Átus 10:3-31

³Pahay hawkri daraka kamuw, pahapwi ahj Uhokri giwatni hiyapkiswe ta git giwtrikpeynen. Ig kiyapwiye Kornélyu hiyapri huwewe. Igme ahj danuh ta git, ig awna:

⁴―Kiyapwiye Kornélyu. Igme kiyapwiye Kornélyu wadisasew. Ig ipeg ta gimkat. Ig kaytwa giwn: ―Kiyapwiye, pariye pimawkan nuthu? Igme ahj awna git: ―Uhokri timá pipigyepkawni. Ig hiyá ku samah pis amnih madiptapye. Inneki keh ig kiyepi.

⁵Kuri, awahkisnaba hiyeg ta apitit paytwempu Jopi adahan giwepten pahapwi awayg kewye Simawh Pedru.

⁶Ig msakwa ayge gimun kiyapwiye Simawh, ku pariye gannipwi mtibdihne puwikne amar. Ig kiyapwiye Simawh gipin msakwa kennesa akigbimna mahakwa.

⁷Pisenwa gawnhan inakni yuwit, ig ahj tipik. Igme kiyapwiye Kornélyu watihe piyana gihiyega ayta git gikak pahapwi suwtat ku pariye gikapriwten. Igme suwtat ig hawwata kiyatha Uhokri.

⁸Igkis danuh atere, ig kiyapwiye Kornélyu ekke gitkis madikte ku pariye danuh git. Ayteke ig awna gitkis: ―Ataknabay kuri ta apitit paytwempu Jopi. Igkisme tipik.

⁹Hewke akiw igkis kennesmin gidawnhankis ta apitit paytwempu Jopi, igme kiyapwiye Pedru ayge Jopi. Kabá puwip kamuw ig wagehe ta inut ta amadgat payt ahigwi adahan ig piriyepkewne.

¹⁰Ayge ig kamax matipwa. Ku samah ig wahepnete hiyeg agikune payt ahegbetenete im, ig Uhokri hiyapkis git giwtyakpeynen.

¹¹Pahaye adahan ig hiyá en woke. Ayteke ig hiyá pahak arikna kewa pahak dagambe in muhuke ayte inutak ta waygboit ay giwtrikumpi. In muhuksaka ta git ke wotbe in kamaxkenenbe paxnika ntusi.

¹²Puwikne madikte pahaymkute nimadga. Hawwata kawwamnepwi akak kuhipra egnes aygwata.

¹³Ayteke ig timá pahá ikupimnat awna ta git. In awna: ―Pedru. Kannikaw kuri. Asá umah nerras puwikne adahan pis ax.

¹⁴Igme kiyapwiye Pedru kaytwa giwn: ―Kawa, Kiyapwiye. Nah ka axti akebyi inere im. Amekene Moís gikumadukan awna amin ini puwikne ku in ka kabay adahan usuh ax. Ka hiyá nahma pataha nubiyhu akak ini patahwaki.

¹⁵Inme ikupimnat awna ta git akiw. In awna: ―Ku pariye Uhokri kuwis barewpithe ka hiyá pisma ikiyin ku in patahwapye.

¹⁶Ayteke ig kiyapwiye Pedru hiyá in danuh git pimaput akiw. Pisenwa ini kene dagambe in iwepka ta inugikut akiw.

¹⁷Ayteke ig kiyapwiye Pedru ipegminene gihiyakemni adahan inere ku samah Uhokri gakkan ta git. Nikwenéwa apim ini ig kiyapwiye Kornélyu giwatnipwi danuh atere. Igkis ayá gak kiyapwiye Simawh gipin igkis utepni. Igkis danuh ta anumekut alappota.

¹⁸Ayteke nikwe igkis kabiman ta gitkis hiyeg agikune payt. Igkis awna: ―Ba kiyapwiye Simawh Pedru msakwa ay?

¹⁹Igme kiyapwiye Pedru gidukwenewa ayhté inut ig ipegminene gihiyakemni gimin Uhokri gakkan git. Amun ini ig Uhokri Gitip awna ta git: ―Mpana awaykemni danuh atan piyawesetni.

²⁰Ahegbetaw kuri. Muhuk gimkatkis. Ataknaba gihaptikis. Ka muwaka pukuhpaw gapitkis mmanawa nahwa awahkisrikis pimin.

²¹Ig kiyapwiye Pedru timapni henne, ig muhuke. Ig awna ta gitkis nerras hiyeg: ―Nahnewa Pedru. Pariye yimawkan nuthu?

²²Igkisme kaytwa giwn: ―Pahapwi romayene suwtat gikiparakis kewye Kornélyu ig awahkise usuh pimin. Ig kibeyne awayg. Ig kiyatha Uhokri. Madikte judeyenepwi kabayhig. Amakohnokwa ig Uhokri awahkis pahapwi ahj gimin. Igme ahj awna git adahan ig awnasap ta gipinwat adahan ig timepne piwn.

²³Ig kiyapwiye Pedru timapni inakni henne, ig awnasa nerras awaykemni adahan igkis mpiyasenes mtipka ayge gimun. Igkis msekwe. Hewke ig tipik gihaptikis. Igkisme gaytakkis Jesus gihiyegapu ayge Jopi igkis hawwata tipik gihaptikis.

²⁴Hewke akiw ig danuh ta apitit paytwempu Sesaréya. Igme kiyapwiye Kornélyu ayipa wahapri ayge gipinwa. Ig pahadgupu gikakkis gikebyupwi gikakkis gidahewektenpu ku pariye gawnasanpu atere.

²⁵Ayteke nikwe ig kiyapwiye Pedru danuh atere. Ig kiyapwiye Kornélyu hiyapni henne, ig atere patiptakig. Ig paberetusaw gitiput adahan gadohepketni.

²⁶Igme kiyapwiye Pedru hiyapni henne, ig kannikasig. Ig awna git: ―Kannikawnaba. Nah he awaygnenwa amadgaya inin ke pisbe.

²⁷Igme kiyapwiye Kornélyu kannikaw. Ayteke nikwe igkis kinetihwenes pawtak, igkis pareke paytrikute. Ayge ig kiyapwiye Pedru hiyá kaayhsima hiyeg pahadgupu.

²⁸Ig hiyapni henne, ig awna ta gitkis: ―Yis hiyakni ku samah usuh hiyeg judeyenepwi ka hiyá usuhma darihwak gikakkis hiyeg ku pariye kane judeyenepwima kema yisma. Ka hiyá usuhma danuhpa gitkis. Amekene Moís gikumadukan awna ku in ka kabay adahan usuh keh henne mmanawa wothu ignes patahwapye hiyeg. Henneme amaka ig Uhokri akki nuthu ku nah ka hiyá nahma ikiy nawenépwi hiyeg ku ignes ka kibeynepwima ku ignes patahwapye.

²⁹Nikwe ku aysaw yis wasapanaw numinhu nah ka pukuhpaw yapit. Nah ayta kibentenwa yit. Kuri, uyay akki nuthu ku samah yis wasapanaw numinhu.

³⁰Igme kiyapwiye Kornélyu kaytwa giwn: ―Amakohnokwa nah piriyepkewne ay nupinwa daraka kamuw ke apimbe inin. Pahaye adahan nah hiyá pahapwi ahj tabir nupetun. Gisimsa tigigihwe.

³¹Ig awna nuthu: “Kiyapwiye Kornélyu. Uhokri kuwis timap pipigyepkawni. Ig kiyé ku samah pis amnih madiptapye.