Yohansi 21:9-18

⁹La'pa rerun la puou, pa rla'awa keranni de ramkek de i'na id ed olek la ai kwiari ralamni me roti mana er olek wal lia hande.

¹⁰Noma Yesus Nakot la re Niwra: “Miod tieka i'n mak na'nama mliernana re dom la handi.”

¹¹Dewade Simon Petrus nha'at la puou, na'nama nhedga darni la keranni de enni i'na rahu ida terampwolima wehrani wotelu de i'n lawan mamaini. Ne la'pa i'n rahu emkade ho'mana dar die edonna napriti.

¹²Dewade Yesus Nakot la re Niwra: “Mai pia ta'ana!” Mere maklernohor rer riy id mana edonna nparan pia natiana la Am de he'a? Yoma ratga de Orgahi-Orha'a inhatta.

¹³Noma Yesus Nwakriania re na'nama Na'ala roti re pa Nalla' ira. Na' walia i'na re pa Nalla re.

¹⁴La' ler di Yesus Nayamkek nana re'eni wotellu la'a maklernohor reri E'a re, la' ler maka Enmori owa'an la matmiati ralamni.

¹⁵La'pa ra'an pa nhorwua, noma Yesus Nakot la Simon Petrus Niwra: “Simona, Yohansi A'nani ne, hota o e msiayn rehi A lia hari honona?” Noma Petrus nakot la niwra: “Matroma, orgahamu Muatga de asiaynia Matro'mu.” Noma Yesus Nakot la Niwra: “Had emkade de muodia A du'mu ree!”

¹⁶La'pa Yesus Nakot owa'an la re'eni wornu de Niwra: “Simona Yohansi a'nani ne, plol toto'pa o e msiayni A'u?” Noma Petrus nakot la niwra: “Plola Matroma, Matro'mu Natga de a'g e siayni O'a Matroma.” Noma Yesus Niwra: “Muodia A du'mu re.”

¹⁷Yesus yatianni re'eni wotellu Niwra: “Simona Yohansi a'nani nee! Plol o' e msiayni A'u?” Dewade Petrus ralamni nmayo'a yoma tiana re'eni wotel muemn olekwa. Noma Petrus nwalol owa'an la niwra: “Matroma, Matro'mu Natg oleka haneknek wawannu. Matro'mu Natga de a ralmu e nod rer lia Matro'mu.” Noma Yesus Nakot la Niwra: “Demade, mhilpai-muanatga A du'mu re.”

¹⁸Noma Yesus Nnairia lira pa na Ntutga hota Petrus matmiatni ha lolola totpena nodia ya'uli-yawed lia Uplerlawna-Mempulwatnu, Niwra: “Hota plola la' A li'ru-tu'nu ri! La' lera omhuatriapriap mia'ta, de o orgahamu omhi'a hya' to'a, de nden nek la o ralma-riormu. Mere hota la'pa omhuamto'owa de hota omtiania o limmu pa rwutga ne rodi o' pa rlola meni-meni mak omuhmena mliola. Mere la kropna-krieutu, wniunu-wnienna hya' ho'mana mdien rer lia pesiaymu pa mliernohora A'u.”