ẔWA 7:28-47

²⁸Wzóa Jesusen' ẕsedle' benách ka' ḻo ẕchil yodo', na' katen' benle' da' ni, wnníe' zižje, na' wnné': —¿Nónbia'le neda', na' nnézlele ga benne' neda'? Bḻa'a yežlyó nga, kege žakze chia', san Dios na'kze bseḻe'e neda', na' Ḻe', bi nónbia'le-ne'.

²⁹Neda' nónbi'a-ne', dan' za'a ḻo wlaze' Ḻe', na' Ḻekze' bseḻe'e neda'.

³⁰Naž ben byéngake' séngake' Ḻe', san nitó benne' bi bex̱we' Ḻe', dan' bi na' žin ža chie' nich choe'e ḻo ná'gake'.

³¹Benne' zan bejḻé'gake' chie', na' wnnágake': —Kate' ḻa' Benne' Criston', ¿gone' da' zanže yeḻa' wak ka' ka da' žon Benne' ni?

³²Béngekle benne' yodo' fariseo ka' da' ẕchaḻjgak benách ka' kan nak che Jesusen', na' bx̱oz wnná bia' ka' ḻen benne' yodo' fariseo ka', bséḻa'gake' ni'a ná'gake' nich chejx̱éngake' Ḻe'.

³³Naž Jesusen' wnné': —Yetó chí'ido'ze sóaḻena' ḻe'e, na' naž yeyá'a gan zoa X̱a', Bennen' bseḻe'e neda'.

³⁴Yeyiljle neda', san bi yežéḻ-lele neda'. Gan chejsóa' neda' bi gak yidle ḻe'e.

³⁵Naž benne' judío ka' belyi'e ljéžgake' ka', na' wnnágake': —¿Gaẕ chej benne' ni, gan bi yežéḻ-lžo-ne'? ¿Cheje' gan zej nnita' benne' judío ka', benne' zej náslase' dot yežlyó nga, na' wsedle' benne' zi'to' ka'?

³⁶¿Biẕ zejḻás dan' wnné': “Yeyiljle neda', na' bi yežéḻ-lele neda'” na' ḻezka': “Gan chejsóa' neda' bi gak yidle ḻe'e”?

³⁷Kate' nak ža ze ḻawte ža che lni na', ža na' naken blo, wzó ža' Jesusen'. Wnníe' zižje, na' wnné': —Cha' zoa no benne' ẕbiž yichj ḻáẕda'we', žaḻa' yide' gan zoa', na' ye'je'.

³⁸Nóte'teze benne' žejḻi'e chia' neda', gak chie' kan nyejw ḻe'e yiche la'y, da' ẕnnan: “Ḻo yichj ḻáẕdo'w bennen' galj da' gaken ka to nis yego” dan' gon chawen' benách ka', na' gata' yeḻa' nban chégake'.

³⁹Bchaḻj Jesusen' da' ni kan nak che Dios Be' La'y, Bennen' žaḻa' yedjsóaḻene' benne' ka' chejḻé'gake' che Jesusen'. Ki wnné' dan' bi na' žin Dios Be' La'y na', dan' bi na' yeyepe Jesusen' gan gake' Benne' blo.

⁴⁰Kate' benne' zan ka' béngekle' da' ki, baḻe' wnnágake': —Da' li benne' ni nake' bennen' ẕchaḻje' ḻo wláz Dios, bennen' bchebe ḻaže' Dios seḻe'e chežo.

⁴¹Yebaḻe' wnnágake': —Benne' ni nake' Benne' Criston'. Wnnagak yebaḻe benách ka': —¿Galj Benne' Criston' gan nbab Galilea?

⁴²Nyejw ḻe'e yiche la'y da' ẕnnan: “Galj Benne' Criston' ladjw ẕi'n ẕa'só Dabí ka', na' gake' benne' yež Belén, da' goken laž Dabín'.”

⁴³Ka' goken, gok chóplegak benne' ka' ni'a che Jesusen'.

⁴⁴Gónegekle' baḻe' séngake' Jesusen', san nitó benne' bi be bene' chie'.

⁴⁵Naž ni'a na'gak bx̱oz wnná bia' ka' ḻen ni'a na'gak benne' yodo' fariseo ka', bežíngake' gan zej nnita' benne' yodo' wnná bia' ka', na' benne' ki belyi'e ni'a ná'gake' ka', na' wnnágake': —¿Biẕ chen' bi žedjwa'le-ne'?

⁴⁶Naž bechébegak ni'a ná'gake', na' wnnágake': —Bi ẕchaḻj nitó benne' kan ẕchaḻj bennen'.

⁴⁷Naž beži'igak benne' yodo' fariseo ka', na' wnnágake': —¿Be'le latje ben ḻáže'le' ḻe'e?