YOHANA. 8:27-42

²⁷Hawavitangile kamba Yesu kakala yowalongela mbuli za Tata.

²⁸Yesu kawalongela, “Muhaniinula nie, Mwana wa Munhu, movitanga kamba nie iyo, na sitenda kinhu chochose nene mwenyego, ila nolonga mbuli zino kamba viyanilongele Tata.

²⁹Na ayo yanhumile nie ka hamoja na nie, hanilekile niiyeka, kwavija mazua gose notenda gaja gamnogele heyo.”

³⁰Viyakalile yolonga mbuli zino, wanhu bwando wamtogola.

³¹Avo Yesu kawalongela awo Wayahudi wamtogole, “Kamba muhagatogola mafundo gangu, mowa wanahina zangu wa ikweli.

³²Moitanga ikweli, na ikweli yowatenda mkale muulegeho.”

³³Wamulongela, “Tweye twa lukolo lwa Ablahamu, na hatunakuwa nyakadala wa munhu yoyose. Kotulongelaze tokwiza kuilegeha?”

³⁴Yesu kawalongela, “Nowalongela ikweli, munhu yoyose yoloza hiyo ka nyakadala wa vilozo.

³⁵Nyakadala hapetigwa kuwa munhu wa mulango wa munhu yomsang'hanikila milongo yose, ila mwana kopetigwa kuwa wa mulango uja milongo yose.

³⁶Kamba Mwana yahawakombola, mokomboligwa kweli kweli.

³⁷Novitanga kamba mweye mwa lukolo lwa Ablahamu. Hata avo molonda kunikoma kwavija hamgatogola mafundo gangu.

³⁸Nowalongela gaja ganyonile ha Tataangu, kamba mweye vumtenda gaja gamuhulike kulawa ha tata zenu.”

³⁹Wamulongela, “Tweye twa lukolo lwa Ablahamu.” Yesu kawalongela, “Kamba muhawile kweli mwa lukolo lwa Ablahamu, muhatendile kamba viyatendile Ablahamu.

⁴⁰Molonda kunikoma nie, munhu yawalongele kweli iniihulike kulawa ha Mulungu. Ablahamu hatendile kinhu kamba kino!

⁴¹Mweye motenda goyotenda tata wenu.” Wamulongela, “Tweye hatuli wana wa ugoni. Mulungu yeiyeka iyo Tata wetu.”

⁴²Yesu kawalongela, “Kamba Mulungu iyo Tata wenu, muhaninogele, kwavija nilawa ha Mulungu na sambi na hano. Siigalile mwenyego, ila Mulungu iyo yanhumile.