Yum̃aena Lala 10:4-29

⁴Ana pogos nap̃a Konilias naga pisu navisi nene, naga sinena kona pap̃isi, ana naga pisu manene navisi nene, naga pisa pisape “?Ya ne?” Ana navisi nene pisatam̃ea, pisape “Ntewa naga sum̃a mloge ke kiom̃a leniena la rui, ana naga pe sinena p̃esan re kiom̃a p̃elaga wo la poli nap̃a ko okila ke pa la nap̃a limala korena, ana naga kekarania a sitom̃al ko ke na wa.

⁵Ana naga pisa pan ko, pisape ko na monar oligan kiom̃a yeririna lap̃asia ava garu kumali nap̃a Sop̃a, vena avio yaru tai, nap̃a kiena kia wetelu, kien kia Saemon Pita, vena naga imi e yo nini.

⁶Ana yaru nene naga sike puna yaru tap̃ena tai, naga kiena kia m̃ena Saemon, naga m̃ana yum̃a m̃eke garo lavisin sive, naga yaru na yum̃aenen suri lala e kulus nen puluk.”

⁷Ana navisi kiena ne Ntewa nene pisawal pa pania, ana kovio sina ga. Ana Konilias pio kiena yaru na yum̃aena la lua, amio m̃ena ga kiena yaru na kilaen mara tai nap̃a naga m̃ena ga pe yaru na lotunen Ntewa, nap̃a naga sum̃a amio naga silaga, pisuar naga, ana yeririna la telu nene apimi puna.

⁸Ana naga pisawal sur punu ga nene pan la telu nene, siraunia ana naga mligan la apa garu pulkumali nap̃a Sop̃a, vena aure Pita imi.

⁹Ana legiena na peni, pogos nap̃a la nene amial ke apimi Sop̃a na wa, Pita naga sike na, ana naga sinenan pisape kila leniena na kolpae, ana sa nap̃a silaga, naga pa metava e yotop na wosoyum̃a nap̃a naga sike ea.

¹⁰Naga sike e nene wa, ana naga mloge visokaria, ana naga pisape la aviran kapi. Ana pogos nap̃a la asum̃a akila ke kana kinanena wa, ana Ntewa pian naga e suri tai sa nap̃a naga m̃enia.

¹¹Naga pisu nap̃a ma e peni pike, ana m̃al suri tai sa nap̃a pupia kulmrae, sum̃a pitomi ke tano e yomarava nini. Naga pisu nap̃a la asum̃a atarar ke mrapuna la varoka, ana la amligan malumun ke pitomi tano.

¹²Ana loyum̃a e kulmrae nene, Pita pisu sur mali tap̃ena la punu ga asike ea, a amio m̃ena ga suri tap̃ena la nap̃a Ntewa naga kila ape suri wa nap̃a ve le Israel la ve akan re, sane lom̃ara lala, a nopi lala, a manu lala.

¹³Ana naga mloge m̃ena ga pulgon yar tai pisa pania, pisape “Pita, osum̃alu, owem̃ar suri mali tai nene, ana okania.”

¹⁴Ana Pita pisa, pisape “E Ntewa, peraga yo, tap̃atete nena ga ve sanene, komin suri mali la nap̃a asike e nene ana pe nakanli re lap̃as poli wa, nap̃a imimi le Yu lala mepalia ga pe makakan re poli.”

¹⁵Ana naga mloge ke sina ga pulgon yar nap̃ani, pisa pisape “Suri nap̃a inu Ntewa nepisa rui nesape mekiki ga, ana ko na tap̃atete si ovisa ovisave namname.”

¹⁶Ana suri nene molue pimi yam lua sanene, p̃isi, siraunia, yaru telu nena, ana Pita pisalup̃ar m̃aga, ana siraunia, pupia kulmrae nene p̃asup̃e ke sina ga pa metava ma e peni.

¹⁷Ana Pita sum̃a mloge piowa pap̃isi, naga sum̃a sitom manene laa pisape popon sa tol kinas nen sur nap̃a m̃alivinia, ana pogos nap̃a naga sitomveve ke ga wa, yaru kiena ne Konilias la telu nap̃a naga pitetalia la apimi, apimi aporu Sop̃a. Ana la apiun yum̃a kiena ne Saemon tan yaru la p̃asia, ana la akipian la ea, ana la apimi, asum̃alu asum̃a e mratava na yum̃a m̃ana ne Saemon.

¹⁸Ana la apio apisa apisape “?Ei, yaru tai kiena kia Saemon, nap̃a kiena kia tap̃ena apisape Pita, naga sike amio amiu e nam̃a, pona peraga?”

¹⁹Ana pogos nene Pita naga tom̃a sitomyu ke kinas nen suri nap̃a pisu sane m̃eniena wa, ana Ninuna Wa pisa pania, pisape “?E, ko omloge m̃aga? Yaru la telu asum̃a akale ko ke nagane, la ne nane asum̃alu asike vanua, apio ko ke ne.

²⁰A ko osum̃alu, oyal kawa ga ototano vena ovisu la telu nene, ana visae avisave otaveve la, ana ve okilali re nap̃a ovisalup̃aria, ko na monar otaveve la, vanon in na nemligan la apimin ko.”

²¹Ana Pita sum̃alu pito tano vanua, ana pisu la telu nene, ana naga pisi pan la, naga pisape “Inu nap̃a akale inu ke ne. ?Amiu sinemiun inu vanon suri tai yo?”

²²Ana la apisatam̃ea, apisape “Ee, yerkawa na kilaen mara nene, Konilias, naga pitetalia imimi mepimin ko, vena oimi garu m̃ana, vena naga loge re visena lap̃as tan ko. Navisi kiena ne Ntewa tai naga pisa pania pisape naga vio ko oimi puna sanene. Kiamimi yerkawa nene, naga pe pe yere Yu re tai poli, ana naga pe yaru mesmesu tai nap̃a naga tarar luen ga kiamiu pogos na leniena la punu ga silaga, ana le Israel m̃ena ga lala nae e kiamimi yo nene akekaran naga pap̃isi. Naga ke nap̃a pitetalia imimi mepimin ko narui, nane mesike e nini vanon ne.”

²³Ana vanon nap̃a mrae pito ke tano rui, ana Pita p̃erear la nene am̃eke amio naga e yum̃a nap̃a naga sike ea, vena kolulagi ke ga wa ana la punu ga atove. E yemlagi ke sina ga, Pita pa amio la nene, amio ke m̃ena ga nalelagaena tap̃ena lap̃asia nae Sop̃a, la apa m̃ena ga amio la.

²⁴La apano, yemalo wola ga mrapa komsusa, la amono, ana yemlagi ke sina ga la apa aporu ga Sisaria nene na wa. E yo nene, Konilias sike amio namratava m̃ana lala, a naga pio ke m̃ena ga kiena erau lap̃asia vena la aimi asum̃ate Pita lala.

²⁵Pogos nap̃a Pita pimi tol um̃a m̃ana ne Konilias, Konilias pa pitawea, mloru pito tano e lana, sa nap̃a mlotu naga.

²⁶Ana Pita tarlua ke sina ga pa metava, pisa pania, pisape “E, awis, ko osum̃alu. Opisu ke ne, in na nepe yeririna ga.”

²⁷Ana Konilias sum̃alu, ana lalua asiar asunu lilue, ana apa loyum̃a, nap̃a e pogos ke nanene narui Pita pisu yeririna la mokliu nap̃a asum̃ate ke naga loyum̃a.

²⁸Ana Pita pisi pan la narui, pisa pisape “Amiu asum̃a akilia ke nap̃a e lepas nen kiamimi lotuena imimi le Yu lala, nap̃a imimi na tap̃atete meva loyum̃a e yum̃a m̃ana ne yaru tap̃ena la nap̃a la pe ape le Yu re poli, pona meve erau wo memio la. Ana nagane, Ntewa naga pian inu merarava po, pisape pe pon re nevisu viowa e yaru lap̃asia nap̃a nevisave la apiowa ga, pona la ape kororaki ga.

²⁹Komin suri ne nanene nap̃a Ntewa naga pian inunia, inu pe nepisalup̃ar re la nene e pogos nap̃a apimin inu poli, nesape tap̃atete neim̃asu, ana nepimi ga. ?Ana in na sineun nesape amiu avisawal li van inu, avisave amiu apio inu asape neimi vanon ya?”