San Juan 1:9-29

⁹Cjuahasen xi cjuaquixi jan ne, xi visehen ngajñi rë cjuatacun rë yëjë xuta ne, sehe canduva nguehe ngasunhndë.

¹⁰Me xi hmí rë Cjua jan ne, cavéjña me ngasunhndë. Hacuaha handasa cojo me xi catsindaja Nina ngasunhndë ne, peru xuta ne, hvíin me yo.

¹¹Canduva me ngasunhndë rë suvá me, peru xuta nangui rë suvá me ne, cafahatsjaain rë me.

¹²Peru ngu jo xuta nangui rë me xi cafahatsja rë me hacuaha camangu cacun cojo rë me ne, me xi Cjua jan ne, casua me chuva rë xi cuma xuta xi cuacun jan quihndi rë Nina.

¹³Xuta xi cuacun jan ne, hacuiin camá me quihndi rë Nina chuva rë xi meje rë ngu xihin ngu quihndi ta suvá Nina casahmi me xi camá xuta xi cuacun jan quihndi rë me.

¹⁴Me xi Cjua jan ne, camá me ngu xuta, hacuaha cavéjñacahndë me ngajñi niji. Hatuxa quitsë rë xahasen rë me cjuandaja, quitsë rë xahasen rë me cjuaquixi. Ngayin ne, cahyin hacutjin xi jemu jyë hnga me cojo hasen rë me. Jyë hnga me sacuatjin casahmi rë me Nahmi rë me.

¹⁵Juan Vitenda rë Xuta ne, cachja me cojo xuta tsëhë me xi Cjua jan, cuitjin cachja me: ―‍Me vihi xi cachjá tsëhë, xi me xi sehe cuinduva ne, handasa ngahan canduvá titjun ne, peru me vëhë xi hitsë sa venguichji rë me xi cuma ná ngahan, tsëhë xi ha tacun me hya xi catsin ngahan.

¹⁶Tsëhë xi hatuxa jemu quitsë rë xahasen rë me cjuandaja ne, vëhë xi ngayejen ni ne, hacuaha jemu cachjahanntsan cjuandaja.

¹⁷Ley rë Nina ne, nima Moisés casua naja me, peru cjuandaja cojo cjuaquixi ne, Jesucristu casua naja me.

¹⁸Tsajin camahani yo xi cavëë rë Nina. Suvá ni Quihndi ngu rë Nina xi hacuaha nina me hacuaha tacun tangun me cojo Nina Nahmi naja ne, me vëhë casua me camachaya naja yo xi Nina.

¹⁹Cuitjin cachja Juan hya xi catsingatju xutaxa rë tsëhë nandya Jerusalén ngu jo nahmi cojo sacristán xi cjue cjuinenguise rë me Juan cuitjin: ―‍Ngayun ne, ¿yo ngayun? ―‍Cuatjin cjuinenguise me.

²⁰Hane hora xi cuatjin cavinenguise me ne, Juan ne, catsinguixi me, hacuiin cavetsangui me, cuitjin catsinguixi me: ―‍Hacuiin ngahan Xihin xi Tsingatju Nina. ―‍Cuatjin cachja me.

²¹Ngajan xi cavinenguise nga nahmi xi cuacun jan cuitjin: ―‍¿Mé ni ni? ¿Há xutachanga naja Elías ngayun? ―‍Cuatjin cavinenguise me. Ngajan xi Juan ne, cuitjin cafayangui me: ―‍Hacuiin ngahan. ―‍Cuatjin cafayangui me. Ngajan xi cavinenguise nga nahmi xi cuacun jan cuitjin: ―‍¿Há ngayun profeta xi jemu nechanyan rë? ―‍Cuatjin cavinenguise me. Hane Juan ne, cuitjin cafayangui nga me: ―‍Jéya. ―‍Cuatjin cafayangui nga me.

²²Ngajan xi nahmi xi cuacun jan ne, cavinenguise nga me cuitjin: ―‍¿Yo ngayun ni? Tinújun cojo niji ne, cojo sa xi cuma nicuyin ngu cjua tsëhë me xi catsingatju niji. ¿Mé nújun tsujun suvun? ―‍Cuatjin cachja me.

²³Ngajan xi Juan ne, cuitjin cafayangui me: ―‍Ngahan ne, xuta xi jercu hñu chjá nguehe hiscan jemu xín tsëhë nandya, xi catitsinguixi xuta ndiya tsëhë Nai naja, sacuatjin cachja profeta Isaías hatsëë nixtin. ―‍Cuatjin cafayangui me.

²⁴Quihndë ne, xuta xi cuacun catsingatju cha partidu fariseo xi cuichja me cojo Juan ne,

²⁵cuitjin cavinenguise me: ―‍¿Mé má cuatjin vitendun xuta sa xi hacuiin ngayun xi Tsingatju Nina ngayun, hacuiin ngayun xi profeta Elías ngayun, hacuiin ngayun xi profeta xi jemu nechanyan rë ngayun ni? ―‍Cuatjin cavinenguise me.

²⁶Ngajan xi Juan ne, cuitjin cafayangui me: ―‍Ngahan ne, cojo nandá tiviténda nuju, peru ngajñi nuju secun ngu me xi hyúun yo.

²⁷Ngahan ne, canduvá titjun, sehe canduva me vëhë, peru hisca tsajin mé cumachjirëhë ngahan xi cuma rë me. ―‍Cuatjin cafayangui Juan.

²⁸Xcusun vëhë ne, camá ngajan ngu cahndë́ hiscan xi hmí Betania, ngunda vëhë tsëhë ndajyë Jordán, hiscan tivitenda Juan xuta.

²⁹Xi camá nchujun jan ne, cavëë Juan xi nduva Jesús hiscan secun me. Hane cuitjin cachja Juan cojo xuta: ―‍¡Chutsujun ni! Cuajyihi me xi sacuaha chu tsánga xi sua Nina xi tsicjë jyë́ rë xuta.