Yohansi 18:24-28

²⁴Nhor nioma Hanas nhopan pa rodia Yesus de limni nawniut niekpa rokria Kayafas makla' imam o'ta lawanni wali.

²⁵La' dodo'on de meman pa Petrus, namrir mia't ai dewade rira rakot la riwra: “Yanpa o' di de maklernohor reri E'a id o'a?” Mere Petrus nreher pa niwra: “A'g edonna!”

²⁶Noma makla' hopopna-lili'iru id la imam-imam o'ta lawanni de nmai lia Petrus. De e hyalli de ed maka Petrusa ha ndawar doin tlinni walli malganna, pede nakot la Petrus niwra: “A'g e umkek walia omuor Yesus la'a nhyi' de maka mel de miy e miwok tar lia de, pa yana mriehera.”

²⁷Mere Petrus nrehera owa'an pa niwra: “Edonna!” Dewade plinu-plinnianamde hiwi lallu nkukule'ewa.

²⁸La'pa yawyawar ma'ta de, makden Yahudi rodia Yesus rwatiaga Kayafas genni pa rokria gubernur hairi Roma genni. Riy Yahudi nek de edonna rparan pia rler la gubernura genni de. Yanhi'pa hota rla' hande de rlernana maka rmakriarnia, yoma Yahudi agamni deullu-tatarni emkade. Yoma la'pa rlernan maka rmakriarnia dewade hota ta'en niana rla' pa ra'an la mei Paska.