِيّنشِ. عٍ وُلِ شَ كَسَن سّرّشّبَدٍ مَ، عٍ تُرٍ شَ بَ سّرّشّ رَ. عٍ شَ فَن تّ رَ عَلَتَلَ بّ. نَ رَقَن عَ مَ.

¹⁸عٍ فَنيَنيِ نُن عٍ يِرٍقَنيِ تَبٍ قِندِ مَ عِ فبٍ نَن نَ، بَرِ مَ عٍ نُ لِنتَنشِ ﭑ تَن عَلَتَلَ يَ عِ سّرّشّ رَ.

¹⁹ﭑ بَرَ نٍيٍ قِ عِ تَن نُن عِ شَ دِيٍ مَ عَبَدَن، عِسِرَيِلَكَ نَشَن بِرِن بَمَ عٍ شَ سّرّشّ سّنِيّنشِيٍ رَ عَلَتَلَ بّ. سَاتّ نَن عَ رَ نَشَن مُ كَنَمَ عَبَدَن، عِ تَن نُن عِ بْنسْي بِرِن بّ عَلَتَلَ يَ عِ.»