Yohana 10:5-26 in Swahili (individual language)

⁵ Kondoo hao hawawezi kumfuata mgeni, bali watamkimbia kwa sababu hawaijui sauti yake.”

⁶ Yesu aliwaambia mfano huo, lakini wao hawakuelewa alichotaka kuwaambia.

⁷ Basi, akasema tena, “Kweli nawaambieni, mimi ni mlango wa kondoo.

⁸ Wale wengine wote waliokuja kabla yangu ni wezi na wanyang'anyi, nao kondoo hawakuwasikiliza.

⁹ Mimi ni mlango. Anayeingia kwa kupitia kwangu ataokolewa; ataingia na kutoka, na kupata malisho.

¹⁰ Mwizi huja kwa shabaha ya kuiba, kuua na kuharibu. Mimi nimekuja mpate kuwa na uzima—uzima kamili.

¹¹ “Mimi ni mchungaji mwema. Mchungaji mwema huutoa uhai wake kwa ajili ya kondoo wake.

¹² Mtu wa kuajiriwa ambaye si mchungaji, na wala kondoo si mali yake, anapoona mbwa mwitu anakuja, huwaacha kondoo na kukimbia. Kisha mbwa mwitu huwakamata na kuwatawanya.

¹³ Yeye hajali kitu juu ya kondoo kwa sababu yeye ni mtu wa mshahara tu.

¹⁴ Mimi ni mchungaji mwema. Nawajua walio wangu, nao walio wangu wananijua mimi,

¹⁵ kama vile Baba anijuavyo, nami nimjuavyo Baba. Mimi nayatoa maisha yangu kwa ajili yao.

¹⁶ Tena ninao kondoo wengine ambao hawamo zizini humu. Inanibidi kuwaleta hao pia, nao wataisikia sauti yangu, na kutakuwako kundi moja na mchungaji mmoja.

¹⁷ “Baba ananipenda kwani nautoa uhai wangu ili nipate kuupokea tena.

¹⁸ Hakuna mtu anayeninyang'anya uhai wangu; mimi na nautoa kwa hiari yangu mwenyewe. Ninao uwezo wa kuutoa na uwezo wa kuuchukua tena. Hivi ndivyo Baba alivyoniamuru nifanye.”

¹⁹ Kukawa tena na mafarakano kati ya Wayahudi kwa sababu ya maneno haya.

²⁰ Wengi wao wakasema, “Ana pepo; tena ni mwendawazimu! Ya nini kumsikiliza?”

²¹ Wengine wakasema, “Haya si maneno ya mwenye pepo. Je, pepo anaweza kuyafumbua macho ya vipofu?”

²² Huko Yerusalemu kulikuwa na sikukuu ya Kutabaruku. Wakati huo ulikuwa wa baridi.

²³ Naye Yesu akawa anatembea Hekaluni katika ukumbi wa Solomoni.

²⁴ Basi, Wayahudi wakamzunguka, wakamwuliza, “Utatuacha katika mashaka mpaka lini? Kama wewe ndiye Kristo, basi, tuambie wazi.”

²⁵ Yesu akawajibu, “Nimewaambieni, lakini hamsadiki. Kazi ninazozifanya mimi kwa jina la Baba yangu zinanishuhudia.

²⁶ Lakini ninyi hamsadiki kwa sababu ninyi si kondoo wangu.

⁵ Hawatamfuata mgeni lakini badala yake watamuepuka, kwa sababu hawazijui sauti za wageni.”

⁶ Yesu alisema mfano huu kwao, lakini hawakuyaelewa mambo haya ambayo alikuwa akisema kwao.

⁷ Yesu akasema nao tena, “Amini, amini, nawaambia, Mimi ni mlango wa kondoo.

⁸ Wote walionitangulia ni wezi na wanyang'anyi, lakini kondoo hawakuwasikiliza.

⁹ Mimi ni mlango. Yeyote aingiaye kupitia kwangu, ataokolewa; ataingia ndani na kutoka, naye atajipatia malisho.

¹⁰ Mwizi haji isipokuwa kuiba, kuua, na kuangamiza. Nimekuja ili kwamba wapate uzima na wawe nao tele.

¹¹ Mimi ni mchungaji mwema. Mchungaji mwema huutoa uhai wake kwa ajili ya kondoo.

¹² Mtumishi aliyeajiriwa, na siyo mchungaji, ambaye kondoo si mali yake, huwaona mbwa mwitu wakija na huwaacha na kuwakimbia kondoo.

¹³ Na mbwa mwitu huwakamata na kuwatawanya. Hukimbia kwa sababu ni mtumishi wa kuajiriwa na hawajali kondoo.

¹⁴ Mimi ni mchungaji mwema, na ninawajua walio wangu, nao walio wangu wananijua mimi.

¹⁵ Baba ananijua, nami namjua Baba, nami nautoa uhai wangu kwa ajili ya kondoo.

¹⁶ Ninao kondoo wengine ambao si wa zizi hili. Hao pia, yanipasa kuwaleta, nao wataisikia sauti yangu ili kwamba pawepo na kundi moja na mchungaji mmoja.

¹⁷ Hii ndiyo sababu Baba ananipenda: Niutoe uhai wangu halafu niutwae tena.

¹⁸ Hakuna auchukuaye kutoka kwangu, lakini mimi nautoa mwenyewe. Ninayo mamlaka ya kuutoa, na ninayo mamlaka ya kuutwaa pia. Nimelipokea agizo hili kutoka kwa Baba.”

¹⁹ Mgawanyiko tena ukatokea kati ya wayahudi kwa sababu ya maneno haya.

²⁰ Wengi wao wakasema, “Ana pepo na ni kichaa. Kwa nini mnamsikiliza?”

²¹ Wengine wakasema, “Haya siyo maneno ya mtu aliyepagawa na mapepo. Pepo linaweza kufungua macho ya kipofu?”

²² Ndipo ikaja Sikukuu ya Kuwekwa Wakfu Yerusalemu.

²³ Ulikuwa wakati wa baridi, na Yesu alikuwa akitembea hekaluni katika ukumbi wa Selemani.

²⁴ Ndipo Wayahudi walipomzunguka na kumwambia, “Mpaka lini utatuweka katika mashaka? kama wewe ni Kristo, tuambie wazi.

²⁵ Yesu akawajibu, “Nimekwisha waambia lakini hamuamini. Kazi nizifanyazo kwa jina la Baba yangu, hizo zinashuhudia juu yangu.

²⁶ Hata hivyo hamuamini kwa sababu ninyi si kondoo wangu.