Yoane 1:9-29

⁹Ana siraunia, yaru na yomerarava nene pimi kate e yomarava nini. Naga pe yomerarava nalelaga napo, ana pimi pe na ligan kiena yomerarava nene e malena kiena yeririna punu ga.

¹⁰Yaru na yomerarava, naga nap̃a sii yomarava nini, ana pogos nap̃a pimi ea, ana yeririna na yomarava lala pe apisulup̃ar re si naga poli.

¹¹Naga pimi p̃es puna ne um̃a m̃ana ne kiena yeririna la, ana la na mratava puna pe sinelan re naga poli.

¹²Ana la ga p̃asia akekaran naga, amlelaga ea, ana e la ga nene punuia, naga tam̃an la vena akilia aim ave narina ne Ntewa lala.

¹³Naga kila la apaeme sina yam luania, pe sa re nap̃a sisi la na apaeme taveve lus na kuruta, pona nasinenanen sa yerm̃ene amio sira, pona sitomena kiena yeririna, ana apaeme sina taveve nasinenanena kiena ne Ntewa.

¹⁴Sanene na, Purp̃es nen P̃elaga kiena ne Ntewa pimi pe yeririna lelaga, pimi sike likan ita, ana tepisu kiena malena napo, pulen manene laa p̃elaga na lemamena amio p̃elaga nalelagaena. Naga pe nowo tanea wa m̃earu kiena ne Arimata, ana mepisu kiena pupia naurarena, kiena naga taaga.

¹⁵Pogos nap̃a Yoane Nakeena pisayu naga nanua ne, pisape “Naga nap̃a nepisawal pae pan amiu, nesape naga yoko siraun inu, naga su metava, in na neto ga tano, komin naga mal nakonua laa sane, in na na nanagane ga ne.”

¹⁶Naga pulen p̃elaga wo lala, ana silaga kila ke po pan ita pap̃isi, kiena pupia lemamena kila temlogelue ga po pap̃isi.

¹⁷Nanua Ntewa pisirlua yermarua Mosis, p̃ar ga kiena navisaluaena lala pimi pan kiena yeririna lala, ana Yesu Kristo, Ntewa pisirlua naga p̃ar p̃elaga na lemamena amio visena na lelagaena pitomi e yomarava nini.

¹⁸Ita yeririna lala pe yar re nena tai nap̃a kilia Ntewa poli, pona pisu e kilamarana, ana yaru nap̃a tolue ga e sitomena kiena ne Ntewa, lalua aparpran la ga veraga, naga ga pimi kila ita tekilia Ntewa amio kiena p̃elaga lala.

¹⁹Ana pogos nap̃a Yoane Nakeena mlologo m̃a pano-o, nasumonena kiena le Yu lala nae Yerusalem la asitom veve ke pap̃isi sane naga miyum̃ae ke sanape, pona naga pe Navisaarena, po naga ai. Ana la apitetalia yaru wa p̃asia amio yar keviu si p̃asia na lus wa kiena ne Livae, apim apiun petania asape “Ko na ai?”

²⁰Ana pogos nap̃a lala apiunia, naga pisawal ruru ga sur punu ga pan la, pisatam̃e la, pisape “Peraga, in na pe nepe Navisaarena re poli.”

²¹Ana la apisape “?Sanene na, ko na Yermarua Elaisa nanua sumo ne, ana ko omal sina, po pere? Nanene komin nap̃a Visena Wa pisape naga monar wasup̃e sina sumon Navisaarena.” Ana naga pisatam̃e la sina, pisape “Peraga, pe in re nene poli.” Ana apisape “?Pogaga, ana po ko na navisaluaena nap̃a Mosis pisaar nanua yo rui?” Ana pisatam̃e sina, pisape “Peraga rui.”

²²Ana la apiun ke sina ga tania, sape “?Ana ko na a si narui? Monar ovisa sur tai van imimi vena mekilia mevano mevisawal van la nap̃a amligan imimi mepimi. Ovisawal ruru ga van imimi, sane ko na ai?”

²³Ana kiena navisatam̃eena e pogos nene sanini, pisape “Inu in na pulgo korena ga ne e yokorena nini, nap̃a Navisawalena Aisea pisawal na konua rui. Ana pulgo nene pimi pe na visawalen sape: ‘Amiu akila ruru mrapa lala kiena Sup̃e e kiamiu malena!’”

²⁴Ana lala p̃as nap̃a asike e pogos nene, le Varasi lala,

²⁵ana la apiun ke sina ga pan Yoane, apisape “Imimi memloge pa rui, ko na opisa osape pe ope Navisaarena re poli, pe ope Elaisa re poli, a pe ope navisaluaena re nap̃a Mosis pisa poli. ?A visae sanene na, vanon ya ne ko na ositom osape ko na otorokin osun okekee lue yeririna lala sanene?”

²⁶Ana Yoane pisatam̃e la, pisape “Inu, nakeena nap̃a nekila ke ne e la nene, naga e ga e wii. A yaru tap̃ena tai yoko imi kus leleu, nap̃a naga sike pa likan ita rui, ana pe akilia re naga poli wa.

²⁷Naga to laa metavan manene inu, sane in na pe netorokin re neva lavisin po, pona neyal nemio.”

²⁸Ana lele nap̃a apa ke ea na visuen Yoane, nane e norava lavisin kumali nap̃a Petania, e wii nap̃a Yortan lepas na vano, nane e yo nap̃a Yoane sum̃a kee ke yeririna lala ea.

²⁹Ana e legien tap̃ena si tai, Yesu mial pa katen Yoane Nakeena amio imimi kiena nalogena la e yo nap̃a mesike ea. Ana pogos nap̃a Yoane pisu Yesu, pisa pan imimi, pisape “!E, amiu avisu yar na mial ke pimi nam̃a! Naga, sa ga narin sipsip kiena ne Ntewa nawarplanen nakoaena na mlamulena viowa kiena ne yeririna lala na yomarava nini.