تَالِيٍ 14:12-35

¹²مِشِ حْشْ عَ مَ عَ عَ حّرّ كِ قَن، عَ قَ لِ كْرّ عَ نَ فبَلٌي كِرَ نَن شْن مَ.

¹³مِشِ نْمَ يٍلٍدٍ عَ دّ رَ، عَ تْورْشِ عَ بْحّ كُي. سّيوّ نْمَ مَقِندِدٍ تْورّ رَ.

¹⁴مِشِ حَاشِ يٌ، مِشِ قَنيِ يٌ، عٍ بِرِن عٍ شَ وَلِ سَرٍ سْتْمَ نّ.

¹⁵شَشِلِتَرٍ لَمَ نّ مِشِ بِرِن شَ مَسٍنيِ رَ، كْنْ شَشِلِمَ كِرَ مَتٌمَ نّ بٍينُ عَ شَ بِرَ نَ قْشْ رَ.

¹⁶شَشِلِمَ فَاشُمَ نّ عَلَ يَ رَ، عَ قَ فبِلٍن قٍ حَاشِ قْشْ رَ، كْنْ شَشِلِتَرٍ تَن سٌمَ نّ نَ قٍ حَاشِ كُي مَقُرٍن.

¹⁷مِشِ نَشَن بْحّ تٍمَ مَقُرٍن، عَ دَشُحَ نَن نَبَمَ. مِشِ مَدَشُي مُ رَقَن مِشِ يٌ مَ.

¹⁸دَشُحَ قِندِ مَ نّ شَشِلِتَرٍ كّ رَ، شَشِلِمَيٍ تَن لْننِ نَن سْتْمَ.

¹⁹مِشِ حَاشِيٍ قَمَ نّ عٍ شِنبِ سِندٍ تِنشِنتْييٍ بُن مَ، عٍ كَنتَرِ نَن قٍنمَ تِنشِنتْييٍ شْنيِ.

²⁰سٍتَرٍ رَحَاشُ بِرِن مَ، هَلِ عَ دْشْبٌورٍ، كْنْ بَننَ رَقَن مِشِ فبٍفبٍ مَ.

²¹مِشِ نَشَن يٌمَ عَ نفَشَكٍرٍنيِ مَ، عَ بَرَ يُنُبِ سْتْ، كْنْ نَشَن كِنِكِنِ تْورْ مِشِ مَ، نَ بَرَ سّيوّ سْتْ.

²²مِشِ نَشٍيٍ قٍ حَاشِ مَحْشُنمَ، نٍيٍ بْنْمَ نّ. كْنْ نَشٍيٍ قٍ قَنيِ مَحْشُنمَ، نَ كَنيِيٍ مَرَقَنيِ نُن نْندِ نَن تٌمَ.

²³فٍينِ نَ وَلِ بِرِن كُي، كْنْ وْيّنيِ فبَنسَن قِندِ مَ سٍتَرٍحَ نَن نَ.

²⁴بَننَيَ نَن نَ لْننِلَ سَرٍ رَ، دَشُحَ نَن تُن لُمَ لْننِتَرٍ تَن يِ رَ.

²⁵سٍيدٍ نْندِ قَلّ مِشِ نِي رَتَنفَمَ نّ، كْنْ وُلٍ قَلّ مِشِ مَدَشُمَ تُن.

²⁶مِشِ نَشَن فَاشُ عَلَتَلَ يَ رَ، عَ تَن نُن عَ شَ دِيٍ لُمَ نّ كَنتَرِ كُي.

²⁷عَلَتَلَ شَ يَرَفَاشُي سِمَيَ قِمَ نّ مِشِ مَ، عَلَكٌ عٍ شَ رَتَنفَ فَنتَنيِ مَ نَشَن قِندِ مَ قَشّ رَ.

²⁸حَمَ شَ فبٌي قِندِ مَ مَنفّ شَ شُننَكٍلِ نَن نَ، كْنْ حَمَ شَ شُرُنيِ قِندِ مَ مَنفّ شَ شُننَفٌرٍ نَن نَ.

²⁹شَشِلِمَ بْحّ تٍ شْنْ، كْنْ شَشِلِتَرٍ عَ شَ دَشُحَ مَسٍنمَ نّ عَ شَ بْحّ تٍ سَابُي رَ.

³⁰بْحّسَ قِندِ مَ سِمَيَ نَن نَ، كْنْ مِلّ تَن قِندِ مَ قُرٍ نَن نَ.

³¹نَشَن سٍتَرٍ تْورْ مَ، نَ بَرَ يٌ سٍتَرٍ دَا مَنفّ مَ، كْنْ نَشَن كِنِكِنِ سٍتَرٍ مَ، نَ بَرَ عَ دَا مَنفّ مَتْشْ.

³²مِشِ حَاشِ شَ حَاشُحَ عَ شُن نَكَنَمَ نّ، كْنْ تِنشِنتْي كَنتَرِ سْتْمَ نّ هَلِ قَشّ يَ عِ.

³³لْننِ نَ شَشِلِمَ بْحّ كُي، شَشِلِتَرٍ يَتِ نْمَ نَ تٌدٍ.

³⁴تِنشِنيِ بْشِ رَ سِفَمَ نّ يَرٍ، يُنُبِ تَن حَمَ رَيَافِمَ نّ.

³⁵وَلِكّ لْننِلَ رَقَن مَنفّ مَ، كْنْ عَ وَلِكّ يَافِتَرٍ تَن شْنمَ نّ.