Yuhanna 7:28-47

²⁸Tawi Iisaa ana waajoo ley Suudu Dewal Mawndu nduu. O haali faa toowi, o wii: —Oɗon anndi kam, oɗon anndi ɗo iwan-mi? Wanaa miin waddi hoore am. Nelɗo kam oo yo goongaraajo. Onon, on anndaa mo.

²⁹Kaa miin, miɗo anndi mo sabi to makko iw-mi. Kanko neli kam.

³⁰Nden ɓe ndaari nanngude mo, kaa fay gooto junngo mum fawaaki e makko, sabi wakkati makko waraalino tafon.

³¹Heewɓe e ley jamaa oo ngoonɗinii mo, mbii: —So Almasiihu oo warii, gollan kaayɗe ɓurɗe ɗe oo gorko golli ɗee naa?

³²Farisa'en nani ko yimɓe ɓee ngunndondirta e haala Iisaa koo. Hooreeɓe yottinooɓe sadaka e Farisa'en neli haybooɓe Suudu Dewal Mawndu nduu nannga mo.

³³Non Iisaa wii: —Miin, miɗo wondi e mooɗon seeɗa tafon. Caggal mum, mi wirfitoto to nelɗo kam oo.

³⁴On tewtan kam, kaa on njiitataa kam, sabi on mbaawaa yaade to ngonan-mi too.

³⁵Yahuudiyankooɓe lamndondiri: —Hoto o yahata faa tawee en mbaawaa yiitude mo? O tawtoyan yimɓe men ferɓe to Yunaninkooɓe, o waajoo ɗum'en naa?

³⁶O wii en tewtan mo, en njiitataa mo, sabi en mbaawaa yaade to mo tawetee too. Koɗum woni maanaa kaa haala?

³⁷Ɲalaande sakitotoonde teddunde e iidi, Iisaa darii, haali faa toowi, wii: —Neɗɗo fuu ɗomɗuɗo wara e am, yara.

³⁸Neɗɗo fuu goonɗinɗo kam, calluɗi ndiyam nguurnoojam ilan iwde e ɓernde mum, hono no winndiraa e Binndi ɗii nii.

³⁹Tawi ɗum o haali haala Ruuhu mo goonɗinɗo mo fuu heɓata oo. Nden Ruuhu waraali, sabi Iisaa ŋabbitaali e teddeengal Laamɗo tafon.

⁴⁰Nde heewɓe e jamaa oo nanunoo kaa haala ndee, mbii: —Kanko jaati woni Annabaajo oo.

⁴¹Yogaaɓe mbii: —Kanko woni Almasiihu oo. Woɓɓe kasen mbii: —Almasiihu, Galili iwrata naa?

⁴²Binndi ɗii mbii e leɲol Daawuuda Almasiihu iwata, e ngeenndi Baytilaama ndi Daawuuda iwata e mum ndii.

⁴³Jamaa oo fecci saabe makko.

⁴⁴Won yiɓɓe nanngude mo e maɓɓe, kaa fay gooto junngo mum fawaaki e makko.

⁴⁵Non haybooɓe Suudu Dewal Mawndu ɓee ngarti to hooreeɓe yottinooɓe sadaka e Farisa'en. Ɓeen mbii ɓe: —Ko saabii so on ngaddaali mo?

⁴⁶Haybooɓe ɓee njaabii: —Abada fay gooto waajoraaki no oo gorko nii.

⁴⁷Farisa'en njaabii ɓe: —Onon duu on majjinaama naa?