ZĨRINƆ 12:9-20

⁹Ben Pita bↄ̀ à tɛ̀zi. Èe yã kɛ̀ malaika e kɛɛnɛ dↄ̃ yãpuraa ũro, èe daa nanaan ée oo.

¹⁰Aↄ̃ gɛ̃̀tɛ gudãkpari káakula kↄ̃n à plaadeeo, ben aↄ̃ kà bĩilɛa. Bĩilɛ pì gbà nɛ́ mↄ̀mɛ, ben à wɛ̃̀ńnɛ kↄ̃n a zĩndao. Aↄ̃ bↄ̀ɛ aↄ̃ↄe gɛ̃ɛ wɛ́tɛn, ben gwe gↄ̃ↄ malaika pì Pita tò zɛ́daa guu.

¹¹Kɛ̀ Pita wɛ́ɛ kɛ̃̀kↄ̃a à bè: Má dↄ̃ sãnsãn sa kɛ̀ Dii a malaika zĩ̀, lɛ à ma bↄ Hɛrↄdu ↄzĩ kↄ̃n yã kɛ̀ Yudanↄ wɛ́ɛ dↄzi wà kɛmɛɛo píngi.

¹²Kɛ̀ à làakari sù, à gàa Yohana kɛ̀ wè benɛ dↄ Maaku da Mariama bɛ. Wà kakↄ̃ana gwe pari wèe adua kɛɛ.

¹³Kɛ̀ à gãnu gbà lɛ̀, ben nↄgbɛ̃ zĩkɛri kɛ̀ wè benɛ Roda gàa gwa.

¹⁴Kɛ̀ à Pita kòto dↄ̃̀, pↄnnaa guu èe zɛ́ wɛ̃ro, à bàa lɛ̀ à ɛ̀ara à gàa à bèńnɛ Pita zɛ kpɛɛlɛa.

¹⁵Wà bènɛ: Ĩa e kaamman yↄ́? Ben à zɛ̀o kɛ̀ yãpuramɛ. Ben wà bè: À malaikamɛ.

¹⁶Pita kpɛ́ èe gbà lɛɛ. Kɛ̀ aↄ̃ↄ wɛ̃̀, aↄ̃ à è, ben yã pì bↄ̀ ń saɛ.

¹⁷Ben à ↄ kɛ̀ńnɛ yáku aↄ̃ yĩtɛ, ben à tↄ̃̀kɛ̃ńnɛ lán Dii a bↄ kpɛ́siaan nà. Ben à bè: À gá à o Yemisinɛ kↄ̃n wa gbɛ̃ kpaaanↄ. Ben à bↄ̀ à gàa gu pãndea dↄ.

¹⁸Kɛ̀ guu dↄ̀, zↄka gbãaa gɛ̃̀ sozanↄ dagura aↄ̃ↄe kↄ̃ lalaa: Bↄ́ bé à Pita lè?

¹⁹Hɛrↄdu bè wà à wɛtɛ. Kɛ̀ wèe à ero, ben à yã làla gudãkpari pìnↄa, ben à bè wà ń dɛdɛ. Beee gbɛra Hɛrↄdu bↄ̀ Yudea à gàa à gurↄplaa kɛ̀ Sizarea.

²⁰À pↄ fɛ̃̀ Tayadeenↄ kↄ̃n Sidↄ̃deenↄzi maamaa, ben gbɛ̃ beeenↄ lɛdolɛ kɛ̀ aↄ̃ mↄ̀ à gwa lɛdo. Aↄ̃ gàa kína pì bɛgwari Blasatu kiia. Kɛ̀ Blasatu ń yãzɛ è, aↄ̃ gàa lɛdolɛ kɛ kↄ̃n Hɛrↄduo, zaakɛ aↄ̃ bùsu pↄ́blee è bↄ à bùsummɛ.