YOHANA. 4:5-46

⁵Kavika mkiwambo kimwe muisi ya Samalia kikemigwa Sikali, behi na mgunda wa Yakobo uyakalile yaamgwelele mwanage, Usufu.

⁶Haja kukala na kisima cha Yakobo, na Yesu, avija viyadonhile na umwanza, kakala hasi hamgwazo wa ikisima. Ikala saa sita imisi.

⁷Mtwanzi wa Kisamalia keza kudeha mazi, na Yesu kamulongela, “Nigwelele mazi ning'we.”

⁸Wanahina zake wakala wacholile kukiwambo kugula mandia.

⁹Ija imtwanzi kamulongela, “Gweye kwa Muyahudi na nie na mtwanzi wa Kisamalia, konipulaze nie mazi ga kung'wa?” Kwavija Wayahudi hawasangilaga vinhu na Wasamalia.

¹⁰Yesu kedika, “Kamba uhaimanyile nhunza ya Mulungu na uhammanyile ayo yokupula mazi ga kung'wa, uhampulile heyo na yahakugwelele mazi golava ugima.”

¹¹Ija imtwanzi kalonga, “Mndewa, kia cha kudehela kwabule na kisima kigidila, kwahi kondaugapate mazi ago gali na ugima?

¹²Gweye kwa mkulu kum'banza muhenga wetu Yakobo yatugwelele kisima kino, na heyo mwenyego na wanage na madale gake ga ng'hondolo wose wang'wa mazi ga kisima kino?”

¹³Yesu kamulongela, “Wanhu wose wong'wa mazi gano wokona ng'hilu kabili,

¹⁴ila munhu yoyose yondayang'we mazi gondanimgwelele nie hondayone ng'hilu kabili. Mazi gondanimgwelele nie gogaluka nzokwe mgati yake, gondagamgwelele ugima wa digunge.”

¹⁵Ija imtwanzi kalonga, “Mndewa, ngwelela mazi higo! Giladi sambinyone ng'hilu kabili, na sambinize hano kudeha mazi.”

¹⁶Yesu kamulongela, “Genda kamkeme mbigalo wako, abaho, ubwele.”

¹⁷Ija imtwanzi kedika, “Nabule mbigalo.” Yesu kamulongela, “Kulonga goya avija vuulonga kwabule mbigalo.

¹⁸Kwavija kusoligwa na wambigalo watano, na mbigalo yuukala nayo sambi siyo mbigalo wako. Kunongela ikweli.”

¹⁹Ija imtwanzi kalonga, “Mndewa, nokona gweye kwa muhokozi.”

²⁰Wahenga zetu wakala wotambika mkigongo kino, ila mweye mogong'ondeza kamba Yelusalemu baho hanhu ha kutambikila.

²¹Yesu kamulongela ija imtwanzi, “Nhegeleza nie, go mtwanzi, kipigiti chokwiza wanhu hawamtambikila Tata mkigongo kino ama kuja Yelusalemu.

²²Mweye motambikila kija hamkitangile, ila tweye tukitanga kija itukitambikila, kwavija ukombola wolawa mwa Wayahudi.

²³Ila kipigiti chokwiza na tena kipigiti kivika, watambika wa ikweli womtambikila Tata muloho na muikweli, kwavija Tata kowazahila wanhu wondawamtambikile kamba vino.

²⁴Mulungu iyo Loho, avo awo womtambikila wolondigwa wamtambikile muloho na muikweli.”

²⁵Ija imtwanzi kamulongela, “Nivitanga kamba Kilisto kokwiza, na yeheza, kotulongela kila kinhu.”

²⁶Yesu kamulongela, “Nie, inilonga nagwe, iyo Kilisto.”

²⁷Kipigiti kikija wanahina zake wabwela, wakanganya ng'hani viwam'vikile yolongelela na mtwanzi. Ila haduhu hata imwe mmwanza wao yamulongele, “Kolonda choni?” ama kumuuza Yesu, “Habali ulonga na mtwanzi ino?”

²⁸Abaho, ija imtwanzi kaleka nongo yake ya mazi, kabweleganya kukiwambo na kuwalongela wanhu wakalile haja.

²⁹Yolonga, “Izoni mmulole munhu yanongele kila kinhu kinhendile. Havidahika munhu ino kuwa iyo Kilisto?”

³⁰Avo wasegela haja hakiwambo wachola kuyali Yesu.

³¹Kipigiti kikija wanahina zake wamuyalalila Yesu wolonga, “Mkulufunzi, uje mandia.”

³²Ila heyo kawalongela, “Nie nnago mandia ago mweye hamgamanyile.”

³³Avo waja wanahina wasonga kukiiuza wenyego kwa wenyego, “Hana munhu yamgalile mandia?”

³⁴Yesu kawalongela, “Mandia gangu nie gago gano, kugatenda gaja gamnogele ayo yanhumile na kuimambukiza sang'hano yake.

³⁵Munawo ulonzi ulonga, ‘Isigala milenge mine mulao ulawe.’ Ila nie nowalongela, loleni mmigunda, vakuja vipa visha avo volondigwa kuhunigwa.

³⁶Muhuna vakuja kogendelela kulihigwa hata sambi, na heyo kokunzanya ivakuja yavike muugima wa digunge, avo yahandile na ayo yohuna wodeng'ha hamoja.

³⁷Kamba ulonzi uno vuulonga, ‘Imwe kohanda, iyagwe kohuna.’

³⁸Niwagala kuhuna vakuja mumgunda hamuulimile. Wanhu wayagwe iwo wasang'hanike, na mweye mpata fong'ha kulawa msang'hano yao.”

³⁹Wasamalia bwando kulawa mkiwambo kija wamtogola Yesu, sama ya gaja gayalongile ija imtwanzi, “Kanongela kila kinhu kinhendile.”

⁴⁰Avo waja Wasamalia viwamwizile, wamuyalalila yakale na hewo, avo Yesu kakala haja mazua mabili.

⁴¹Wanhu wayagwe bwando wamtogola sama ya mbuli zake,

⁴²na wamulongela ija imtwanzi, “Tutogola si kwavija gweye kutulongela, ila kwavija tumuhulika tweye wenyego, na tuvitanga kamba heyo iyo Mkombola wa ulumwengu.”

⁴³Vigabitile mazua mabili, Yesu kasegela haja kachola kuisi ya Galilaya.

⁴⁴Kwavija heyo mwenyego kalonga, “Muhokozi hahishimilwa muisi yake mwenyego.”

⁴⁵Viyavikile Galilaya wanhu wa haja wam'bokela, kwavija wavona vinhu vose viyatendile Yelusalemu, kipigiti cha Ulusona lwa Pasaka, kwavija na hewo wakala wacholile kuna ulusona.

⁴⁶Abaho, Yesu kabweleganya kuna ikiwambo cha Kana muisi ya Galilaya, ako kuyagalule mazi kuwa divai. Haja kukala na mkulu imwe wa silikali yakalile na mwanage mtamu ako Kapenaumu.