Yoane 6:31-45

³¹Mepiun ke sanene vanon mesitom̃al kieta li marua la na susumo ne, nap̃a asu e yokorena. Asum̃a sanena Mosis kila kile wo tai pan la, nap̃a silaga la ap̃ar kilaparavi nap̃a apio mana, ana akania, pe visokar la re nena ga. Sur nene teke e Tus Wa, a pisa sape ‘Silau ga naga pagan la e kilaparavi nae ma e peni!’”

³²Ana Yesu pisatam̃e la ke sina ga, pisapenua “Lelaga, sur nene teke e Tus Wa, ana kilaparavi nap̃a Mosis mlavia, pe pe kilaparavi nae re ma e peni poli. Kilaparavi nap̃a nae ma e peni nalelaga, arimau ga kilia lavia.

³³Kilaparavi kiena ne Ntewa naga inu ga ne nap̃a nemligan ma e peni nepitom tano, vena nela malena viu van yeririna na yomerava lala.”

³⁴Ana apisatam̃ea, asape “Sup̃e, kilaparavi ke nene narui nap̃a imimi sinemiminia silaga.”

³⁵Ana Yesu pisa pan la, pisape “Inu, in na kilaparavi na malena. Yar a nap̃a vim pun inu, tap̃atete si viso karia, yar ai nap̃a lelaga e inu, tap̃atete si moto karia.

³⁶Ana sur taaga ga na piowa, sa nap̃a nepisa pa pan amiu rui, nap̃a apisu inu amio kiau kile lala e kilamaramiu rui, ana amon lelagaen e inu.

³⁷Ana monar yar p̃asia alelaga e inu, vanon la punu ga nap̃a Ata mligan sike e lum̃au, yoko monar aim pun inu, a la punu ga nap̃a aim pun inu, ve lala yar re si tai nap̃a nekilia nekuan lua sina, yoko nowarar ruru punu ga ave kiau.

³⁸“In na nemligan ma e peni nepitom tano e yomerava nini, pe nakilaen re nasinenanena kiau poli, ana pe nakilaen nasinenanena kiena ne naga nap̃a mligan inu nepitom tano.

³⁹A pupia kiena nasinenanena sanini, sape la nap̃a naga mligan la asike e lum̃au, yoko ve nekilalu re lala yar tai, naga sinenan pisape e legiena maro nevisir plan la punu sina ga.

⁴⁰Ata sinenan manene laa pisape ve sanene narui, nap̃a la punu ga nap̃a avisu inu, ana alelaga e inu, yoko atol malena nap̃a pe luas re poli, a sinenan manene m̃ena pisape e legiena maro, yoko in na nevisir plan la sina ga.”

⁴¹Ana pogos nap̃a yerkawa kiena ne le Yu lala amiyagogan ke visena kiena ne Yesu, pe akekaran re nenaga, ana la apis lili m̃a vanonia. Kiena visen tai nap̃a amon logeena, nane visena nap̃a pisawalia sape naga pe kilaparavi nap̃a petan ma e peni pitomi tano e yomarava nini.

⁴²Apisayu pan la, apisape “?Sanape ne yar nene pisa ke pan ita pisape petan ma e peni metava pitomi tano pun ita? Naga pe yar re tai nene po, tekilia ruru pa naga rui, anena amio arimana. Naga Yesu ga p̃a, narina yermarua Yosop.”

⁴³Ana Yesu pisatam̃e la, pisape “!Ei, visen mumu la e inu p̃isi, amiu ayagoga ruru kone wa!

⁴⁴Yar ai nap̃a imi lelaga e inu nagane, e legiena maro nevisirlua naga mal sina ga. A ata nap̃a tam̃an inu nepimi, visae naga ve ure re yaru nene vim, ana tap̃atete nena kilia imi punu.

⁴⁵Tus kiena ne navisawalena Aisea pisawal visena tai, pisape ‘Lala punu ga, yoko Ntewa ga vian la,’ ana komin nanene, nepisape la nap̃a aloge ruru visena kiena Ata Ntewa nap̃a naga vian ruru la ea, lala nene aim pun inu.