كِيتِسَيٍ 1:22-29

²²يُسُقُ بْنسْي نَشَ بٍتٍلِ فٍرٍ. عٍ نُن عَلَتَلَ نَن بِرِن نُ عَ رَ.

²³عٍ نَشَ مِشِ شّي بٍتٍلِ، عٍ شَ مّننِ مَتٌ. يِ تَا شِلِ نُ قَلَمَ نّ سِنفٍ رَ نُ لُسِ.

²⁴نَ شّيرَيٍ نَشَ شّمّ ندٍ تٌ، عَ نَ مِنِقٍ تَا كُي. عٍ نَشَ عَ قَلَ عَ بّ، «تَا سٌدٍ مَسٍن مُشُ بّ. مُشُ قَن قٍ قَنيِ رَبَمَ نّ عِ بّ نَ تّمُي.»

²⁵عَ تٌ تَا سٌدٍ مَسٍن عٍ بّ، عٍ نَشَ مّننِكَيٍ قَشَ سَنتِدّفّمَ رَ، كْنْ عٍ نَشَ يِ شّمّ نُن عَ شَ دٍنبَيَ لُ نَ.

²⁶يِ شّمّ نَشَ سِفَ شِتِكَيٍ شَ بْشِ مَ، عَ نَشَ تَا تِ، عَ لُسِ شِلِ سَ عَ شُن. هَن تٌ نَ شِلِ نَن قَلَمَ نَ شُن.

²⁷كْنْ مَنَسِ بْنسْي مُ نْ بٍتِ سَان، تَانَكِ، دْرْ، يِبٍلٍيَمِ، مٍفِدٌ، نُن عٍ شَ بْشِيٍ مَسْتْدٍ. كَنَانكَيٍ مُ تِن كٍلِدٍ نَ بْشِ مَ.

²⁸عِسِرَيِلَ تٌ سّنبّ سْتْ عَ قَنيِ رَ، عٍ نَشَ كَنَانكَيٍ قِندِ عٍ شَ كٌنيِيٍ رَ، كْنْ عٍ مُ عٍ كٍرِ.

²⁹عٍقِرَ مِ بْنسْي قَن مُ نْ كَنَانكَيٍ كٍرِدٍ نَشٍيٍ نُ سَبَتِشِ فٍسٍرِ. كَنَانكَيٍ نَشَ لُ نَا عٍقِرَ مِكَيٍ يَ مَ.