Yuhanna 5:2-37

²To Urusaliima too, bannge dammbugal biyeteengal Dammbugal Baali ngal, luggal ndiyam ana ton. Engal wiyee Baytijata e ibaraninkoore. Danɗe joy ana pilii ngal.

³Ɲawɓe heewɓe ana lelii ley ɗeen danɗe: wumɓe e wooyɓe e ɓe terɗe mum'en fuu mbaati.

⁵Gorko ɲawɗo duuɓi capantati e jetti ana wonnoo ɗon.

⁶Iisaa yii omo lelii, anndi o ɓooydii e ɲaw, lamndii mo: —Aɗa yiɗi sellude naa?

⁷Ɲawɗo oo jaabii mo, wii: —Moobbo, mi walaa fay gooto balloowo kam regaade e luggal ngal nde ndiyam ɗam jirkitike. Ɗo mbiyan-mi mi regike fuu, a tawan won adiiɗo kam jolde.

⁸Iisaa wii mo: —Imma, ɓamtu daɗɗo maa, yaa!

⁹Ɗon e ɗon gorko oo selli, ɓamti daɗɗo mum fuɗɗiti yaade. Ɗum hawrii e ɲalaande fowteteende,

¹⁰saabe majjum hooreeɓe Yahuudiyankooɓe mbii cellinaaɗo oo: —Hannde yo ɲalaande fowteteende, dagantaako ma ndoondo-ɗaa daɗɗo maa.

¹¹O jaabii ɓe: —Cellinɗo kam oo, kaɲum wii kam: «Ɓamtu daɗɗo maa, yaa!»

¹²Ɓe lamndii mo: —Homo woni oo neɗɗo biiɗo ma ɓamtu daɗɗo maa, yaa?

¹³Kaa cellinaaɗo oo anndaano mo, sabi Iisaa iwii ɗon sabi yimɓe ana keewnoo e oon nokku.

¹⁴Caggal ɗum, Iisaa hawriti e makko ley Suudu Dewal Mawndu nduu, wii mo: —Ƴeew, jooni kaa, a sellii, pati luuttu kasen so ko ɓuri ɗum bonde heɓe.

¹⁵Gorko oo yehi haalanoyi hooreeɓe Yahuudiyankooɓe ɓee Iisaa woni cellinɗo ɗum oo.

¹⁶Nden hooreeɓe Yahuudiyankooɓe puɗɗi torrude Iisaa sabi o waɗii ɗum e ɲalaande fowteteende.

¹⁷Iisaa wii ɓe: —Baabiraaɗo am ana golla faa jooni, miin duu, miɗo golla.

¹⁸Nden hooreeɓe Yahuudiyankooɓe ɓeydi tewtude warde mo, wanaa saabe ko o bonnii ɲalaande fowteteende ndee koo tan, ko o wii kasen Laamɗo yo baam makko koo. O fonndii hoore makko e Laamɗo.

¹⁹Iisaa wii ɓe: —Miɗo haalana on goonga: Ɓiɗɗo waawaa gollude fay huunde kaɲum tan, kinaa ko yii Baabiraaɗo ana golla. Sabi ko Baabiraaɗo oo gollata koo, ɗum Ɓiɗɗo oo duu gollata.

²⁰Sabi Baabiraaɗo oo ana yiɗi Ɓiɗɗo oo, ana holla ɗum huunde fuu ko gollata. O hollan ɗum golleeji ɓurɗi ɗii ɗoo fuu teentilaade faa kaayne-ɗon.

²¹Sabi hono no Baabiraaɗo oo immintinirta maayɓe so hokka ɗum'en nguurndam nii, non Ɓiɗɗo oo duu hokkirta nguurndam mo muuyi hokkude.

²²Baabiraaɗo oo, kaɲum kaa sarataa fay gooto, o waɗii sariya kaa fuu e junngo Ɓiɗɗo oo,

²³yalla yimɓe fuu ana teddinira Ɓiɗɗo oo hono no teddiniri Baabiraaɗo oo nii. Neɗɗo fuu mo teddinaali Ɓiɗɗo oo, teddinaali Baabiraaɗo nelɗo mo oo.

²⁴Miɗo haalana on goonga: nanɗo haala am so goonɗini nelɗo kam oo heɓii nguurndam nduumiiɗam. Mo sarataake, mo diwii maayde, mo naatii e nguurndam.

²⁵Miɗo haalana on goonga: wakkati ana wara, o yottike jaati, wakkati mo maayɓe nanata daande Ɓii Laamɗo oo. Nanɓe ɓee nguuran.

²⁶Hono no Baabiraaɗo oo wuuriri e hoore mum nii, hono non o hokkiri Ɓiɗɗo oo duu baawɗe wuurirde e hoore mum.

²⁷O hokkii oon baawɗe sarde, sabi oon yo Ɓii Neɗɗo.

²⁸Pati ɗum haayno on. Wakkati waran mo maayɓe wonɓe ley janaale fuu nanata daande makko,

²⁹njalta. Golluɓe golleeji lobbi immitanoo nguurndam, golluɓe golleeji bonɗi immitanoo sariya.

³⁰Miin, walaa fuu ko mbaaw-mi gollirde hiini hoore am. Ko nanu-mi koo cariran-mi. Sariya am ana dartii, sabi mi jokkataa sago am, sago nelɗo kam oo njokku-mi.

³¹—So mi seettanike hoore am, seedaaku am sellataa.

³²Won goɗɗo ceettantooɗo kam. Miɗo anndi seedaaku mo seettantoo kam oo yo goonga.

³³Onon, on nelii e Yaayaa, o seettike goonga.

³⁴Miin, mi hasindinaa e seedaaku ɓii-aadama, walaa ko mbiiru-mi seedaaku Yaayaa oo so wanaa faa kison.

³⁵Yaayaa laatike lampa kuɓɓoowa, njaaynoowa. On njaɓii weltaade wakkati gooto e fooyre makko.

³⁶Miin, miɗo jogii seedaaku ɓurɗo mo Yaayaa oo teentilaade: golleeji ɗi Baabiraaɗo yamiri kam mi golla ɗii, kaɲum jaati ceettantoo kam Baabiraaɗo neli kam.

³⁷Kasen duu, Baabiraaɗo nelɗo kam oo hoore seettantoo kam. Abada on nanaali daande makko, abada on njiyaali mo,