كْنتِ تِقٍ 14:27-45

²⁷«يِ حَمَ كٌبِ ﭑ مَتَندِ مَ هَن مُن تّمُي؟ ﭑ بَرَ عِسِرَيِلَكَيٍ شُي مّ، عٍ نَشَن قَلَمَ ﭑ بّ، عٍ تِ ﭑ كَنكٍ.

²⁸عَ قَلَ عٍ بّ، ‹ﭑ بَرَ ﭑ كَلِ، نْندِ نَن عَ رَ، عَلْ ﭑ تٌ نَ نَ، ﭑ عَ رَبَمَ نّ وٌ بّ عَلْ ﭑ عَ مّشِ وٌ دّ عِ كِ نَشّ.

²⁹وٌ تَن مَتَندِلَيٍ، نَشَن بِرِن كْنتِشِ عِسِرَيِلَ حَمَ يَ مَ، نَشٍيٍ شَ سِمَيَ بَرَ دَنفِ حّ مْشْحّن نَ، وٌ قَشَمَ نّ يِ فبٍنفبٍرٍنيِ مَ.

³⁰وٌ مُ سٌمَ بْشِ مَ ﭑ نَشَن لَايِدِ وٌ بّ، قٌ يٍقُنٍ شَ دِ شّمّ كَلٍبِ نُن نُنُ شَ دِ شّمّ يٌسُوٍ.

³¹وٌ شَ دِيٍ، وٌ نَشٍيٍ مَ عَ عٍ بِرِن قَشَمَ فٍرٍ نَن كُي، ﭑ نٍيٍ تَن نَسٌمَ نّ نَ بْشِ كُي، وٌ مّيشِ نَشَن نَ.

³²وٌ قَشَمَ فبٍنفبٍرٍنيِ نَن مَ، وٌ قُرٍيٍ لُمَ نَ نّ.

³³وٌ شَ دِيٍ قِندِ مَ حّرّتِيٍ نَن نَ حّ تٌنفٌ نَانِ بُن مَ يِ فبٍنفبٍرٍنيِ مَ. عٍ وٌ شَ يُنُبِ سَرٍ شَنِنمَ هَن وٌ بِرِن قَشَ فبٍنفبٍرٍنيِ مَ.

³⁴وٌ شِ شَسَبِ نَشَن نَبَ نَ بْشِ رَبّندٍ، وٌ نَ حّ شَسَبِ رَبَمَ فبٍنفبٍرٍنيِ مَ وٌ شَ يُنُبِ شَ قٍ رَ. وٌ تٌ شِ تٌنفٌ نَانِ رَبَ نَ بْشِ رَبّندٍ، وٌ قَمَ نّ حّ تٌنفٌ نَانِ رَبَدٍ فبٍنفبٍرٍنيِ مَ، عَلَكٌ وٌ شَ عَ كٌلٌن ﭑ نَ يُنُبِ شْنشِ كِ نَشّ.

³⁵ﭑ تَن عَلَتَلَ، ﭑ بَرَ فّ وْيّندٍ. ﭑ بَرَ نَ نَتّ تٌنفٌ يِ حَمَ كٌبِ شَ قٍ رَ، نَشَن تِ ﭑ كَنكٍ. عٍ بِرِن قَشَمَ نّ فبٍنفبٍرٍنيِ مَ.›»

³⁶مُنسَ شَ شّيرَيٍ تٌ فبِلٍن كٍلِقٍ نَ بْشِ رَبّندٍ، عٍ نَشَ قٍ شْرْشْي قَلَ نَ بْشِ شَ قٍ رَ هَن عِسِرَيِلَ حَمَ نَشَ تِ مُنسَ كَنكٍ.

³⁷نَ كُي، عَلَتَلَ نَشَ عٍ قَشَ كٍرٍن نَ.

³⁸نَ شّيرَيٍ يَ مَ، يٍقُنٍ شَ دِ شّمّ كَلٍبِ نُن نُنُ شَ دِ شّمّ يٌسُوٍ نَن فبَنسَن مُ قَشَ.

³⁹مُنسَ تٌ نَ مَسٍنيِ تِ عِسِرَيِلَ حَمَ بّ، عٍ نَشَ سُننُن كِ قَنيِ.

⁴⁰عٍ نَشَ كٍلِ سُبَشّ مَ، عٍ شَ تٍ فٍيَ لٌنفٌرِ. عٍ نَشّ، «مُشُ شَ تٍ يِرٍ، عَلَتَلَ دّننَشّ مَسٍنشِ مُشُ بّ. مُشُ بَرَ يُنُبِ رَبَ.»

⁴¹مُنسَ نَشَ عٍ مَشْرِن، «وٌ عَلَتَلَ شَ يَامَرِ نَن مَتَندِقٍ؟ وٌ مُ فٍينِمَ نَ كُي.

⁴²وٌ نَشَ تٍ دٍ، بَرِ مَ عَلَتَلَ مُ نَ وٌ يَ مَ سْنْن. وٌ نَشَ عَ نِيَ وٌ يَشُييٍ شَ نْ وٌ رَ.

⁴³عَمَلّكِكَيٍ نُن كَنَانكَيٍ نَ وٌ يَ رَ، عٍ وٌ سْنتْمَ نّ عٍ شَ سَنتِدّفّمَيٍ رَ. وٌ تٌ بَرَ وٌ كٌبٍ سٌ عَلَتَلَ رَ، عَ مُ نَ وٌ قْشْ رَ.»

⁴⁴كْنْ عِسِرَيِلَ حَمَ مُ عٍ تُلِ مَتِ مُنسَ رَ. عٍ نَشَ تٍ فٍيَ يِرٍ، كْنْ عَلَتَلَ شَ سَاتّ كَنكِرَ نُن مُنسَ مُ كٍلِ حَمَ شَ يٌنكِندٍ.

⁴⁵عَمَلّكِكَيٍ نُن كَنَانكَيٍ نَشٍيٍ نُ سَبَتِشِ نَ فٍيَ يِرٍ، عٍ نَشَ فٌرٌ عِسِرَيِلَكَيٍ شِلِ مَ، عٍ قَ عٍ بْنبْ، عٍ عٍ مَسّفّ هَن هٌرٌ مَ.