Yohana 5:4-18

⁴kwaviya mndima ywa kwembingu nakasela chila nkanana mndani mwe ndiwa atibule amazi. Mnyonje ywa nkongo kwingila mndani mwa mazi umo yatibulwe, nakahonywa unyonje wose nendile ananawo.

⁵Nahana mntu mnyonje kwa mihilimo milongo mitatu na mnane.

⁶Yesu eze amwone kagona nakumanya kugamba katenda mnyonje kwa mazuwa yalozize, niyo amuza, “Waunga uhone?”

⁷Mnyonje ahitula, “Zumbe, sina mntu ywa kuningiza mwe ndiwa ya mazi umo yakatibulwa, chila hajeza kwingila, mntu mtuhu anilongwela.”

⁸Yesu amgamba, “Chimala, guha umcheka wako wite.”

⁹Aho mntu uyo niyo ahona, niyo aguha mcheka wakwe, akonga kujenda. Mbuli iyo idamanyika mwe Zuwa dya kuhumula,

¹⁰ivyo vilongozi wa Wayahudi wamgamba yudya mntu ahonyigwe, “Dyelo ni Zuwa dya kuhumula, kwa Sigilizi zetu havikungwa wetwike mcheka wako dyelo.”

¹¹Ahitula, “Yudya mntu anihonyize nuyo anigambile, guha umcheka wako ujende.”

¹²Wamuza, “Uyo mntu akugambile ivyo ni yuhi?”

¹³Mna yudya mntu ahonyigwe hammanyaga Yesu ni yuhi, kwaviya nahana wantu walozize, Yesu naye kahalawa kale.

¹⁴Vize vyajike, Yesu ambwila yudya amhonyize mwe Nyumba nkulu ya Chohile na kumgamba, “Tegeleza, haluse kuhona. Ivyo usekudamanya masa vituhu unase kubwilwa ni mbuli ihise.”

¹⁵Yudya mntu niyo ahalawa na kuwagambila vilongozi wa Wayahudi kugamba Yesu nuyo amhonyize.

¹⁶Ivyo Wayahudi niyo wakonga kumsunkasunka Yesu kwaviya nakadamanya ivyo mwe zuwa dya Kuhumula.

¹⁷Yesu awahitula, “Tate adamanya ndima chipindi chose, miye nami nadamanya ndima.”

¹⁸Ulosi uno uwatenda vilongozi wa Wayahudi waungise kumkoma. Siyo kwaviya nakabalanga Sigilizi ya zuwa dya kuhumula du, mna kwaviya kagamba Chohile ni Ise, ivyo ketenda kaligana na Chohile.