كِيتِسَيٍ 7:16-24

¹⁶عَ نَشَ يِ شّمّ مِشِ كّمّ سَشَن عِتَشُن دْشْ سَشَن نَ. عَ قَ قٍرِ نُن قّحّ لَنمَدِيٍ سٌ عٍ بِرِن يِ رَ، تّ نَ قّحّيٍ كُي.

¹⁷عَ نَشَ عَ قَلَ عٍ بّ، «وٌ شَ ﭑ مَتٌ، ﭑ نَ نَشَن نَبَ، وٌ قَن شَ نَ رَبَ. ﭑ نّقّ سْورِيٍ يِرٍ لِ، ﭑ نَ نَشَن نَبَ، وٌ قَن شَ نَ رَبَ.

¹⁸مُشُ قٍرِ قٍمَ تّمُي نَشّ، وٌ قَن شَ وٌ فبٍ قٍ سْورِيٍ يٌنكِندٍ رَبِلِنيِ. وٌ شَ عَ قَلَ وٌ شُي عِتٍشِ رَ، ‹عَلَتَلَ نُن فٍدٍيٌن بّ!›»

¹⁹فٍدٍيٌن نُن عَ شَ سْورِ مِشِ كّمّ سَشَن، نَشَ مَدِيَن سْورِيٍ يِرٍ لِ، عٍ عٍ شَ يِرٍ مَكَنتَدٍ مَسَرَ كْي تَفِ تّمُي نَشّ. عٍ نَشَ قٍرِ قٍ، عٍ قّحّيٍ عِبْو.

²⁰يِ مِشِ كُرُ سَشَنيِيٍ نَشَ قٍرِ قٍ، عٍ نَشَ قّحّيٍ عِبْو، تّ سُشُشِ عٍ كْولَ بّلّشّيٍ رَ، قٍرِ سُشُشِ عٍ يِرٍقَنيِ بّلّشّيٍ رَ عٍ نَشَن قٍمَ. عٍ نُ قَ عَ قَلَ عٍ شُي عِتٍشِ رَ، «وٌن شَ فٍرٍ سٌ عَلَتَلَ نُن فٍدٍيٌن بّ.»

²¹عٍ بِرِن نَشَ تِ عٍ تِدٍ، مَدِيَن سْورِيٍ رَبِلِنيِ. مَدِيَنكَيٍ نَشَ عٍ فِ، عٍ سِفَ سْنشْ رَ.

²²عِسِرَيِلَ سْورِ مِشِ كّمّ سَشَنيِيٍ نُ قٍرِ قٍ تّمُي نَشّ، عَلَتَلَ نَشَ عَ نِيَ مَدِيَنكَيٍ شَ عٍ بٌورٍ قَشَ سَنتِدّفّمَ رَ. سْورِ دْنشْييٍ نَشَ عٍ فِ هَن بٍتِ سِتَ، سٍرٍرَ مَبِرِ، هَن عَبٍلِ مٍشٌلَ، تَبَتِ مَبِرِ.

²³عِسِرَيِلَ شّمّيٍ نَشَ عٍ مَلَن، نَقَتَلِكَيٍ، عَسٍرِكَيٍ، نُن مَنَسِكَيٍ. عٍ بِرِن نَشَ مَدِيَنكَيٍ كٍرِ.

²⁴فٍدٍيٌن نَشَ شّيرَيٍ شّي عٍقِرَ مِ فٍيَيٍ يِرٍ، عٍ شَ عَ قَلَ، «وٌ فٌرٌ مَدِيَنكَيٍ يَ رَ، وٌ سِنفٍ شَ تِ يُرُدّن شُرٍ عِفِرِ مَ دّننَشّ هَن بٍتِ بَارَ.» نَ كُي عٍقِرَ مِ شّمّيٍ نَشَ عٍ مَلَن، عٍ سِفَ يُرُدّن شُرٍ عِفِرِ مَ دّننَشّ، هَن بٍتِ بَارَ.