Yantayetiniri Itiancaneni Jesoshi 12:14-20

¹⁴Iotsatavajiri irineane Petero, oquimoshiretasanotanaque. Iro cantaincha te ashitareanaqueneriji, ainti oshiashitanaca. Ocamantajeitiri quenquetsatacaajeitiriri Tasorentsi: —Jeritapaaji Petero omoroquinta.

¹⁵Icantajeitavaquero: —Pishinquiventacateemi. Aiquero ocantanaitii: —Queariosanotaque. Icantaquero: —Caari ini Petero, irintiata inampire Tasorentsi, amenacoventiriri.

¹⁶Aiquero catsini iposanaitiiro, toc, toc, irosati yashitareantajanari. Ari ineajeitavajiri, yoajeitavaqueri cavaco, icantavacaajeitanaja: —¿Jaoca iquenapaajiri?

¹⁷Ari yacotashitanaqueri, icantiri: —Pimajerejeite. Impoiji icamantajeitapaajiri jaoca icantajiriri Avincatsarite, yoimisoquijantajariri. Aisati icantiri: —Pincamantaiteri Santiaco, aisati pincamantajeiteri ayemisantaririnte. Irosati isoquijantanaja, ijatanaji imanapitsatacari soraropee.

¹⁸Oquitaitetamani oshequi icantavacaimentajeitacari soraropee: —¿Jaocaquea meeca icantanajari Petero?

¹⁹Icoacantavetacari Eroreshi, te irineajeriji. Isampinatiri soraro shentavetariri: —¿Jaocaqueame iquenanajiri? Yacanaqueri: —Caa, jaocarica, te nioteji; te noneavajeriji. Ari iquisaqueri Eroreshi soraropee, yoacantajeitaqueri, shemi. Ari impoiji yojocanajiro Eroreshi Jorea, yovaanaja anta Sesareaqui, irosati isavicantapaaja.

²⁰Ari anta Tiroqui aisati Shiroqui aajeitaqueri savicajeitatsiri itashe, te ontimasanoteji iroajeiteari. Peerani icantiri iriori Eroreshi: —Pincavintsaajeitena, nocamicari. Pimpapinijeitenaro noyeari. Ari ipapinijeivetacari, iro cantaincha meeca iquisajeitaqueri. Oshequi iquenqueshireajeitanaca tirosati aisati shirosati. Icantavacaajeitaca: —Itsaneapitsajeiteerocari avajeiteari. Tsame ancanteri Varashito iramitacojeitee ampitsimareacaajeari: tempa iriotaque inampire Eroreshi. Ariorica incanteri, iraacameetsajeitajee aisati, eiroquea itsaneapitsatanteerotsi ayeari. Icantiri Varashito; impoiji icantiri iriori: —Ari, namitacojeitempi. Noncanteri novincatsarite incajemajeitempi, iraacameetsajeitempi.