Johnku 21:9-18

⁹Kaya mantangka wirkaṟa nyangu waṟu purku kampanyangka, ka nyara palula antipina maṉkurpa pauṟa wantinytja ngaringi, ka mai tampa kuḻu waṟungka itingka tangka ngaringi.

¹⁰Ka Jesulu tjanala wangkangu, “Kuka tjaraya ngalya-kati.”

¹¹Ka Simon Peterlu pautangka tjarpara net panya antipina puḻka tjuṯatjara witiṟa ngalya-ilaṉu mantakutu. Munuya kantamilaṟa nyangu nampa nyanga alatji 153, tjuṯa mulapa. Palu net panya palyaṯu ngaṟangi kaṯakatinytja wiya alatjiṯu.

¹²Ka Jesulu tjanala wangkangu, “Pitjalaya pinpatja ngalkula!” Kaya pitjala nyinakatira unngu kutju kuliningi alatji, “Ngananya nyangatja?” Palu utingku tjapilwiyangkuya wantingi, panya palunya alatjiṯuya ngurkantanu Mayatja Jesunya.

¹³Ka Jesulu mai tampa mantjiṟa tjananya ungu kuka antipina kuḻukuḻu, kaya ngalkuningi.

¹⁴Nyangatja panya Jesunya ilunytjatjanu pakaṟa aṟa maṉkuraṟa nintintja tjuṯangka utiringkunytja.

¹⁵Kaya kuka mai ngalkula wiyaringkunyangka Jesulu Simon Peterla wangkangu, “Simon Johnkunu, nyanga tjana ngayuku puḻkaṟa mukuringkupai. Ka nyuntu tjanala waintaṟa mulapa ngayuku mukuringanyi?” Ka wangkangu, “Uwa Mayatja, nyuntu ninti ngayulu nyuntumpa puḻkaṟa alatjiṯu mukuringkupai.” Ka wangkangu, “Uwa, lamalama tjuṯatju paḻtjanma.”

¹⁶Munu piṟuku tjapinu Simonta, “Simon Johnkunu, nyuntu mulapa ngayuku puḻkaṟa mukuringanyi?” Ka wangkangu, “Uwa Mayatja, nyuntu ninti ngayulu nyuntumpa puḻkaṟa alatjiṯu mukuringkupai.” Ka wangkangu, “Uwa, tjiipi tjuṯatju aṯunymaṟa kanyinma.”

¹⁷Munu piṟukuṯu Simonta tjapinu, “Simon Johnkunu, nyuntu ngayuku puḻkaṟa mulapa mukuringanyi?” Ka Peternya tjituṟu-tjituṟuringu maṉkuraṟangku tjapinnyangka. Munu paluṟu wangkangu Jesula, “Mayatja, nyuntu uwankaraku ninti. Nyuntu ninti alatjiṯu panya ngayulu nyuntumpa puḻkaṟa mulapa mukuringanyi.” Ka Jesulu palula wangkangu, “Tjiipi tjuṯatju paḻtjanma.

¹⁸Tjukaṟurungkuṉanta wangkanyi, ngaṉmanypa panya nyuntu wati yangupalalpi nyinara pakaṟa mantarangka tjarpara walytjangku kuliṟa ankupai. Palu ngulan tjiḻpiringkula maṟa katuringkuku, kanta kutjupa tjuṯangku nyuntunya maṟa karpiṟa witiṟa ma-katiṟinkuku nyuntu mukuringkunytjitja wiyakutu.”