تَالِيٍ 21:3-20

³وٌ شَ بِرَ نْندِ نُن تِنشِنيِ قْشْ رَ. نَ رَقَن عَلَتَلَ مَ دَنفِقٍ سّرّشّ رَ.

⁴يّتّ عِفبٌحَ نُن قٍ حَاشِ رَبَقٍ، نَ بِرِن قِندِشِ يُنُبِ نَن نَ.

⁵وَكِلِلَ هَرِفٍ شُن مَسَمَ نّ، كْنْ فبَتَ فبٍفبٍ قِندِ مَ تْورّ نَن نَ.

⁶هَرِفٍ نَشَن سْتْشِ وُلٍ رَ، عَ مُ بُمَ، عَ مِشِ شَنِنمَ نّ عَلِفِيَمَ.

⁷مِشِ حَاشِيٍ شُن نَكَنَمَ نّ، بَرِ مَ عٍ مُ تِنشِنيِ رَبَتُمَ.

⁸مِشِ كٌبِ مُ تِنشِن، كْنْ مِشِ قَنيِ عَ حّرّ مَ كِرَ تِنشِنشِ شْن مَ.

⁹لُقٍ رَ بَنشِ قَرِ مَ، عَ قِسَ لُقٍ رَ فِنّ فٍرٍ سٌي سّيتِ مَ بَنشِ كُي.

¹⁰مِشِ حَاشِ وَ مَ قٍ حَاشِ نَن تُن شْن مَ. عَ مُ كِنِكِنِمَ مِشِ يٌ مَ، هَلِ دْشْبٌورٍ.

¹¹شَشِلِتَرٍ نَ عَ تٌ عٍ مِشِ مَيٍلٍ حَشَنكَتَمَ، عَ شَشِلِ دِ سْتْمَ نّ، كْنْ شَشِلِمَ تَن قَهَامُي سْتْمَ لْننِ نَن كُي.

¹²عَلَ نَشَن تِنشِن، عَ مِشِ حَاشِ مَتٌمَ نّ، عَ عٍ شُن نَكَنَ.

¹³مِشِ نَشَن تٌندِ مَ عَ تُلِ مَتِدٍ سٍتَرٍ وَ شُي رَ، عَ قَن قَمَ نّ وَدٍ، مِشِ مُ عَ تُلِ مَتِمَ عَ رَ.

¹⁴بْحّتٍ كِقٍ فُندٌ رَ، عَ بْحّ رَفٌرٌ مَ نّ. مِشِ كِقٍ سُتُرّ رَ، عَ شَ شْنّ مَفٌرٌ مَ نّ.

¹⁵حّرّقٍ تِنشِنيِ كُي، نَ قِندِشِ سّيوّ نَن نَ تِنشِنتْي بّ، كْنْ نَ حّرّ كِ مْولِ مُ رَقَن مِشِ حَاشِ مَ.

¹⁶مِشِ نَشَن فبِلٍنمَ كِرَ قَنيِ قْشْ رَ، نَ قَمَ نّ لُدٍ مِشِ قَشَشِيٍ يَ مَ.

¹⁷مِشِ نَشَن بِرَ مَ عَ وَشْنقٍ فبَنسَن قْشْ رَ، نَ لُمَ نّ سٍتَرٍحَ كُي. مِشِ نَشَن وّنِ نُن دٌنسٍ قَنيِ تُن قٍنمَ، نَ مُ بَننَمَ.

¹⁸مِشِ حَاشِ قِندِ مَ تِنشِنتْي شُنسَرٍ نَن نَ، يَنقَنتٍ قِندِ مِشِ قَنيِ شُنسَرٍ رَ.

¹⁹لُقٍ رَ فبٍنفبٍرٍنيِ مَ، عَ قِسَ لُقٍ رَ فِنّ قِتِنّتْي سّيتِ مَ.

²⁰هَرِفٍ قَنيِ نُن تُرٍ فبٍفبٍ نَ لْننِلَ شْنيِ، كْنْ لْننِتَرٍ بَرَ عَ فبٍ بِرِن دٌن.