Ʒare Biri 18:5-19

⁵Ehame ŋoŋe furufic â alatare gie bahuc juhapie kimbeŋ aariczi Israe ŋic jaŋere faio mocwâc mi fezejec.

⁶Erâ manakic, no qomâfâcge, Lewiŋic hâcne, Israe ŋic gâcne jaŋeraonec rowosâec‐jopapo, jaŋe Wofuŋ nore biŋe erâ juhuc tutumaŋ qoruc bozere kiŋaŋ gie baniŋte ŋoŋe tahac‐ŋopapo.

⁷Go â ŋokâfâcge ŋoŋe sawa ine alatao â tiri boze maŋnao taha gie banʒepieŋ, gie izi hâcne ŋoŋere biŋe ekac. Taha bapa gie i ŋoŋe hâcne tahac‐ŋopakopac. Ŋic omane moczi gie i bame qâhâmozo.”

⁸Eme Wofuŋzi ʒuhuckerâ Aroŋ ʒiŋuc âzâcnewec: “Manakic, Israe ŋic jaŋe taha wiac sasawa bâtirihuc nare tahac eeŋgopieŋ irec tiwâne gâcne i gore biŋe qakopac. Go â ŋokâfâcge ŋoŋe mimiŋzi ɋâric wiac i nâ bac ehuc juniŋte qikiŋne‐ŋarekopac.

⁹Wiac tirine kecʒiŋuc i ʒoczi mi ʒâtâcneha ŋoŋere biŋe ezejec: Nânâ wiaczi taha bâzi me sâqocne tâtâmire taha bâzi, me kiŋ tatara taha bâzi; taha bâzi wiac‐jeŋic sasawa hâcne nore biŋe râeŋgopieŋ i go â ŋokâfâcge ŋoŋe ŋare tahac epe ro rauc ehuc irec manapie tirine jâmbâŋ ezejec.

¹⁰Ehame ŋoŋe tirificko juhuc nânʒepieŋ, ehuc irec manapie tirine eha ŋiczi sawa nânʒepieŋ.

¹¹Erâ wiac kecʒiŋuc izi wâc ŋoŋere biŋe ezejec: Israe ŋic jaŋe taha wiac fenʒoŋkeeŋgopieŋ i go â ŋokâfâcge ŋoŋere biŋe qape mimiŋzi ɋâric nâ bac erahuc junʒepieŋ. Wiacfâcge jaŋeraonec e me e ɋaɋacne juocmuzi nâzo murâ nâzejec.

¹²Ehame wokemaŋ opâne me waiŋ opâne me padi wiac biaŋne jâmbâŋ me nânâ bâbâsu Wofuŋ nore biŋe qaeŋgopieŋ i go qikiŋne‐garekopac.

¹³Erâ mâreŋ‐jeŋicko wiac nânâne sasawa fuŋkerâ woze qeuc eha Wofuŋ norao râeniŋmu i gore biŋe jaha; ehame wiacfâcge jaŋeraonec e me e ɋaɋacne juocmuzi nâzo murâ nâzejec.

¹⁴Israe ŋic jaŋere ŋondeŋko wiac i me i Wofuŋte biŋe mupaŋkekicne izi gore biŋe jaha efârezejec.

¹⁵Ŋic me qowi mârâc fufua sasawa Wofuŋ nore biŋe râeeŋgopieŋ i gore biŋe jaha ezejec; ehame ŋic mârâc fufua me qowi sâqocne mârâc fufua irec okacne ine moneŋ garepie rozemec.

¹⁶Jaŋe mosa wâŋ bazupie iŋuc ehuc furi‐jeŋic siliwa moneŋ 5 rozemec. Ine furuficte moneŋ hawari fokac irec sâc hâcne rozemec. Gera moneŋ 20 izi ine siliwa moneŋ wâŋ ekac.

¹⁷Bulimakao me lama me noniŋ mârâc fufua jaŋe tiri bozere biŋe eeŋgopieŋte akic‐jopahuc okacne moneŋ mi rozemec. Go socjeŋic alatao tierâ wokemaŋ‐jeŋic ʒocko rike siŋsiŋketec Wofuŋte maio âsu biaŋ fuazejec.

¹⁸Ehame amec siec‐jeŋic fenʒoŋkekicne â ŋefac‐jeŋic gore biŋe eekac irec sâc jaha biuc‐jeŋiczi gore biŋe ezejec.

¹⁹Israe ŋic jaŋe taha wiac tirine no nare tahac eeŋgopieŋ i go â ŋokâfâcge ŋoŋe tahac‐ŋopape ŋoŋere biŋe erâ forahuc juzejec. Wiac izi Wofuŋ nore maio ʒâʒâfic fofosanaŋ erâ go â ɋâricfâcge ŋoŋere biŋe fozejec.”