Aposel 10:4-29

⁴Eme Koniliyus anyolom ales i tan ma iy inoh, ma iy anya, “Laban tek, ou aso-ok sasah?” Eme angelo dah anya, “Kindrei ndrasumon salom tam ma iy ndranyolom sasah ou anyohan i tiri lau lakou bwe, ya balen bamani ou bwe.

⁵Abo, ou suni rayah lau kala Jopa kakuhi ndramak ari udu aliy nyaran Saimon keme, iri ale aloh iy Pita.

⁶Iy badeh, udu asiu ta liyen Saimon, ndramak ta asereh ku-i katin haka, ya asiu tan udu kabede ndras.”

⁷Ano iy angelo nane asehek sahou i tan iu badeh, Koniliyus eme luhi uru lohowan tan ame ma hawe ndramak ari ta bahun. Iy ndramak ta bahun doh badeh, atehei budon tan handru in ta Kindrei. Ma iy badeh, ta lohowa Koniliyus na len mari.

⁸Koniliyus eme sihidi sahou mari ta angelo nane asehek i tan, ano i toro, ano iy tiye oro ala Jopa.

⁹Kon aleu, len ari ja, mada an udu le alih badeh, oro ma taloh ndradek ndrala mirihik ta san ili bolo kon tinan Jopa. Na len doh badeh, an nyarahan labai, Pita eme ili loken asiu ta Saimon ta akohok jor, ma iy anya kamekes salom kili ta Kindrei.

¹⁰Eme Pita imeson handru en, ya eme iy aseken labai ta aimon nyamon. Ya nyamon oro lowosa kahis le badeh, lele asahan tan.

¹¹Eme iy anyolom kandrah asak ya lakou i buku none ra-ei kolau tinan suwin ma hahuw udu kandrah eme munyak.

¹²Udu bolon badeh, iri katin haka randrah randrah, ma hawe iri sasah ta seselek badu bwele-e munyak, hawe iri sirih badu reu, ado bolo lakou nane doh.

¹³Ano sahou ari aloh i tan anya, “Ou are loken, adai iri lakou doh, ma ou aimon.”

¹⁴Eme Pita anya, “Laban, bwe, bwe handru en! Jo badeh, baimon se ari nyamon ko-ak i buku doh bwena bwe le!”

¹⁵Eme Kindrei aloh san rasan ja anya, “Ou badeh, saloh anya iri lakou, Kindrei sikinei ko-ak ndra-au, ya ou saloh ko-ak udu aliy ja ai, ndri-iy.”

¹⁶Kindrei aloh i san tulusin ano, suwi labai kolau dah iu i kandrah ja.

¹⁷Pita lomondra moso iri lakou nane iy anyolom kahis le badeh, oro lau nane Koniliyus suni oro ame ndratakalahei asiu nane Pita udu aliy. Ya, eme oro are rasi are madasan are gwek.

¹⁸Eme oro aloh ma ndremenya anya, “Saimon, iri aloh Pita udu aliy deh bwe?”

¹⁹Pita lomondra ta lele kahis le badeh, Malawin Ndrabun tiye i tan anya, “Saimon ei, lau taloh takaleh ou.

²⁰Ou suri ou, ya ou au ala andri. Ou sanoh ta ala andri hawe oro. Oro badeh, jo suni oro.”

²¹Eme Pita ili andri tiye i toro anya, “Ado asilah jo, jo asah idah. Ado ame dah luwa sah?”

²²Eme oro lau anya, “Aso dah ado hawe Koniliyus ndramak batun tiri lau ta bahun badu Rom ame dah. Iy badeh, ndramak mwasin handru ma iy badeh, inoh Kindrei labai, ma iy badeh, iri lau mari badu Isra-el aso-ok iy tinan labai. Angelo ndrabun badeh, tiye tan ta ou ala asiu tan, ya eme iy kanuhun sahou badu bohom.”

²³Ano Pita kuhi oro ala asiu hawen amadin. Eme kon aleu badeh, Pita i hawe oro ma hawe nadu tinen oro rayah badu Jopa ala hawe oro ma oro adek au ala.

²⁴Ano i bada len ari ja badeh, iy isos Sesariya. Ya Koniliyus badeh, abe-en oro kameh asahan na len doh. Eme iy luhi oro kawas tan, hawe lowan oro badu mirihik tan ala hawen.

²⁵Eme Pita ili bolo asiu le badeh, Koniliyus asumon iy, ano iy i andri na bwili ndru-un ta sekesek iy.

²⁶Arile, Pita tiye iy ere loken ma tiye anya, “Jo dah badeh, ndramak laleyah labai.”

²⁷Pita asehek sahou hawen ano iy i bolon badeh, anyolom iri lau solo-an labai.

²⁸Eme iy tiye i tiri i buku doh, “Ado badeh, tanan idoh badeh, ba-en hamon ta batanau malen bwe, ta ahi lau badu Juwis winiyan ba-en bolo aha bwe, ma ahi saselesen aha lau badu leheleh. Arile, Kindrei mene ndraleheyani ndrame tek, ta jo badeh, saloh ari ndramak ndra-in ta mada Kindrei.

²⁹Ya eme ado ala andrei jo eme dah, jo bandremenya ado ta aliy, bwe. Ya abo, sasah handru ado aseken?”