عِسِرَيِلَ مَنفّيٍ ١ 2:25-42

²⁵مَنفّ سُلٍمَنِ نَشَ يٍهٌيَدَ شَ دِ بّنَيَ يَمَرِ، عَ شَ سَ عَدٌنِيَ قَشَ. عَ رَبَ نَ كِ نّ.

²⁶نَ دَنفِ شَنبِ، مَنفّ نَشَ عَ قَلَ عَبِيَتَرِ سّرّشّدُبّ بّ، «سِفَ عِ شْنيِ عَنَتْتِ بْشِ مَ. عَ لَن عِ شَ قَشَ، كْنْ ﭑ بَرَ دِحّ بَرِ مَ عِ عَلَ شَ سَاتّ كَنكِرَ شَنِن نّ ﭑ بَبَ دَوُدَ يَ عِ، عِ مَن تْورْ نّ ﭑ بَبَ شَ تْورّ.»

²⁷سُلٍمَنِ عَبِيَتَرِ كٍرِ نَ كِ نّ. نَ كُي عَلَتَلَ شَ مَسٍنيِ نَشَ كَمَلِ، عَلَ نَشَن مَسٍن عٍلِ بْنسْي شَ قٍ رَ سِلٌ.

²⁸يٌوَبَ نُ بَرَ عَدٌنِيَ مَلِ مَنفّ مَتَندِدٍ، كْنْ عَ مُ نُ نَ عَبِسَلٌمِ تَن شَ مَنفّ مَتَندِقٍ كُي. نَ كُي، عَ تٌ قٍ مّ سُلٍمَنِ نَشَن نَبَ، عَ نَشَ عَ فِ، عَ سِفَ هْرْ مْلِنفِرَ كُي، عَ سَ سّرّشّبَدٍ قٍرِيٍ سُشُ.

²⁹مِشِيٍ تٌ عَ قَلَ مَنفّ سُلٍمَنِ بّ، عَ يٌوَبَ بَرَ عَ فِ عَ سِفَ هْرْ مْلِنفِرَ كُي سّرّشّبَدٍ يِرٍ، مَنفّ سُلٍمَنِ نَشَ يٍهٌيَدَ شَ دِ بّنَيَ يَمَرِ، «سَ عَ قَشَ!»

³⁰بّنَيَ نَشَ سِفَ عَلَتَلَ شَ هْرْ مْلِنفِرَ، عَ عَ قَلَ عَ بّ، «مَنفّ نَشّ عِ شَ مِنِ.» عَ نَشَ عَ يَابِ، «ﭑ تٌندِ! ﭑ شَ قَشَ بٍ!» بّنَيَ نَشَ سَ يٌوَبَ شَ وْيّنيِ دّنتّفّ مَنفّ بّ.

³¹مَنفّ نَشَ عَ قَلَ بّنَيَ بّ، «عِ شَ عَ رَبَ عَلْ عَ عَ قَلَشِ كِ نَشّ. عِ نَ عَ قَشَ، عَ رَفَتَ. نَ كُي عِ قَمَ ﭑ تَن نُن ﭑ مَ دٍنبَيَ رَتَنفَدٍ يٌوَبَ شَ وُلِ رَ مِنِشِ قُقَقُي مَ.

³²عَلَتَلَ قَمَ نَ يُنُبِ سَرٍ رَفبِلٍندٍ عَ تَن نَن مَ، بَرِ مَ عَ مِشِ قِرِن قَشَ نّ نَشٍيٍ نُ تِنشِن عَ تَن بّ، نَشٍيٍ شَ قٍ بِنيّ نُ دَنفِ عَ تَن فبٍ رَ. ﭑ بَبَ دَوُدَ مُ نُ عَ كٌلٌن عَ نٍرِ شَ دِ عَبٍنٍرِ نُن يٍتٍرِ شَ دِ عَمَسَ، عِسِرَيِلَ سْورِيٍ شَ مَنفّيٍ قَشَ يٌوَبَ شَ سَنتِدّفّمَ نَن سَابُي رَ.

³³عٍ وُلِ سَرٍ دْشْمَ يٌوَبَ نُن عَ بْنسْي نَن شُن مَ عَبَدَن، كْنْ عَلَتَلَ شَ هِننّ نَن لُمَ دَوُدَ، عَ بْنسْييٍ، عَ شَ دٍنبَيَ نُن عَ شَ مَنفّيَ مَ.»

³⁴يٍهٌيَدَ شَ بّنَيَ نَشَ سِفَ، عَ سَ يٌوَبَ قَشَ، عَ عَ رَفَتَ عَ شْنيِ فبٍنفبٍرٍنيِ مَ.

³⁵مَنفّ نَشَ يٍهٌيَدَ شَ دِ بّنَيَ قِندِ سْورِيٍ شَ مَنفّ رَ. عَ نَشَ سَدْكِ سّرّشّدُبّ تِ عَبِيَتَرِ حْشْي رَ.

³⁶مَنفّ نَشَ شّيرَ تِ سِمٍيِ مَ، عَ عَ قَلَ عَ بّ، «بَنشِ ندٍ تِ دَرِ سَلَمُ، عِ لُمَ دّننَشّ. عِ نَشَ مِنِ تَا كُي دٍ.

³⁷عِ نَ سٍدِرٌن شُرٍ عِفِرِ لْشْي نَشّ مِنِقٍ رَ تَا كُي، عِ قَشَمَ نَ لْشْي يَتِ نّ.»

³⁸سِمٍيِ نَشَ مَنفّ يَابِ، عَ نَشّ، «عَوَ يِرٍ، عِ تَن ﭑ مَرِفِ نَشَن قَلَشِ، ﭑ نَ نَن نَبَمَ.» سِمٍيِ نَشَ بُ دَرِ سَلَمُ كِ قَنيِ،

³⁹كْنْ حّ سَشَن تٌ دَنفِ، عَ شَ كٌنيِ قِرِن نَشَ عٍ فِ عٍ سِفَ مَاكَ شَ دِ عَكِسِ شْنيِ، فَتِ مَنفّ. مِشِ ندٍيٍ تٌ عَ قَلَ عَ بّ، «عِ شَ كٌنيِ قِرِن نَ فَتِ،»

⁴⁰عَ نَشَ تٍ عَ شَ سٌقَلٍ قَرِ، عَ سِفَ عَ شَ كٌنيِيٍ قْشْ رَ فَتِ، عَكِسِ شْنيِ. عَ تٌ عٍ مَسْتْ، عَ نَشَ عٍ رَفبِلٍن.

⁴¹مِشِ ندٍ نَشَ سَ نَ قَلَ مَنفّ بّ، عَ سِمٍيِ مِنِ نّ دَرِ سَلَمُ، عَ سِفَ فَتِ، عَ مَن فبِلٍن.

⁴²مَنفّ نَشَ سِمٍيِ شِلِ، عَ عَ قَلَ عَ بّ، «ﭑ مُ ﭑ كَلِ عَلَتَلَ رَ شّ عِ يَ شْرِ، قَ عَ قَلَ، ‹شَ عِ مِنِ دَرِ سَلَمُ تَا كُي، ﭑ عِ قَشَمَ نّ نَ لْشْي يَتِ؟› عِ مُ عَ قَلَ شّ ﭑ بّ عَ عِ ﭑ شُي سُشُمَ نّ عَ قَنيِ رَ؟